Lukas 22 - Perjanjian Baru Bahasa Melayu Maluku Utara

Pemimpin-pemimpin agama Yahudi baku ator mo bunu pa Yesus

¹ Waktu itu, orang Yahudi pe Hari Raya Roti Tara Pake Ragi so dekat. Hari raya itu dong sebut Paska, hari yang dorang inga waktu Tuhan Allah kase bebas pa dorang pe orang tua dulu-dulu dari bangsa Mesir yang jaja pa dorang.

² Imam-imam kapala deng guru-guru agama Yahudi yang ahli lima kitab Musa, dong baku ator mo bunu pa Yesus deng cara sambunyi-sambunyi, karna dorang tako pa orang banya yang suka pa Yesus.

Yudas baku ator mo serakan pa Yesus

³ Ada satu dari Yesus pe dua blas murit, dia pe nama Yudas Iskariot. Waktu itu, Iblis maso pa Yudas pe hati,

⁴ kong Dia pigi pa imam-imam kapala deng kapala-kapala penjaga Ruma Ibada Pusat la baku ator mo serakan Yesus pa dorang.

⁵ Dorang sanang kong sepakat untuk kase doi pa Yudas.

⁶ Yudas me setuju. Kong mulai waktu itu, dia cari-cari kesempatan yang pas la bisa serakan Yesus pa dorang, jang ada orang yang tau.

Yesus suru Dia pe murit-murit biking persiapan hari raya la dorang makang sama-sama

⁷ So sampe dia pe waktu, orang agama Yahudi mo biking dorang pe hari raya Roti Tara Pake Ragi. Hari itu, orang Yahudi musti potong domba Paska untuk inga waktu Tuhan Allah kase bebas pa dorang pe orang tua dulu-dulu yang dapa jaja dari bangsa Mesir.

⁸ Turus Yesus suru pa Petrus deng Yohanes, Dia bilang bagini, “Pigi suda, kong kase sadia makanang hari raya Paska untuk torang makang sama-sama.”

⁹ Kong dorang dua tanya pa Yesus, “Guru, Guru mau torang kase sadia makanang itu di mana?”

¹⁰ Yesus bilang pa dorang, “Waktu ngoni maso kota Yerusalem, ngoni akan baku dapa deng satu orang yang ada pikul tampayang yang ada isi aer. Ngoni iko pa dia sampe di ruma mana yang dia maso,

¹¹ kong bilang pa tuang ruma di situ bagini, ‘Torang pe Guru suru tanya, di mana tampa yang Guru mo pake untuk makang makanang hari raya sama-sama deng Dia pe murit-murit?’

¹² Turus, orang itu akan kase tunju pa ngoni tampa satu yang basar di sabla atas deng samua alat so ada di situ. Ngoni kase siap suda makanang di situ.”

¹³ Abis dengar Yesus bilang bagitu, Petrus deng Yohanes pigi, kong dapa sama persis deng samua yang Yesus so bilang pa dorang. Turus dorang kase siap makanang hari raya Paska.

Yesus makang sama-sama deng Dia pe murit-murit

¹⁴ Pas so dia pe waktu mo makang di hari raya itu, Yesus dudu makang sama-sama deng Dia pe murit-murit yang orang sebut rasul.

¹⁵ Yesus bilang pa dorang, “Di hari raya ini, Kita ingin skali makang makanang hari raya sama-sama deng ngoni, sebelum Kita sengsara.

¹⁶ Karna Kita bilang pa ngoni: ini yang terahir Kita mo makang makanang hari raya di sini sampe maksut dari hari raya ini jadi genap nanti di waktu Tuhan Allah Berkuasa sebagai Raja pa Dia pe umat.”

¹⁷ Abis itu, Yesus ambe cawan satu kong bilang tarimakasi pa Tuhan Allah, turus Dia bilang pa Dia pe murit-murit, “Ambe ini, la ngoni satu-satu orang minum.

¹⁸ Dengar bae-bae yang Kita bilang ini, dari sini ka sana, Kita tara akan minum lagi anggur ini. Tapi nanti waktu Tuhan Allah so Berkuasa sebagai Raja pa Dia pe umat, baru Kita minum lagi.”

¹⁹ Turus, Yesus ambe roti, kong bilang tarimakasi pa Tuhan Allah. Dia pela-pela roti itu kong kase pa dorang, Dia bilang, “Roti ini, Kita pe badan yang Kita serakan untuk ngoni. Makang ini untuk inga pa Kita!”

²⁰ Bagitu lagi abis makang, Yesus kase cawan yang ada isi anggur pa Dia pe murit-murit. Dia bilang, “Anggur dalam cawan ini, Kita pe dara yang tatumpa untuk kase sah Tuhan Allah pe janji yang baru. Kong Kita pe dara yang tatumpa itu jadi bukti, Tuhan Allah pe janji yang baru untuk manusia so jadi.

²¹ Tapi jang kage deng yang Kita mo bilang ini, orang yang mo serakan pa Kita, skarang ini ada makang sama-sama deng torang di sini.

²² Memang, Anak Manusia yang dari sorga akan mati sama deng yang Tuhan Allah so tentukan dulu, tapi cilaka suda orang yang bahianat pa Anak Manusia, dia akan dapa hukuman yang barát.”

²³ Pe dengar itu, Yesus pe murit-murit mulai baku tanya, sapa dari dorang yang akan mo biking bagitu.

Sapa yang paling hebat

²⁴ Turus, Yesus pe murit-murit mulai baku malawang sapa yang jadi orang yang paling hebat dari dorang samua.

²⁵ Kong Yesus bilang pa dorang, “Raja-raja dari bangsa-bangsa yang tara kanal pa Tuhan, dorang pimpin dong pe rakyat deng karas, kong dorang mau orang sebut, ‘dorang itu suka tolong dong pe rakyat’.

²⁶ Tapi ngoni tara bole bagitu. Sapa dari ngoni samua yang mo jadi orang yang paling hebat pa Tuhan Allah pe muka, dia musti jadi sama deng orang tara penting. Kong sapa yang mo jadi pemimpin, dia itu musti jadi sama deng orang biasa-biasa saja yang jaga layani orang.

²⁷ Coba ngoni pikir, sapa yang lebe penting, orang yang dudu makang, atau orang yang jaga layani pa dia? Tantu orang yang ada dudu makang, to? Tapi Kita tara bagitu, waktu Kita ada pa ngoni pe tenga-tenga, Kita yang layani pa ngoni.

²⁸ Waktu Kita dapa cobaan, ngoni salalu sama-sama deng Kita.

²⁹ Karna itu, Kita mo kase kuasa pa ngoni untuk berkuasa sama deng Kita pe Bapa ada kase kuasa pa Kita.

³⁰ Deng bagitu, waktu Kita Berkuasa sebagai Raja pa Kita pe umat, ngoni bole makang minum di meja sama-sama deng Kita. Kong, ngoni akan dudu di atas kursi raja untuk adili pa dua blas suku bangsa Israel.”

Yesus kase tau kamuka, Petrus mo manyangkal bilang tara kanal pa Yesus

³¹ Yesus bilang pa Simon Petrus, “Simon, Simon, coba ngana dengar! Iblis so minta ijin pa Tuhan Allah la mo goda pa ngoni supaya ngoni tara percaya pa Kita lagi. Itu bole kase sama deng orang tapis gandum kase pisa dari dia pe kuli.

³² Tapi Kita so berdoa supaya ngana tetap percaya pa Kita. Ngana nanti bale balakang pa Kita, tapi waktu ngana pe percaya pa Kita so kuat ulang, ngana musti kase kuat pa ngana pe sudara-sudara pe hati lagi supaya dorang tetap percaya pa Kita.”

³³ Simon Petrus bilang pa Yesus, “Tuhan, biar kita maso penjara, kita siap. Kita me siap mati sama-sama deng Tuhan!”

³⁴ Tapi Yesus bilang pa dia, “Dengar bae-bae yang Kita bilang pa ngana, Petrus, malam ini sebelum ayam bakuku, ngana so manyangkal tiga kali, bilang ngana tara kanal pa Kita.”

Yesus kase tau pa Dia pe murit-murit supaya salalu siap sengsara

³⁵ Abis itu, Yesus bilang pa Dia pe murit-murit bagini, “Dulu, waktu Kita utus pa ngoni bawa Kabar Bae dari Tuhan Allah, kong Kita tara kase ijin ngoni bawa dompet, tas, deng sandal. Waktu itu, apa ngoni ada kurang apa-apa?” Dorang jawab, “Tarada, torang tara kurang apa-apa.”

³⁶ Turus Yesus bilang pa dorang, “Tapi skarang ini beda, sapa yang punya dompet atau tas, musti dorang bawa, deng sapa yang tara punya parang, dia musti jual dia pe juba supaya bisa bili parang.

³⁷ Kita bilang pa ngoni, apa yang Tuhan Allah janji di Kitab Suci tentang Kita, memang mo jadi. Ini yang tatulis di Kitab Suci, ‘Orang anggap, Dia itu orang jahat.’ Karna apa yang ada tatulis tentang Kita, skarang samua itu mo jadi.”

³⁸ Kong Yesus pe murit-murit bilang pa Dia, “Guru, coba lia, ini ada dua parang.” Yesus bilang pa dorang, “Cukup suda.”

Yesus berdoa di Bukit Zaitun

³⁹ Yesus kaluar kase tinggal kota itu, deng sama biasa, Dia pigi di Bukit Zaitun. Dia pe murit-murit me iko pa Dia.

⁴⁰ Waktu dorang sampe di tampa itu, Yesus bilang pa dorang, “Ngoni berdoa suda, supaya jang ngoni tagoda biking dosa.”

⁴¹ Kong Yesus bajao sadiki dari dorang kira-kira tiga pulu meter. Turus, Dia berlutut kong berdoa,

⁴² “Ya Bapa, kalu Bapa mau, Bapa kase jao samua penderitaan ini dari Kita. Tapi jang iko Kita pe mau, iko saja Bapa pe mau.”

⁴³ [Kong malaekat satu dari langit kase tunju rupa pa Yesus untuk mo kase kuat pa Dia.

⁴⁴ Yesus pe hati menderita skali kong Dia lebe tamba kuat berdoa. Dia pe suar jatu sama deng dara ada tatetes ka tana.]

⁴⁵ Pe abis berdoa, Yesus badiri kong bale pa Dia pe murit-murit. Dia dapa lia dorang ada tasono karna lala deng sedi skali.

⁴⁶ Turus, Yesus bilang pa dorang, “Bikiapa kong ngoni tidor? Bangun kong berdoa suda, supaya jang ngoni tagoda biking dosa.”

Yesus dapa tangka

⁴⁷ Waktu Yesus masi bicara, ada satu rombongan yang datang, kong Yudas, satu dari Yesus pe dua blas murit, dia yang paling di muka. Kong Yudas badekat pa Yesus untuk ciom pa Dia.

⁴⁸ Tapi Yesus bilang pa Yudas, “Ee Yudas, ternyata ngana ciom ini, ngana mo bahianat pa Anak Manusia?”

⁴⁹ Waktu Yesus pe murit-murit laeng lia apa yang akan jadi itu, dorang bilang, “Guru, apa torang musti pake parang la potong pa dorang suda?”

⁵⁰ Kong satu dari Yesus pe murit-murit potong imam basar pe orang karja pe talinga kanan sampe putus.

⁵¹ Tapi Yesus bilang, “Berenti suda!” Turus, Yesus pegang orang itu pe talinga kong kase bae dia pe talinga itu.

⁵² Turus Yesus bilang pa imam-imam kapala, kapala-kapala penjaga Ruma Ibada Pusat, deng tua-tua Yahudi yang datang untuk tangka pa Dia. Dia bilang, “Ngoni sangka Kita ini orang jahat, sampe ngoni bawa parang deng kayu panggal la mo tangka pa Kita?

⁵³ Padahal, tiap hari Kita ada pa ngoni pe tenga-tenga di Ruma Ibada Pusat, tapi ngoni tara tangka pa Kita di situ. Tapi biar suda. Skarang so dia pe waktu untuk ngoni mo tangka pa Kita, deng lagi so dia pe waktu untuk Iblis, setang-setang pe raja kase tunju dia pe kuasa galap.”

Petrus manyangkal pa Yesus

⁵⁴ Turus, orang-orang yang datang itu, dong tangka pa Yesus kong bawa kaluar dari situ. Dorang bawa pa Dia pigi di imam basar pe ruma, kong sementara itu, Petrus ada iko-iko dari jao.

⁵⁵ Di imam basar pe kintal pe tenga-tenga, orang-orang biking api kong dudu bakuliling di situ. Kong Petrus me dudu sama-sama deng dorang.

⁵⁶ Ada pembantu parampuang satu, dia lia pa Petrus yang ada dudu di dekat api itu. Dia perhatikan bae-bae pa Petrus, kong dia bilang pa orang-orang yang ada di situ, “Aa, dia itu me jaga sama-sama deng Yesus!”

⁵⁷ Tapi Petrus manyangkal, bilang tara kanal pa Yesus. Dia bilang, “Tarada me, kita tara kanal pa Dia!”

⁵⁸ Kong tara lama, ada satu orang laeng lia pa Petrus kong dia bilang, “Ngana me jaga baku bawa deng dong Yesus!” Tapi Petrus bilang, “Tarada, bukang kita itu!”

⁵⁹ Kong kira-kira dia pe satu jam brikut, ada satu orang laeng lagi basuara deng tegas. Dia bilang bagini, “Tara sala suda, dia ini suda yang jaga sama-sama deng Yesus, karna dia me orang Galilea.”

⁶⁰ Tapi Petrus manyangkal, dia bilang, “Bukang, kita tara tau apa ngana pe maksut bilang bagitu.” Kong waktu itu suda, langsung ayam bakuku.

⁶¹ Kong, Tuhan Yesus haga pa Petrus. Turus Petrus dapa inga yang Tuhan Yesus perna bilang pa dia, malam itu sebelum ayam bakuku, dia so manyangkal tiga kali, bilang dia tara kanal pa Yesus.

⁶² Pe inga itu, Petrus pigi kaluar dari kintal itu, kong dia manangis tahek-hek.

Orang-orang kase malu pa Yesus

⁶³ Kong orang-orang yang ada tahang pa Yesus, dorang mulai kase malu-malu pa Yesus. Dorang pukul pa Dia,

⁶⁴ dong ika Dia pe mata pake kaeng, turus tanya pa Dia, “Kalu Ngana butul-butul orang yang bawa Tuhan Allah pe pasáng, coba Ngana bilang, sapa yang pukul pa Ngana ini?”

⁶⁵ Ada banya lagi kata-kata yang dorang bilang untuk kase malu pa Dia.

Yesus dapa urus di Mahkama Agama

⁶⁶ Waktu masi pagi-pagi skali, tua-tua Yahudi, imam-imam kapala, deng guru-guru agama Yahudi yang ahli lima kitab Musa, dorang samua bakumpul untuk urus Yesus pe masala. Kumpulan itu pe nama Mahkama Agama. Kong ada yang bawa pa Yesus mangada pa dorang.

⁶⁷ Turus di situ, dorang tanya pa Dia, “Coba Ngana kase tau pa torang, apa butul Ngana ini Mesias, Raja yang Tuhan Allah janji dari dulu?” Yesus jawab, “Biar Kita kase tau pa ngoni, tapi pasti ngoni me akan tetap tara percaya.

⁶⁸ Deng biar Kita mo tanya pa ngoni, ngoni me tara akan mo jawab.

⁶⁹ Tapi mulai skarang ini, Anak Manusia yang dari sorga mo dudu di tampa yang terhormat, pa Tuhan Allah Yang Paling Berkuasa pe sabla kanan.”

⁷⁰ Pe dengar itu, dorang samua bilang, “Kalu bagitu, Ngana ini Anak Allah?” Yesus jawab pa dorang, “Ngoni sandiri yang bilang bagitu.”

⁷¹ Turus dorang bilang, “Torang so dengar Dia pe bicara sandiri, Dia so biking Dia pe diri sama deng Tuhan Allah! Jadi, torang so tara perlu cari saksi lagi!”