Kisah Para Rasul 20 - Perjanjian Baru Bahasa Melayu Maluku Utara

Paulus bale ulang di daera Makedonia deng Yunani

¹ Pe abis kaco di kota Efesus itu, Paulus pangge pa orang-orang percaya yang ada di situ, kong kase nasehat yang biking kuat dorang pe percaya pa Tuhan Yesus. Abis itu, dia basiloloa kong pigi di daera Makedonia.

² Di daera Makedonia, dia basingga-singga pa orang-orang percaya di kampong-kampong, kong kase banya nasehat pa dorang la dorang pe percaya lebe tamba kuat. Abis dari Makedonia, dia pigi di daera Yunani.

³ Paulus tinggal di situ selama tiga bulan. Abis itu, dia basadia mo balayar pigi di daera Siria. Tapi waktu dia mo nae di kapal, dia dengar, orang-orang Yahudi ada rencana mo bunu pa dia. Karna itu, dia tara jadi nae kapal tapi dia bale bajalang kaki iko Makedonia.

⁴ Ada babarapa orang yang iko pa Paulus. Dorang itu: Sopater dari kota Berea (dia itu Pirus pe ana), Aristarkhus deng Sekundus dari kota Tesalonika, Gayus dari kota Derbe, Timotius, deng dua orang dari daera Asia Kecil yang pe nama Tikhikus deng Trofimus.

⁵ Dorang tuju orang itu barangkat kamuka kong tunggu pa torang di Troas.

⁶ Torang bajalang sampe di kota Filipi di daera Makedonia. Bagitu so abis hari raya Roti Tara Pake Ragi, torang balayar dari Filipi lima hari baru sampe di kota Troas. Di Troas, torang bagabung deng orang-orang yang pigi lebe kamuka, kong tinggal di sana selama tuju hari.

Paulus kase hidup ulang pa ana muda satu di kota Troas

⁷ Hari pertama di minggu itu, torang deng orang-orang percaya yang laeng bakumpul biking perjamuan. Di situ, Paulus bicara lama pa orang-orang percaya itu sampe tenga malam, barang dia pe beso dia so mo barangkat.

⁸ Torang ada bakumpul di satu ruang atas di tingkat tiga, kong di situ ada banya lentera yang manyala.

⁹ Kong ada ana muda satu yang pe nama Eutikhus, dia me dengar Paulus bicara tapi dia dudu di jendela. Kong, karna Paulus bicara lama skali, ana muda itu jadi manganto, lama-lama dia tasono kong jatu dari tingkat tiga itu. Waktu dorang angka pa dia, dia so mati.

¹⁰ Jadi Paulus turung ka bawa, dia bapalaka kong polo pa ana muda itu, turus bilang pa orang-orang di situ, “Tara usa ngoni tako, dia so hidup ulang!”

¹¹ Waktu samua orang so bale ka atas, Paulus pela-pela roti la dorang makang sama-sama. Kong dia bacarita deng dorang sampe pagi. Abis itu, dia kase tinggal kota Troas.

¹² Orang-orang yang masi di situ antar pa ana muda yang so hidup ulang itu pa dia pe ruma, kong dorang samua sanang skali.

Paulus deng dia pe tamang-tamang balayar dari kota Troas pigi di kota Miletus

¹³ Abis itu, torang deng Paulus baku pisa jalang. Torang nae kapal, tapi Paulus bajalang kaki. Nanti di Asos, baru Paulus nae kapal sama-sama deng torang.

¹⁴ Waktu torang baku dapa deng Paulus di Asos, dia deng torang sama-sama nae kapal untuk balayar pigi di kota Metilene.

¹⁵ Dari Metilene, torang balayar turus, kong dia pe beso, torang sampe di muka pulo Kios. Pe lusa, torang sampe di pulo Samos, kong pe tula, torang sampe di kota Miletus.

¹⁶ Paulus suka mo capat-capat sampe di kota Yerusalem, barang dia rencana baku riki deng orang Yahudi pe hari raya Pentakosta di Yerusalem. Karna itu, dia tara basingga di kota Efesus, supaya dia pe waktu tara tabuang di daera Asia Kecil.

Paulus babicara deng penatua-penatua dari kota Efesus

¹⁷ Waktu Paulus di kota Miletus, dia suru orang pigi di kota Efesus la pangge pa penatua-penatua jemaat di situ supaya dorang datang baku dapa deng dia di Miletus.

¹⁸ Waktu dorang so datang di Miletus, Paulus bilang pa dorang bagini, “Sudara-sudara, ngoni samua tau bagimana kita pe hidup, mulai kita datang di daera Asia Kecil ini sampe skarang.

¹⁹ Ngoni tau, kita bakarja untuk Tuhan deng hati yang tara sombong, mala banya kali kita karja deng mamanangis. Kita me dapa banya cobaan dari orang-orang Yahudi yang baku skongkol mo bunu pa kita.

²⁰ Biar bagitu me, kita tetap kase tau deng kase ajar Tuhan pe mau pa ngoni di orang banya pe muka deng dari ruma ka ruma. Kita tolong bagitu pa ngoni la ngoni pe percaya tamba kuat.

²¹ Kita salalu kase inga deng karas pa orang-orang Yahudi deng pa orang-orang bukang Yahudi, supaya dorang bertobat kong iko pa Tuhan Allah deng percaya pa Tuhan Yesus, torang pe Tuhan.

²² Skarang kita mo pigi di Yerusalem, karna Roh Kudus so parenta pa kita pigi ka sana. Di sana, kita tara tau apa yang mo jadi pa kita.

²³ Tapi yang kita tau, di tiap-tiap kota yang kita so sampe, Roh Kudus salalu kase tau pa kita, kita mo dapa siksa deng mo dapa kase maso di penjara di Yerusalem.

²⁴ Biar bagitu, kita tara peduli deng kita pe hidup, tapi yang penting kita bisa kase selesai tugas yang Tuhan Yesus suru kita biking. Kita pe tugas itu, kita musti kase tau Kabar Bae tentang Tuhan Allah pe bae pa torang manusia.

²⁵ Ngoni yang kita so kase tau tentang bagimana mo jadi Tuhan Allah pe umat, skarang kita so tau, ngoni akan so tara lia pa kita lagi.

²⁶ Jadi, kita bilang pa ngoni skarang, kalu nanti dari ngoni ada yang mati tapi bolong percaya pa Tuhan Yesus, itu bukang kita pe sala.

²⁷ Barang, kita so salalu kase tau samua Tuhan Allah pe rencana pa ngoni.

²⁸ Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.

²⁹ Kita tau kalu kita so kase tinggal pa ngoni nanti, ada orang-orang yang dong pe sifat sama deng anjing utang yang jahat mo maso pa ngoni pe tenga-tenga, kong dorang berusaha mo kase ancor jemaat yang ngoni jaga itu.

³⁰ Mala dari ngoni sandiri nanti ada yang mo ajar ajaran yang tara butul supaya orang-orang yang percaya pa Tuhan Yesus jadi tara percaya lagi kong iko pa dorang.

³¹ Jadi, ngoni musti jaga bae-bae, deng jang lupa, selama tiga taong, siang deng malam kita tara berenti-berenti kase nasehat pa ngoni, sampe kita pe aer mata me malele.

³² Jadi skarang, kita minta Tuhan Allah jaga pa ngoni deng bantu ngoni inga turus Dia pe firman tentang Dia pe bae pa ngoni. Firman itu yang bisa kase kuat ngoni pe percaya, deng yang nanti mo kase pa ngoni samua yang Dia so janji mo kase pa orang-orang yang Dia so biking jadi Dia pe umat sandiri.

³³ Dalam kita pe hidup ini, kita tara perna ingin doi, biar itu doi mas atau doi perak. Deng kita tara perna ingin baju dari sapa saja.

³⁴ Tapi ngoni sandiri so tau, kita bakarja deng kita pe tangan sandiri biking tenda, sampe kita bisa kase hidup kita pe diri deng kita pe tamang-tamang yang jaga iko pa kita.

³⁵ Deng karja karas bagitu, kita so kase conto pa ngoni la ngoni me karja karas untuk bantu pa orang-orang yang tara mampo. Torang musti inga yang Tuhan Yesus so bilang, karna Dia sandiri yang bilang, ‘Kalu torang dapa apa-apa dari orang, torang pasti sanang, tapi yang lebe sanang itu torang yang bakase apa-apa pa orang laeng.’ ”

³⁶ Pe abis Paulus bicara bagitu, dia berlutut kong berdoa sama-sama deng dorang samua.

³⁷ Dorang samua manangis, kong polo deng ciom ulang-ulang pa Paulus.

³⁸ Dong pe hati sedi skali, lebe-lebe lagi karna Paulus bilang, dorang so tara akan baku dapa deng dia lagi. Abis itu, dorang antar pa dia di kapal.