Kisah Para Rasul 24 - Perjanjian Baru Bahasa Melayu Maluku Utara

Pemimpin Yahudi tudu pa Paulus

¹ Waktu Paulus so dapa tahang lima hari, pemimpin-pemimpin Yahudi yang tudu pa Paulus itu datang di Kaisarea. Dorang itu: imam basar Ananias, tua-tua Yahudi deng satu orang yang pe nama Tertulus. Tertulus ini ahli hukum, dong pake pa dia jadi dong pe juru bicara la tudu pa Paulus. Dorang samua itu mangada pa gubernur Feliks la mo kase tau apa yang dorang mo tudu pa Paulus.

² Turus, gubernur suru bawa pa Paulus di tampa urus perkara. Bagitu Paulus so sampe di situ, Tertulus mulai bilang bagini, “Bapa gubernur yang torang hormati. Bapa jadi gubernur di sini so lama skali, kong torang pe hidup jadi aman. Deng, bapa itu pande sampe bapa bole biking torang pe daera ini jadi bagus.

³ Itu samua torang bisa lia di tampa-tampa mana saja yang torang pigi. Torang tau itu ada, karna bapa gubernur pe usaha. Untuk samua itu, torang bilang tarimakasi banya pa bapa.

⁴ Kong supaya tara buang-buang bapa pe waktu, kita minta bapa dengar sadiki yang torang bilang ini.

⁵ Bagini bapa gubernur. Torang so lia deng mata kapala sandiri, orang ini bahaya. Di mana saja dia pigi, dia tukang kase kaco pa orang-orang Yahudi. Dia itu pemimpin dari aliran yang orang jaga bilang aliran Nasrani.

⁶ Dia me so coba biking Ruma Ibada Pusat tara suci lagi. Jadi, torang tangka pa dia kong mo urus pa dia iko torang orang Yahudi pe aturan agama.

⁷ Tapi komandan Roma Lisias datang ambe pa dia dari torang deng cara kasar.

⁸ Deng dia bilang, kalu torang mo tuntut pa Paulus, torang musti mangada pa bapa. Jadi kalu bapa urus dia pe perkara, bapa akan tau samua yang torang tudu pa dia itu butul.”

⁹ Pe abis Tertulus bilang bagitu, orang-orang Yahudi laeng me bilang, yang Tertulus so bilang itu memang butul.

Paulus babela dia pe diri di gubernur Feliks

¹⁰ Abis itu, gubernur Feliks kase kode pa Paulus la Paulus bole bicara. Paulus bilang bagini, “Bapa gubernur, kita tau, so deng taong-taong bapa salalu urus torang bangsa Yahudi pe perkara. Jadi kita sanang bisa mo bela kita pe diri pa bapa gubernur pe muka.

¹¹ Bagini bapa, baru dua blas hari yang lalu, kita pigi basambayang di Yerusalem. Kalu bapa tara percaya, bapa bisa tanya pa orang-orang.

¹² Orang-orang Yahudi tara perna lia kita baku ambe deng orang laeng di Ruma Ibada Pusat. Dorang me tara perna lia kita biking kaco di ruma-ruma ibada agama Yahudi atau di tampa-tampa laeng di dalam kota.

¹³ Kong skarang dorang tudu macam-macam pa kita, padahal yang dorang lapor pa bapa tadi tara ada dia pe bukti.

¹⁴ Tapi biar bagitu me, kita mo bilang satu barang pa bapa. Kita jaga semba pa Tuhan Allah yang torang orang Yahudi pe orang tua dulu-dulu jaga semba. Kita semba pa Tuhan Allah itu iko ajaran yang Tuhan Yesus kase ajar, yang orang Yahudi laeng jaga bilang itu aliran yang tara butul. Padahal, sama deng dorang, kita percaya samua yang ada tatulis di lima kitab Musa deng di kitab yang nabi-nabi laeng tulis.

¹⁵ Kong kita lagi sama deng dorang, kita percaya deng yakin pa Tuhan Allah, nanti samua orang yang so mati mo hidup ulang, biar dia itu orang yang hidup butul pa Tuhan Allah pe muka, deng yang tara hidup butul pa Tuhan Allah pe muka.

¹⁶ Kong karna kita percaya deng yakin bagitu, kita salalu berusaha hidup deng hati bersi pa Tuhan Allah pe muka deng pa manusia.

¹⁷ Sebenarnya so babarapa taong kita so tara pigi-pigi di Yerusalem. Tapi yang kita pigi baru-baru itu, kita mo antar doi sumbangan pa orang-orang Yahudi yang hidup susa deng mo kase binatang jadi korban persembahan pa Tuhan Allah di Ruma Ibada Pusat.

¹⁸ Waktu kita ada biking samua itu di Ruma Ibada Pusat, tara banya orang yang sama-sama deng kita, deng kita me tara baribut. Kong waktu kita baru abis ‘biking bersi diri’ iko aturan agama Yahudi, babarapa orang Yahudi dari daera Asia Kecil datang di situ.

¹⁹ Sebenarnya, dorang itu yang musti datang kamari kong bilang pa bapa kita pe sala. Itu me kalu kita ada sala waktu itu.

²⁰ Atau lebe bae tanya suda pa dorang ini, apa kita pe sala. Tuhari waktu dorang ada urus pa kita di Mahkama Agama, dorang tara dapa kase tunju kita sala.

²¹ Atau mangkali dorang anggap kita sala, barang waktu kita ada di dorang pe muka, kita bilang deng suara yang kuat bagini, ‘Kita dapa urus skarang, barang kita yakin, Tuhan Allah mo kase hidup ulang pa orang-orang yang so mati.’ ”

²² Tapi, gubernur Feliks yang so tau banya ajaran tentang Yesus Kristus, dia tunda perkara itu. Dia bilang, “Nanti komandan batalion Lisias so sampe di sini, baru kita mo ambe keputusan tentang ngoni pe perkara ini.”

²³ Abis bilang bagitu, gubernur suru pa dia pe komandan kompi tahang pa Paulus, tapi kase bebas sadiki pa dia. Paulus pe tamang-tamang me bole datang balia pa dia kong kase sadia dia pe keperluan.

Paulus kase tau tentang Yesus Kristus pa gubernur Feliks deng dia pe bini

²⁴ Waktu so lewat babarapa hari, gubernur Feliks bale ulang di Kaisarea, sama-sama deng dia pe bini, Drusila. Dia pe bini itu orang Yahudi. Kong Feliks suru orang pangge pa Paulus. Waktu Paulus so di situ, dia bilang pa Feliks tentang bagimana supaya orang bole percaya pa Yesus Kristus.

²⁵ Paulus me bicara tentang bagimana supaya orang mo hidup butul pa Tuhan pe muka, tentang bagimana mo jaga diri la tara biking dosa, deng tentang hari kiamat, waktu Tuhan mo adili pa samua orang. Pe dengar itu, gubernur Feliks jadi tako kong bilang, “So bole dulu, kong pigi suda skarang. Nanti kalu ada waktu, baru kita mo pangge ulang pa ngana.”

²⁶ Gubernur Feliks bilang bagitu, barang dia baharap Paulus mo kase doi pa dia, la Paulus dapa kase bebas. Jadi dia jaga pangge pa Paulus la bacarita deng dia.

²⁷ Pe lewat dua taong, gubernur Feliks pe masa karja abis. Kong yang ganti pa dia jadi gubernur itu, Perkius Festus. Tapi Feliks kase biar pa Paulus di penjara, barang dia mo ambe hati pa orang-orang Yahudi.