Kolose 1 - Perjanjian Baru Bahasa Melayu Maluku Utara

Paulus pe salam

¹ Surat ini dari kita Paulus. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau. Surat ini me dari torang pe sudara Timotius yang sama-sama percaya pa Kristus Yesus.

² Salam untuk ngoni sudara-sudara yang percaya pa Kristus Yesus di kota Kolose, ngoni yang so jadi Tuhan Allah pe umat deng yang setia pa Kristus Yesus. Torang minta pa Tuhan Allah, torang samua pe Bapa, supaya kase yang bae pa ngoni, deng salalu biking ngoni pe hati tetap tenang.

Doa tarimakasi

³ Tiap kali torang berdoa untuk ngoni, torang salalu bilang tarimakasi pa Tuhan Allah, torang pe Tuhan Yesus Kristus pe Bapa.

⁴ Barang, torang so dengar tentang ngoni pe percaya pa Kristus Yesus deng tentang ngoni pe sayang pa samua orang yang so jadi Tuhan Allah pe umat.

⁵ Ngoni percaya deng sayang macam bagitu, barang ngoni so yakin, ngoni akan tarima apa yang Tuhan Allah so kase sadia untuk ngoni di sorga. Ngoni jadi yakin itu, mulai dari pertama kali ngoni dengar ajaran yang butul, itu Kabar Bae tentang Yesus Kristus.

⁶ Kong Kabar Bae yang datang pa ngoni itu so tasiar di seluru dunia, sampe banya orang so percaya pa Tuhan kong dong pe hidup beruba. Bagitu lagi yang jadi pa ngoni waktu ngoni mulai dengar Kabar Bae itu kong mangarti butul Tuhan Allah pe bae pa manusia.

⁷ Kabar Bae tentang Yesus Kristus itu ngoni so dengar dari Epafras. Dia itu torang pe tamang karja yang torang sayang. Dia rajin biking apa yang Yesus Kristus suru untuk kase kuat ngoni pe percaya.

⁸ Epafras itu lagi yang kase carita pa torang, ngoni samua salalu baku sayang karna Roh Kudus ada di ngoni pe hati.

⁹ Jadi, mulai dari torang dengar tentang ngoni pe percaya itu, torang tara berenti-berenti berdoa untuk ngoni. Torang minta pa Tuhan Allah, supaya Dia pe Roh Kudus buka ngoni pe pikiran deng biking ngoni lebe mangarti tentang Tuhan Allah, supaya ngoni butul-butul tau Dia pe mau.

¹⁰ Barang, kalu ngoni so tau Tuhan Allah pe mau, ngoni akan hidup deng kalakuang yang pantas dapa sebut orang yang percaya pa Tuhan, kong ngoni akan biking Dia pe hati sanang. Ngoni me akan biking hal-hal yang bae turus-turus, deng ngoni me akan lebe tamba kanal pa Tuhan Allah.

¹¹ Kita minta lagi pa Tuhan Allah supaya Dia kase kuat ngoni pe hati deng Dia pe kuasa yang luar biasa itu, la biar apa saja yang ngoni hadapi, ngoni tetap percaya, ngoni tetap sabar deng ngoni pe hati tetap sanang.

¹² Deng kita minta lagi supaya ngoni salalu bilang tarimakasi banya pa Dia, torang pe Bapa. Bapa itu suda yang biking ngoni jadi pantas mo dapa apa yang Dia so janji pa orang-orang yang so jadi Dia pe umat. Kong janji itu, Dia so sadia untuk Dia pe umat di tampa yang tarang, tampa yang Dia Berkuasa sebagai Raja.

¹³ Tuhan Allah so kase bebas pa torang dari Iblis pe kuasa galap, kong so kase pinda pa torang di tarang, supaya Dia pe Anak yang Dia sayang Berkuasa sebagai Raja pa torang.

¹⁴ Dia pe Anak itu suda yang so tebus pa torang kong so kase ampun pa torang dari torang pe dosa-dosa.

Yesus Kristus itu yang paling berkuasa dari samua-samua

¹⁵ Sudara-sudara, tara ada orang yang bisa lia pa Tuhan Allah, tapi waktu torang lia pa Yesus Kristus, itu sama saja deng torang so lia pa Tuhan Allah kong so tau Dia pe sifat deng kuasa. Waktu langit deng bumi bolong jadi, Yesus Kristus so lebe kamuka ada. Kong Yesus Kristus itu yang paling berkuasa dari samua yang Tuhan Allah so cipta.

¹⁶ Karna deng Yesus Kristus itu suda, Tuhan Allah cipta samua-samua, yang ada di sorga deng di bumi, samua yang orang bisa lia deng yang tara bisa lia, termasuk samua yang bapimpin deng yang berkuasa di udara. Dia cipta samua-samua itu sama-sama deng Yesus Kristus, supaya Yesus Kristus dapa puji.

¹⁷ Waktu samua-samua itu bolong ada, Yesus Kristus so ada, kong Dia yang ator deng jaga samua-samua itu.

¹⁸ Yesus Kristus itu suda pemimpin yang ator Dia pe jemaat, sama deng kapala ator dia pe badan. Dia itu suda yang kamuka hidup ulang dari samua orang yang perna mati, jadi Dia yang paling penting dari samua yang ada.

¹⁹ Barang, Tuhan Allah mau supaya samua Dia pe sifat deng kuasa ada pa Yesus Kristus pe diri.

²⁰ Kong deng Yesus Kristus itu lagi, Tuhan Allah biking supaya samua yang ada di bumi deng di sorga pe hubungan bole bae-bae ulang deng Dia. Hubungan deng Tuhan Allah itu jadi bae-bae ulang, karna Yesus Kristus pe dara yang tatumpa di kayu salib.

²¹ Dulu, waktu ngoni bolong percaya pa Tuhan Yesus, ngoni hidup jao dari Tuhan Allah. Waktu itu ngoni pe pikiran deng kalakuang jahat sampe ngoni biking Tuhan Allah jadi ngoni pe musu.

²² Tapi skarang, Tuhan Allah biking supaya ngoni pe hubungan bole bae-bae ulang deng Dia, karna Yesus Kristus so mati di kayu salib. Dia mati itu, supaya di Dia pe muka, ngoni jadi orang yang bersi dari dosa, tara sala apa-apa, kong tarada orang yang bisa kase sala pa ngoni.

²³ Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Paulus tetap kase tau Kabar Bae biar dia dapa siksa

²⁴ Skarang ini kita pe hati sanang saja, karna siksa yang kita dapa waktu kase tau Kabar Bae tentang Yesus Kristus, itu untuk ngoni pe bae. Siksa itu memang musti kita rasa, karna kita karja untuk Yesus Kristus. Deng kalu kita dapa siksa, itu sama saja deng kita ambe bagian dalam siksa yang Yesus Kristus rasa untuk tolong Dia pe jemaat. Jemaat itu sama deng Dia pe badan sandiri.

²⁵ Tuhan Allah pili pa kita untuk biking apa yang Dia suru untuk layani Dia pe jemaat. Dia kase tugas pa kita la kase tau samua Dia pe firman pa ngoni orang-orang bukang Yahudi.

²⁶ Kita pe maksut, firman yang orang tua dulu-dulu bolong mangarti, skarang Tuhan Allah so kase mangarti itu pa orang-orang yang so jadi Dia pe umat.

²⁷ Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

²⁸ Jadi, kamana saja torang pigi, Yesus Kristus itu saja yang torang kase tau pa tiap-tiap orang. Torang jaga kase inga deng kase ajar pa dorang, pake hikmat yang Tuhan Allah kase pa torang, supaya pa Tuhan Allah pe muka, tiap-tiap orang itu butul-butul percaya pa Yesus Kristus.

²⁹ Karna itu, kita berusaha sunggu-sunggu biking kita pe karja ini pake kekuatan yang luar biasa, yang Yesus Kristus kase pa kita.