Markus 10 - Perjanjian Baru Bahasa Melayu Maluku Utara

Tuhan Allah so biking laki bini jadi satu, jadi manusia tara bole kase cere

¹ Abis itu, Yesus pigi di daera Yudea deng di daera kali Yordan pe sabla. Di situ me ada orang banya yang datang bakumpul pa Dia. Kong, Yesus mangajar pa dorang sama deng biasa Dia biking.

² Turus babarapa orang Yahudi dari aliran fanatik yang pe nama Farisi datang pa Yesus untuk cari-cari Dia pe sala. Dorang tanya bagini, “Kalu mo iko torang pe aturan agama, bole ka tarada laki-laki yang so kawing cere dia pe bini?”

³ Tapi Yesus bale batanya pa dorang bagini, “Di Kitab Suci, nabi Musa parenta apa pa ngoni?”

⁴ Dorang bilang, “Nabi Musa kase bae laki-laki cere dia pe bini asal biking surat cere.”

⁵ Turus Yesus bilang pa dorang bagini, “Gara-gara ngoni pe hati karas saja, sampe nabi Musa ada tulis aturan bagitu!

⁶ Mulai dari pertama Tuhan Allah cipta dunia ini, Dia biking laki-laki deng parampuang.

⁷ Karna itu, laki-laki akan kase tinggal dia pe papa deng mama kong hidup satu deng dia pe bini,

⁸ supaya dorang dua jadi satu. Kong dorang dua ini tara hidup sandiri-sandiri lagi, tapi dorang so jadi satu.

⁹ Karna itu, apa yang Tuhan Allah so kase jadi satu, manusia tara bole kase cere.”

¹⁰ Pe abis bilang bagitu, Yesus deng Dia pe murit-murit maso di ruma. Di situ Yesus pe murit-murit tanya lagi pa Yesus tentang ajaran tadi.

¹¹ Yesus bilang pa dorang bagini, “Sapa yang cere dia pe bini kong kawing ulang deng parampuang laeng, pa Tuhan pe muka dia so sala pa dia pe bini pertama karna dia baku suka deng orang yang bukang dia pe bini.

¹² Bagitu lagi deng dia pe bini. Kalu dia cere dia pe laki kong kawing ulang deng laki-laki laeng, pa Tuhan pe muka dia so sala pa dia pe laki pertama karna dia baku suka deng orang yang bukang dia pe laki.”

Yesus berkati pa ana-ana kacil

¹³ Kong ada orang-orang bawa ana-ana kacil pa Yesus supaya Dia taru Dia pe tangan di atas pa dorang kong kase berdoa pa dorang. Tapi Dia pe murit-murit mara pa orang-orang itu.

¹⁴ Pe lia bagitu, Yesus mara kong bilang pa dorang, “Kase biar suda ana-ana itu datang pa Kita. Jang larang pa dorang, karna orang-orang yang tara sombong deng yang capat percaya sama deng ana-ana kacil ini, dorang itu yang kase dong pe diri pa Tuhan Allah la Dia Berkuasa sebagai Raja pa dorang pe hidup.

¹⁵ Inga bae-bae yang Kita mo bilang pa ngoni ini: sapa yang tara tarima pa Tuhan Allah sama deng ana kacil yang tara sombong, dia tara akan jadi Tuhan Allah pe umat yang Dia Berkuasa sebagai Raja pa dia pe hidup.”

¹⁶ Pe abis bilang bagitu, Yesus polo pa ana-ana itu. Kong Dia taru Dia pe tangan di atas pa dorang kong berkati pa dorang.

Orang kaya susa mo jadi Tuhan Allah pe umat

¹⁷ Waktu Yesus so mo bajalang lagi, ada satu orang lari-lari datang pa Yesus. Orang itu berlutut pa Yesus pe muka kong dia tanya, “Guru yang bae, kita musti biking apa supaya kita bole dapa hidup deng Tuhan Allah slama-lamanya?”

¹⁸ Yesus bilang pa dia, “Tara satu orang yang bae, cuma Tuhan Allah saja yang bae. Tapi bikiapa kong ngana bilang Kita bae?

¹⁹ Ngana tantu so tau to, Tuhan Allah pe parenta-parenta: jang bunu orang, jang baku suka deng orang pe laki atau orang pe bini, jang pancuri orang pe barang, jang jadi saksi tara butul, jang kase foya orang la ambe dong pe barang, deng ngana musti hormati ngana pe papa deng ngana pe mama!”

²⁰ Turus orang itu bilang pa Yesus bagini, “Guru, samua parenta itu kita so biking mulai dari kita masi muda lagi.”

²¹ Yesus lia pa orang itu deng rasa kasiang, kong bilang pa dia, “Tapi masi ada satu yang ngana bolong biking. Ngana pigi suda kong jual samua ngana pe harta la kase dia pe doi itu pa orang-orang miskin. Kalu ngana biking bagitu, ngana dapa harta di sorga. Abis itu, kamari suda la iko pa Kita.”

²² Pe dengar Yesus bilang bagitu, orang itu langsung pe hati susa kong dia pigi deng hati sedi, barang dia pe harta banya skali.

²³ Turus Yesus balia pa Dia pe murit-murit di kiri-kanan kong bilang bagini, “Pe susa skali orang kaya mo kase dia pe diri la Tuhan Allah Berkuasa sebagai Raja pa dia pe hidup.”

²⁴ Pe dengar bagitu, Yesus pe murit-murit herang. Tapi Yesus bilang lagi, “Kita pe tamang-tamang yang Kita sayang! Pe susa skali orang mo kase dia pe diri la Tuhan Allah Berkuasa sebagai Raja pa dia pe hidup.

²⁵ Masi lebe gampang unta satu ekor maso iko lobang jarum daripada orang kaya mo kase dia pe diri la Tuhan Allah Berkuasa sebagai Raja pa dia pe hidup.”

²⁶ Pe dengar itu, Yesus pe murit-murit lebe tamba herang kong dorang baku bilang, “Ii, kalu bagitu, sapa yang bole slamat?”

²⁷ Yesus haga pa dorang kong bilang, “Manusia tara mungkin mo kase slamat dia pe diri sandiri. Cuma Tuhan Allah saja yang bole kase slamat pa manusia, karna untuk Tuhan Allah apa saja bisa jadi.”

²⁸ Turus Petrus bilang bagini, “Torang ini so kase tinggal samua yang torang punya kong so iko pa Guru!”

²⁹ Yesus bilang pa dorang bagini, “Inga bae-bae yang Kita bilang pa ngoni ini. Sapa saja yang karna iko pa Kita deng kase tau Kabar Bae dari Tuhan Allah, sampe dia kase tinggal dia pe ruma, dia pe sudara laki-laki atau sudara parampuang, dia pe mama atau papa, dia pe ana-ana, atau dia pe kobong,

³⁰ dia itu di dunia ini mo dapa lagi saratus kali lipa: ruma, sudara laki-laki, sudara parampuang, mama, ana-ana deng kobong. Tapi biar bagitu me, dia akan dapa banya siksa lagi, kong nanti mo dapa hidup deng Tuhan Allah slama-lamanya.

³¹ Tapi banya orang penting di dunia ini, nanti jadi orang yang tara penting, kong orang yang tara penting di dunia ini, nanti jadi orang penting.”

Yesus kase tau yang ketiga kali Dia akan mati

³² Yesus deng Dia pe murit-murit bajalang, pigi ka atas di kota Yerusalem. Waktu dorang bajalang, Yesus di muka. Dia pe murit-murit hawater, deng orang-orang yang iko pa Dia dari balakang me so tako. Turus Yesus pangge pa Dia pe dua blas murit la badekat kong Dia kase tau pa dorang satu kali lagi apa yang mo jadi pa Dia.

³³ Yesus bilang bagini, “Dengar e! Skarang torang mo pigi ka atas di kota Yerusalem. Di sana, orang mo serakan Anak Manusia yang dari sorga pa imam-imam kapala deng guru-guru agama yang ahli lima kitab Musa. Kong dorang mo kase hukuman mati pa Dia. Dorang mo serakan Dia pa orang-orang yang bukang Yahudi,

³⁴ kong orang-orang itu mo ejek-ejek, luda, pukul pake tali yang ada barang tajam di dia pe ujung, kong dong bunu pa Dia. Tapi di hari yang ketiga, Dia akan hidup ulang.”

Orang yang paling hebat pa Tuhan pe muka itu orang yang layani orang laeng

³⁵ Abis itu, Yakobus deng Yohanes, Zebedeus pe ana-ana itu, badekat pa Yesus kong bilang bagini, “Guru, ada yang torang mo minta. Kalu bole, Guru kase iyo.”

³⁶ Yesus tanya pa dorang, “Ngoni mo minta apa pa Kita?”

³⁷ Turus dorang bilang bagini, “Nanti kalu Guru so jadi Raja kong berkuasa, torang minta Guru pake pa torang dua dudu pa Guru pe sabla. Satu di sabla kanan, deng satu lagi di sabla kiri.”

³⁸ Yesus bilang pa dorang bagini, “Ngoni tara mangarti deng apa yang ngoni minta. Kita ini nanti mo dapa banya sengsara. Apa ngoni bisa pikul penderitaan deng sengsara sampe mati sama deng Kita?”

³⁹ Kong dorang jawab, “Torang bisa!” Turus Yesus bilang pa dorang, “Memang ngoni nanti menderita deng sengsara sampe mati sama deng Kita.

⁴⁰ Tapi tentang sapa yang mo dudu di Kita pe sabla kanan deng sabla kiri, itu bukang Kita pe hak mo tentukan. Tampa itu Kita pe Bapa so sadia untuk orang-orang yang Dia so tentukan.”

⁴¹ Waktu spulu murit yang laeng dengar apa yang Yakobus deng Yohanes minta, dorang hati saki pa dong dua.

⁴² Turus Yesus pangge pa dorang samua kong Dia bilang bagini, “Ngoni tau, pemimpin-pemimpin dari bangsa-bangsa yang tara kanal pa Tuhan, dorang itu jaga pimpin pa dong pe rakyat deng karas. Bagitu lagi deng dorang pe orang-orang basar, dorang jaga siksa pa orang-orang yang dong pimpin.

⁴³ Tapi ngoni tara bole bagitu! Sapa dari ngoni samua yang suka mo jadi hebat pa Tuhan pe muka, dia musti jadi sama deng orang biasa-biasa saja yang layani pa ngoni.

⁴⁴ Deng sapa dari ngoni yang suka mo jadi orang paling hebat pa Tuhan pe muka, dia musti biking dia pe diri sama deng orang karja untuk layani pa samua orang.

⁴⁵ Barang, Anak Manusia yang dari sorga me datang di dunia ini bukang untuk dapa layani, tapi untuk layani deng kase diri la tebus orang banya pe dosa.”

Yesus kase sembu orang buta

⁴⁶ Yesus deng Dia pe murit-murit sampe di kota Yerikho. Waktu dorang so bajalang kaluar dari kota itu, ada banya orang yang iko sama-sama deng dorang. Di pinggir jalang ada orang buta satu yang dudu minta-minta. Orang itu dia pe nama Bartimeus, dia pe papa pe nama Timeus.

⁴⁷ Waktu dia dengar Yesus orang Nazaret itu ada lewat, dia bataria bagini, “Yesus, raja Daud pe turunan, kasiang pa kita ka!”

⁴⁸ Pe dengar dia bataria bagitu, banya orang togor pa dia supaya dia badiam. Tapi dia bataria lebe kuat lagi, “Bapa, raja Daud pe turunan, kasiang pa kita ka!”

⁴⁹ Kong Yesus berenti, turus Dia bilang bagini, “Pangge pa dia kamari!” Kong dorang bilang pa orang buta itu, “Smangat e, ngana badiri suda, Yesus ada pangge pa ngana.”

⁵⁰ Pe dengar bagitu, orang buta itu capat-capat lapas dia pe juba kong dia badiri pigi pa Yesus.

⁵¹ Yesus tanya pa dia, “Ngana mau Kita biking apa pa ngana?” Turus orang buta itu bilang, “Guru, kita minta supaya kita bisa dapa lia.”

⁵² Pe dengar itu, Yesus bilang pa dia, “Karna ngana so percaya pa kita, ngana sembu. Jadi ngana so bole pigi!” Waktu itu suda, orang buta itu so bisa dapa lia, turus dia iko sama-sama deng Yesus.