Kisah Para Rasul 22 - Perjanjian Baru Bahasa Melayu Maluku Utara

Paulus babela dia pe diri

¹ “Bapa-bapa deng sudara-sudara, coba ngoni dengar dulu yang kita mo bilang ini untuk babela kita pe diri!”

² Waktu dorang dengar Paulus bicara pake bahasa Ibrani sama deng dorang, dorang jadi lebe tenang. Kong Paulus bilang lagi pa dorang,

³ “Kita ini orang Yahudi. Kita lahir di Tarsus di daera Kilikia, tapi basar di kota Yerusalem ini. Kita pe guru agama pa bapa Gamaliel. Dia ajar bae-bae pa kita aturan-aturan di lima kitab Musa yang torang pe orang tua dulu-dulu tarima. Kita berusaha skali iko Tuhan Allah pe mau, sama deng ngoni samua skarang ini.

⁴ Kong dulu itu, waktu kita dapa tau ada orang-orang yang iko ajaran tentang Yesus, kita siksa pa dorang sampe ada yang mati. Laki-laki deng parampuang kita tangka kong kase maso di penjara.

⁵ Imam basar deng samua pemimpin yang laeng di Mahkama Agama bisa jadi saksi, samua yang kita bilang itu butul. Dorang sandiri yang kase surat-surat kuasa pa kita yang kita bawa pa torang pe sudara-sudara orang Yahudi di Damsyik. Surat-surat itu yang kase kuasa pa kita la kita bole tangka pa orang-orang di kota Damsyik yang jaga iko Yesus pe ajaran, kong bawa pa dorang di Yerusalem la hukum pa dorang.

⁶ Turus kita pigi di Damsyik la mo biking samua itu. Tapi kira-kira tenga hari, waktu kita so mo sampe di sana, kage-kage ada cahaya tarang skali dari langit basinar kuliling pa kita.

⁷ Kita langsung jatu di tana. Turus kita dengar ada suara dari langit bilang bagini, ‘Saulus, Saulus, bikiapa kong ngana siksa pa Kita?’

⁸ Kong kita tanya, ‘Sapa ini kong?’ Suara itu bilang, ‘Kita Yesus, orang Nazaret yang ngana jaga siksa.’

⁹ Orang-orang yang sama-sama deng kita waktu itu, dorang me dapa lia cahaya itu, tapi suara yang bicara pa kita itu dorang tara mangarti.

¹⁰ Kong kita batanya, ‘Tuhan, apa yang musti kita biking?’ Tuhan bilang, ‘Badiri suda la pigi di Damsyik. Di sana ada yang mo kase tau samua tugas yang Tuhan Allah suru ngana biking.’

¹¹ Waktu itu, kita so jadi buta, barang cahaya yang tarang skali itu kanal pa kita pe mata. Jadi, kita pe tamang-tamang pegang kita pe tangan kong tunda pa kita sampe di kota Damsyik.

¹² Di Damsyik, ada satu orang yang pe nama Ananias. Dia rajin iko aturan-aturan di lima kitab Musa. Samua orang Yahudi yang ada di situ tau dia itu orang bae-bae.

¹³ Dia datang badekat di kita pe pinggir kong bilang bagini, ‘Saulus, kita pe sudara yang sama-sama percaya, ngana sembu suda kong lia ulang!’ Waktu itu suda, kita langsung bisa dapa lia lagi, turus kita haga pa dia.

¹⁴ Abis itu, Ananias bilang pa kita bagini, ‘Tuhan Allah yang torang orang Yahudi pe orang tua dulu-dulu jaga semba, Dia itu so pili pa ngana supaya ngana tau Dia pe mau. Dia me pili pa ngana supaya ngana lia pa Orang yang Butul itu, deng supaya ngana dengar Dia pe suara.

¹⁵ Barang, ngana yang mo jadi Dia pe saksi untuk kase tau pa samua orang apa yang ngana so lia deng dengar.

¹⁶ Skarang, jang tunggu lama! Badiri suda, kong kase ngana pe diri dapa baptis, minta pa Tuhan supaya Dia kase ampun ngana pe dosa-dosa.’

¹⁷ Abis itu, kita bale di Yerusalem kong berdoa di Ruma Ibada Pusat. Tuhan Allah kase pa kita penglihatan

¹⁸ sampe kita dapa lia langsung pa Tuhan Yesus. Di situ Tuhan Yesus bilang pa kita, ‘Capat kase tinggal kota Yerusalem ini, barang orang-orang di sini tara mo tarima apa yang ngana kase tau tentang Kita.’

¹⁹ Kita bilang, ‘Tapi Tuhan, orang-orang di sini tau, bolong lama ini kita jaga kaluar maso di ruma-ruma ibada agama Yahudi untuk tangka pa orang-orang Yahudi yang percaya pa Tuhan Yesus, kita pukul pa dorang, deng kase maso pa dong di dalam penjara.

²⁰ Dorang me tau lagi, waktu dorang kase mati pa Stefanus, Tuhan pe saksi, kita ada di situ kong kita me setuju deng yang dorang biking itu. Kita lagi yang jaga dorang pe baju waktu dorang bunu pa Stefanus.’

²¹ Tapi Tuhan bilang pa kita, ‘Pigi suda, barang Kita mo utus pa ngana pigi jao dari sini untuk kase tau tentang Kita pa orang-orang yang bukang Yahudi la dorang percaya.’ ”

²² Orang-orang Yahudi yang di situ, dorang dengar turus Paulus babicara, tapi waktu Paulus bilang Tuhan Allah so utus pa dia pigi pa orang yang bukang Yahudi, orang-orang Yahudi di situ dorang mara kong bataria, “Orang ini tara pantas hidup di dunia ini. Tong bunu saja pa dia!”

Paulus kase tau, dia itu warga negara Roma

²³ Orang-orang Yahudi di situ turus-turus bataria deng dong kase lempar kasana-kamari dorang pe juba, deng dorang lagi kase ambur abu ka atas, barang dong mara skali.

²⁴ Pe lia bagitu, komandan batalion Roma suru bawa pa Paulus di markas. Di situ, komandan itu mo cari tau, apa dia pe alasan sampe orang banya itu babataria pa Paulus. Jadi dia suru pukul pa Paulus deng tali yang ada barang tajam di dia pe ujung, kong tanya-tanya pa Paulus.

²⁵ Tapi waktu dorang ika pa Paulus la mo pukul pa dia, dia bilang pa komandan kompi yang badiri di situ, “Komandan, kalu orang warga negara Roma dapa tudu kong bolong urus dia pe perkara, pemerinta Roma pe aturan kase ijin pukul pa dia ka tarada?”

²⁶ Pe dengar Paulus bilang bagitu, komandan kompi itu langsung pigi kase tau pa dia pe komandan batalion. Dia bilang bagini, “Ado bapa, orang itu orang warga negara Roma. Jadi, torang tara bisa pukul pa dia, to?”

²⁷ Pe dengar bagitu, komandan batalion itu pigi pa Paulus kong tanya pa dia, “Coba ngana bilang kamari, butul, ngana warga negara Roma?” Paulus jawab, “Butul, bapa.”

²⁸ Komandan batalion itu bilang, “Kita me warga negara Roma tapi kita ada bayar mahal pa pemerinta sampe kita resmi jadi warga negara Roma.” Paulus bilang, “Kalu kita, dari lahir so jadi warga negara Roma.”

²⁹ Waktu dorang dengar Paulus itu warga negara Roma, orang-orang yang mo pukul deng tanya-tanya pa dia, langsung baundur. Kong komandan batalion itu jadi tako, barang dia yang suru ika pa Paulus.

Paulus dapa urus di Mahkama Agama

³⁰ Dia pe beso, komandan batalion itu mo cari tau pasti, bikiapa sampe orang-orang Yahudi tudu pa Paulus. Jadi dia suru ambe pa Paulus di penjara, turus dia parenta pa imam-imam kapala deng samua pemimpin yang laeng bakumpul. Dorang yang dapa suru bakumpul itu dari kumpulan agama Yahudi yang paling tinggi yang pe nama Mahkama Agama. Komandan batalion itu suru bawa pa Paulus dari markas kong kase mangada pa Mahkama Agama itu.