Kolose 2 - Perjanjian Baru Bahasa Melayu Maluku Utara

¹ Sudara-sudara yang percaya di kota Kolose, biar ngoni bolong perna baku dapa deng kita, tapi kita mau ngoni tau, kita butul-butul berusaha untuk bantu pa ngoni, pa orang-orang di kota Laodikia deng pa samua orang di tampa laeng yang bolong kanal pa kita.

² Kita berusaha karas la ngoni lebe tamba percaya pa Yesus deng lebe tamba baku sayang sampe ngoni jadi satu hati. Kita mau supaya ngoni butul-butul mangarti deng yakin, Tuhan Allah pe rahasia yang hebat. Rahasia itu tentang Yesus Kristus yang dari dulu Tuhan Allah tara kase tau pa orang-orang, tapi skarang ngoni so bole tau.

³ Barang, cuma deng percaya pa Yesus Kristus saja, torang bole dapa dua hal yang penting ini: torang bole tau banya hal, deng torang bole tau mana yang bae yang torang musti biking.

⁴ Kita tulis ini pa ngoni, supaya kalu ada orang yang kase ajar ajaran yang tara butul pa ngoni, biar itu menurut ngoni maso akal, tapi ngoni tara gampang taiko.

⁵ Barang, biar lagi kita tara sama-sama deng ngoni di sana, tapi kita tetap inga pa ngoni, jadi anggap saja kita ada sama-sama deng ngoni. Kita sanang lagi, dapa dengar ngoni so satu hati kong ngoni pe percaya tetap kuat pa Yesus Kristus.

Tetap hidup satu hati deng Tuhan

⁶ Sudara-sudara, ngoni so tarima pa Kristus Yesus jadi ngoni pe Tuhan, jadi ngoni musti tetap hidup satu hati deng Dia.

⁷ Ngoni pe percaya pa Dia musti kuat, sama deng pohong pe akar yang tatanam kuat di tana. Deng ngoni pe hidup musti bagantong kuat pa Dia, sama deng ruma yang ada bangun di atas fandasi yang kuat. Kong ngoni pe percaya pa Dia me musti lebe tamba kuat, iko sama deng ajaran yang ngoni so tarima. Kong ngoni musti salalu bilang tarimakasi banya pa Tuhan Allah.

⁸ Sudara-sudara, ngoni musti ati-ati, jang sampe ada orang yang pengaru pa ngoni untuk iko deng dong pe ajaran-ajaran agama yang tara butul. Dorang pe ajaran itu tara ada dia pe guna, karna bukang ajaran tentang Yesus Kristus. Tapi dorang pe ajaran itu dari dong pe orang tua dulu-dulu deng dari roh-roh yang berkuasa di dunia ini.

⁹ Inga, jang ngoni tapengaru deng dong pe ajaran yang sala itu, karna samua Tuhan Allah pe sifat deng kuasa ada pa Yesus Kristus pe diri.

¹⁰ Kong karna ngoni so satu hati deng Yesus Kristus, samua yang ngoni perlu, so ada pa Dia. Dia itu suda yang lebe berkuasa dari samua yang bapimpin deng dari samua kuasa yang ada di langit deng di bumi.

¹¹ Kita pe maksut, karna ngoni so satu hati deng Yesus Kristus, ngoni so jadi Dia pe umat. Ngoni jadi Dia pe umat bukang karna ngoni dapa sunat iko agama Yahudi pe aturan, tapi karna Yesus Kristus so kase bebas pa ngoni dari manusia pe mau yang jaga biking dosa.

¹² Waktu ngoni dapa baptis, itu sama deng ngoni so mati kong dapa kubur sama-sama deng Yesus Kristus, itu berarti, ngoni so kase tinggal ngoni pe hidup yang cuma iko manusia pe mau. Kong deng ngoni dapa baptis itu suda, itu sama deng ngoni so hidup ulang sama-sama deng Yesus Kristus, jadi ngoni pe hidup me so beruba jadi baru, karna ngoni percaya pa Tuhan Allah yang Dia pe kuasa hebat, yang so kase hidup ulang pa Yesus Kristus.

¹³ Dulu waktu ngoni bolong percaya pa Tuhan, ngoni jaga langgar Tuhan Allah pe parenta, jadi Tuhan Allah lia pa ngoni sama deng orang yang so mati. Ngoni me tara dapa sunat karna ngoni bukang orang Yahudi, jadi ngoni bukang Tuhan Allah pe umat. Tapi skarang, karna Yesus Kristus so mati deng so hidup ulang, Dia so kase ampun ngoni pe dosa-dosa deng so kase pa ngoni hidup yang baru.

¹⁴ Sebenarnya, torang pantas dapa hukum tapisa deng Tuhan Allah slama-lamanya karna torang so langgar Tuhan Allah pe parenta. Tapi waktu Yesus Kristus mati di kayu salib, Tuhan Allah kase ampun torang pe dosa-dosa. Itu bole kase sama deng Dia hapus torang pe utang dari buku utang.

¹⁵ Kong waktu Yesus Kristus mati di kayu salib itu, Dia so kase kala pa samua kuasa jahat yang berkuasa, supaya Tuhan Allah kase tunju pa samua orang, Dia itu yang menang.

¹⁶ Jadi sudara-sudara, dari apa yang kita baru bilang tadi, jang ada orang yang kase sala pa ngoni tentang apa yang ngoni makang deng minum. Deng jang kase biar dong kase sala pa ngoni karna ngoni tara iko agama Yahudi pe hari-hari raya, deng acara-acara di tiap bulan baru. Jang dong kase sala pa ngoni karna ngoni tara iko dong pe aturan hari Sabat, hari yang orang agama Yahudi tara bole bakarja. Dengar e, jang ngoni pusing deng dong pe bicara itu!

¹⁷ Aturan-aturan agama Yahudi itu cuma sementara, kong aturan-aturan itu pe maksut untuk kase inga pa dorang tentang apa yang penting yang dong tunggu-tunggu itu. Kong yang dong tunggu-tunggu itu so datang, Yesus Kristus, Dia itu yang lebe penting.

¹⁸ Jadi jang ngoni dengar pa orang-orang yang bilang kata, Tuhan Allah mo hukum pa ngoni karna ngoni tara iko dorang pe aturan agama. Dorang bapuasa banya-banya supaya orang lia kata, dorang hebat kong suru ngoni iko. Deng dorang suru pa ngoni semba pa malaekat-malaekat. Dorang suka bicara sombong tentang dong pe penglihatan-penglihatan yang dong dapa dari Tuhan. Dorang jaga kase sombong deng dong pe diri, itu karna yang dorang biking itu cuma iko manusia pe pikiran.

¹⁹ Orang-orang macam bagitu so tara butul-butul lagi iko pa Yesus Kristus. Padahal Yesus Kristus itu Kapala dari samua Dia pe umat. Dia yang biking pa torang jadi satu, deng supaya torang pe percaya pa Tuhan lebe tamba kuat. Ini bole kase sama deng kapala deng badan yang jadi satu karna ada sendi-sendi yang tara biking tapisa satu deng yang laeng.

²⁰ Sudara-sudara, ngoni so jadi satu hati deng Yesus Kristus jadi ngoni pe hidup yang lama sama deng so mati sama-sama deng Dia, sampe ngoni so bebas dari roh-roh yang berkuasa di dunia ini. Jadi bikiapa kong ngoni masi suka iko aturan-aturan di dunia yang macam bagini:

²¹ “Jang pegang ini”, “Jang makang itu”, “Jang sontong ini”.

²² Tara usa iko suda! Aturan-aturan itu manusia anggap penting jadi suru orang iko, padahal aturan-aturan itu cuma tentang makang deng minum yang tara tahang lama, abis makang deng minum, so abis suda.

²³ Memang aturan-aturan itu dapa lia bae karna orang yang iko aturan itu dapa lia hebat kata. Dorang iko aturan-aturan yang biking orang bilang dong tara sombong, kong biking siksa diri sandiri supaya dapa puji. Padahal sebenarnya aturan-aturan itu tarada dia pe guna, karna tara biking orang beruba jadi bae. Dorang masi suka kase puas dorang pe diri iko manusia pe mau yang suka biking dosa.