Markus 15 - Perjanjian Baru Bahasa Melayu Maluku Utara

Yesus dapa urus di gubernur Pilatus

¹ Waktu masi pagi-pagi skali, imam-imam kapala bakumpul lagi deng tua-tua Yahudi, guru-guru agama Yahudi yang ahli lima kitab Musa, deng samua anggota laeng di Mahkama Agama itu. Di situ, dorang ambe satu keputusan. Jadi dorang ika pa Yesus kong dong bawa, turus serakan pa Pilatus la dia yang hukum mati pa Yesus.

² Pe sampe di sana, Pilatus tanya pa Yesus, “Butul Bapa ini orang Yahudi pe Raja?” Yesus jawab, “Bapa sandiri yang bilang bagitu.”

³ Kong imam-imam kapala tudu pa Yesus, bilang kata Dia so banya biking kajahatan.

⁴ Pilatus tanya ulang pa Dia bagini, “Dengar itu! Dorang so bilang Bapa so biking banya kajahatan. Bikiapa kong Bapa tara bela Bapa pe diri?”

⁵ Tapi Yesus cuma babadiam, sampe gubernur Pilatus jadi herang.

Yesus dapa hukuman mati

⁶ Tiap taong, waktu hari raya Paska, gubernur biasa kase bebas satu orang dari penjara. Orang yang dia kase bebas itu iko deng orang banya pe mau.

⁷ Waktu itu, ada orang jahat satu dia pe nama Barabas. Dia maso penjara sama-sama deng orang-orang laeng, barang dorang ada bunu orang waktu marontak pa pemerinta Roma.

⁸ Jadi, di hari raya itu, banya orang datang pa gubernur Pilatus. Dorang minta pa dia la kase bebas satu orang dari penjara sama deng yang biasa dia jaga biking.

⁹ Kong Pilatus tanya pa dorang, “Ngoni mau kita kase bebas ngoni orang Yahudi pe Raja ini?”

¹⁰ Pilatus bilang bagitu, barang dia tau, imam-imam kapala serakan Yesus pa dia cuma karna mangiri pa Yesus. Jadi Pilatus kira orang banya itu akan minta kase bebas pa Yesus, bukang Barabas.

¹¹ Tapi imam-imam kapala pengaru pa orang banya itu supaya dorang minta Pilatus kase bebas pa Barabas.

¹² Kong Pilatus batanya ulang pa dorang, “Kalu bagitu, apa yang musti kita biking pa orang yang ngoni sebut orang Yahudi pe Raja ini?”

¹³ Pe dengar bagitu, dorang bataria lagi, “Salib suda pa Dia!”

¹⁴ Kong Pilatus tanya pa dorang, “Dia so biking kajahatan apa kong?” Tapi orang banya itu bataria tamba kuat, “Salib suda pa Dia!”

¹⁵ Kong karna Pilatus mo kase sanang orang banya pe hati, dia kase bebas pa Barabas untuk dorang, baru dia suru pukul pa Yesus pake tali yang ada barang tajam di dia pe ujung. Abis itu, dia serakan Yesus pa dorang la dong salib pa Dia.

Tentara-tentara baterek deng hina pa Yesus

¹⁶ Abis itu, tentara-tentara bawa pa Yesus di dorang pe tampa yang ada di gubernur pe istana pe kintal, kong pangge dorang pe tamang-tamang tentara samua yang ada di situ bakumpul.

¹⁷ Dorang kase pake pa Yesus juba ungu sama deng yang raja-raja jaga pake, baru dorang biking makota satu dari cabang-cabang kacil yang baduri kong pasang pa Yesus pe kapala.

¹⁸ Abis itu, dorang pura-pura hormat pa Dia, dorang bilang bagini, “Hidup orang Yahudi pe raja!”

¹⁹ Turus dorang pukul pa Yesus pe kapala deng bulu, dorang luda pa Dia, kong dorang berlutut pura-pura semba pa Dia.

²⁰ Abis dorang hina-hina pa Dia, dorang buka lagi juba ungu yang dorang kase pake pa Dia, kong kase pake ulang Dia pe baju sandiri. Turus tentara-tentara bawa pa Yesus kaluar dari kota Yerusalem la mo salib pa Dia.

Yesus dapa salib

²¹ Di tenga jalang, dorang baku dapa deng satu orang dia pe nama Simon. Simon ini orang Kirene, Aleksander deng Rufus pe papa. Dia baru datang dari luar kota. Kong tentara-tentara itu paksa pa dia la pikul Yesus pe salib.

²² Dorang bawa pa Yesus di tampa satu yang pe nama Golgota, yang pe arti, ‘Tampa Tengkorak’.

²³ Pe sampe di tampa itu, tentara-tentara kase pa Yesus anggur yang dorang campur deng obat yang pe nama mur. Tapi Yesus tara mau minum.

^24-25 Abis itu, waktu jam sembilan pagi dorang salib pa Yesus. Turus dorang cabu undi untuk mo tentukan sapa-sapa yang mo dapa Yesus pe baju.

²⁶ Kong alasan sampe dorang salib pa Yesus ada tatulis di papan spanggal yang dong ada kase paku di situ. Dia pe tulisan bagini, “Ini orang Yahudi pe raja.”

²⁷ Di situ me dorang ada kase salib lagi perampok dua orang sama-sama deng Yesus, yang satu pa Yesus pe sabla kanan deng yang satu lagi pa Yesus pe sabla kiri. [

²⁸ Yang Yesus dapa salib sama-sama deng orang jahat, itu iko apa yang so tatulis memang di Kitab Suci, yang dia pe bunyi bagini, “Dorang biking pa Dia sama deng orang jahat.”]

²⁹ Orang-orang yang iko di Yesus pe muka salib goyang-goyang kapala untuk hina pa Yesus. Dorang bilang, “He, Ngana bilang kata, Ngana bisa kase rubu Ruma Ibada Pusat kong mo biking ulang cuma dalam tiga hari, to?

³⁰ Kalu bagitu, coba skarang Ngana turung dari salib itu suda la kase slamat Ngana pe diri!”

³¹ Bagitu lagi deng imam-imam kapala deng guru-guru agama Yahudi yang ahli lima kitab Musa, dorang me bahina pa Yesus. Dorang bilang bagini, “Orang laeng Dia kase slamat, tapi Dia pe diri sandiri Dia tara bisa kase slamat!

³² Kalu butul Ngana ini Mesias, orang Israel pe raja, turung suda dari salib itu, la torang bisa lia kong percaya pa Ngana.” Dua orang yang dapa salib sama-sama deng Yesus me bahina lagi pa Yesus.

Yesus mati

³³ Waktu so jam dua blas siang, samua daera itu jadi galap sampe jam tiga sore.

³⁴ Kong pas jam tiga sore itu, Yesus bataria kuat-kuat pake bahasa Aram. Dia bilang, “Eloi, Eloi, lama sabakhtani?” Yang pe arti, ‘Tuhan Allah, Kita pe Tuhan, bikiapa kong Tuhan kase tinggal pa Kita?’

³⁵ Pe dengar itu, babarapa orang yang badiri di situ bilang bagini, “Ee dengar, Dia pangge nabi Elia.”

³⁶ Turus ada satu orang capat-capat ambe spons kong colo ka dalam anggur asam. Turus spons itu dia cucu di bulu kong kase dekat pa Yesus pe mulu la Dia isap. Sementara orang itu biking bagitu, dia bilang bagini, “Tong tunggu dulu kong lia, sapa tau nabi Elia mo datang kase turung pa Dia.”

³⁷ Turus Yesus bataria kuat-kuat, kong Dia putus napas.

³⁸ Pas Yesus putus napas itu, kaeng pampele basar yang ada di dalam Ruma Ibada Pusat, tarobe jadi dua dari atas sampe ka bawa.

³⁹ Ada komandan kompi Roma yang badiri di Yesus pe muka waktu Yesus dapa salib. Waktu dia lia Yesus mati model bagitu, dia bilang, “Memang butul Dia ini Anak Allah!”

⁴⁰ Di situ ada lagi babarapa parampuang yang lia-lia pa Yesus dari jao. Dari dorang itu, ada Salome, Maria orang Magdala, deng Maria yang jadi Yakobus muda deng Yoses pe mama.

⁴¹ Dorang ini yang so iko deng layani pa Yesus waktu Dia di Galilea. Ada lagi parampuang-parampuang laeng di situ yang so datang ka Yerusalem sama-sama deng Yesus.

Yesus dapa kubur di kubur goa

^42-43 Ada satu orang dia pe nama Yusuf. Yusuf ini orang Arimatea, dia anggota agama Yahudi pe kumpulan yang paling tinggi yang pe nama Mahkama Agama. Kong banya orang hormati pa dia. Dia lagi ada tunggu-tunggu Tuhan Allah pe waktu mo Berkuasa sebagai Raja pa Dia pe umat. Kong hari yang Yesus mati itu, pas di orang agama Yahudi pe hari persiapan. Hari itu, dorang musti kase selesai dorang pe karja samua sebelum matahari maso, karna di hari Sabat dong so tara bole bakarja. Jadi, pas so mo malam, Yusuf deng barani pigi pa Pilatus mo minta Yesus pe mayat la dia mo kubur.

⁴⁴ Pe dengar Yesus so mati, Pilatus herang. Jadi dia pangge pa komandan kompi kong tanya pa dia, “Butul Yesus so mati?”

⁴⁵ Kong komandan itu bilang, “Butul bapa! Yesus so mati.” Waktu Pilatus tau Yesus so mati, dia kase ijin pa Yusuf ambe Yesus pe mayat la kase kubur.

⁴⁶ Turus Yusuf pigi bili kaeng puti alus, kong dia kase turung Yesus pe mayat dari salib. Abis itu, dia bungkus Yesus pe mayat deng kaeng itu kong taru di dalam kubur goa satu yang so gale di bukit batu, baru dia guling batu basar satu mo kase tutu kubur goa itu pe pintu.

⁴⁷ Sementara itu, Maria orang Magdala deng Maria Yoses pe mama ada perhatikan tampa yang dorang taru Yesus pe mayat.