Kisah Para Rasul 10 - Perjanjian Baru Bahasa Melayu Maluku Utara

Kornelius dapa penglihatan dari Tuhan Allah

¹ Ada laki-laki satu di Kaisarea, dia pe nama Kornelius. Dia itu komandan kompi Roma yang dia pe pasukan pe nama pasukan Italia.

² Dia ini rajin iko Tuhan Allah pe mau. Dia deng dia pe keluarga jaga semba pa Tuhan Allah. Dia jaga bantu pa orang-orang Yahudi yang susa deng dia me rajin berdoa pa Tuhan Allah.

³ Satu kali, kira-kira jam tiga sore waktu agama Yahudi pe jam berdoa, Kornelius dapa penglihatan. Waktu itu, dia lia Tuhan Allah pe malaekat datang kong pangge pa dia, “Kornelius!”

⁴ Kornelius haga pa malaekat itu deng rasa tako skali, kong dia bilang, “Ada apa bapa?” Malaekat itu bilang pa dia, “Tuhan Allah so dengar ngana pe doa, deng Dia so lia samua yang ngana so bantu pa orang-orang susa. Tuhan Allah tetap inga yang ngana so biking itu.

⁵ Skarang, ngana suru suda babarapa orang pigi di Yope supaya dorang ka sana ambe pa Simon, yang orang biasa pangge pa dia Petrus.

⁶ Skarang dia tinggal pa satu orang pe ruma, dia itu me pe nama Simon. Dia pe ruma di pinggir pante, kong dia pe karja tukang kase bersi binatang pe kuli.”

⁷ Abis bilang bagitu, malaekat itu langsung kase tinggal pa Kornelius. Turus Kornelius pangge pa dia pe orang karja dua orang deng tentara satu yang jaga kawal pa dia. Tentara itu me jaga iko Tuhan Allah pe mau.

⁸ Kornelius kase tau dia pe penglihatan pa dorang. Turus, dia suru pa dorang pigi di kota Yope la ambe pa Petrus.

Petrus dapa penglihatan kong pigi pa Kornelius pe ruma

⁹ Dia pe beso kira-kira tenga hari, tiga orang itu so dekat di kota Yope. Waktu itu Petrus nae di atas ruma la mo berdoa.

¹⁰ Di situ, dia so lapar kong ingin makang, tapi makanang masi sementara kase siap. Kage-kage dia dapa penglihatan.

¹¹ Dia dapa lia langit tabalá kong ada satu barang sama deng kaeng basar turung dari langit sampe di tana. Barang yang ada kase turung itu ada taika deng tali ampa pa dia pe ujung-ujung.

¹² Di dalam kaeng itu ada macam-macam binatang: ada binatang kaki ampa, binatang yang jaga maraya deng burung-burung.

¹³ Turus dia dengar ada suara yang bilang pa dia, “Petrus, bangun suda. Ambe binatang yang ada di dalam kaeng la potong kong makang suda.”

¹⁴ Tapi Petrus bilang, “Tarada, Tuhan. Kita tara perna makang binatang-binatang bagitu yang haram deng najis iko torang orang Yahudi pe aturan agama.”

¹⁵ Tapi suara itu bilang yang kedua kali pa dia, “Apa yang Tuhan Allah so biking jadi halal, tara bole ngana bilang haram.”

¹⁶ Petrus tetap batahang turus. Samua itu jadi sampe tiga kali. Abis itu, barang yang sama deng kaeng itu langsung taangka ulang ka atas di langit.

¹⁷ Abis itu, Petrus jadi bingung kong batanya-tanya dalam hati tentang samua penglihatan itu pe arti. Pas waktu itu, orang-orang yang Kornelius suru so sampe di ruma yang Petrus tinggal, kong so badiri di muka pintu.

¹⁸ Turus dorang pangge orang yang ada di situ kong tanya, “Torang ada cari satu orang, dia pe nama Simon yang orang jaga pangge pa dia Petrus. Dia tinggal di sini?”

¹⁹ Waktu itu, Petrus masi pikir-pikir tentang penglihatan itu pe arti. Kong Roh Kudus bilang pa dia, “Petrus, ada tiga orang cari pa ngana.

²⁰ Badiri suda, turung ka bawa, kong jang ragu barangkat sama-sama deng dorang, karna Kita sandiri yang suru pa dorang datang kamari.”

²¹ Turus Petrus turung ka bawa. Bagitu Petrus baku dapa deng dorang tiga, dia bilang pa dorang, “Kita ini Petrus yang ngoni cari. Ngoni perlu apa deng kita?”

²² Dorang bilang pa dia, “Bagini, bapa. Torang pe komandan kompi bapa Kornelius, suru torang datang kamari. Dia hidup butul pa Tuhan Allah pe muka deng jaga semba pa Tuhan Allah. Kong samua orang Yahudi bilang dia itu orang bae-bae. Kong baru saja, Tuhan Allah pe malaekat kudus suru pa dia la undang pa bapa pigi pa dia pe ruma, supaya dia bole dengar apa yang bapa bilang.”

²³ Pe dengar itu, Petrus minta pa dorang supaya tinggal satu malam di situ dulu. Dia pe beso, Petrus basadia kong pigi sama-sama deng dorang tiga itu. Ada babarapa orang percaya dari kota Yope me iko pa dia.

²⁴ Dia pe beso, dorang sampe di kota Kaisarea. Di situ Kornelius so tunggu-tunggu pa dorang. Dia me so kumpul dia pe sudara-sudara deng dia pe tamang-tamang bae la mo dengar apa yang Petrus mo bilang.

²⁵ Waktu Petrus so mo maso di ruma, Kornelius langsung jemput pa dia. Turus Kornelius berlutut pa Petrus pe kaki untuk hormati pa dia.

²⁶ Tapi Petrus kase badiri pa Kornelius kong bilang, “Bapa, badiri suda! Kita ini cuma manusia biasa saja.”

²⁷ Pe dengar itu, Kornelius badiri. Abis itu, dorang dua bacarita, turus maso di dalam ruma. Di situ Petrus lia banya orang bakumpul.

²⁸ Turus Petrus bilang pa dorang samua bagini, “Sudara-sudara! Ngoni sandiri so tau to, kalu mo iko torang orang Yahudi pe biasa, torang tara bole batamang deng ngoni karna ngoni bukang orang Yahudi. Torang me tara bole pigi pa ngoni pe ruma karna samua itu torang anggap najis. Tapi samua itu Tuhan Allah so kase tau pa kita, tarada orang yang najis pa Tuhan Allah pe muka.

²⁹ Itu dia pe sebab, sampe waktu ngoni undang pa kita datang kamari, kita tara tolak. Skarang kita mo tanya pa ngoni, bikiapa kong ngoni pangge pa kita datang kamari?”

³⁰ Kornelius bilang pa dia, “Ampa hari lalu, kira-kira sama deng skarang ini jam tiga sore, kita ada berdoa di kita pe ruma. Kage-kage ada satu orang badiri pa kita pe muka. Orang itu pe baju bacahaya skali.

³¹ Turus dia bilang pa kita, ‘Kornelius, Tuhan Allah so dengar samua ngana pe doa deng Dia so lia ngana jaga bantu pa orang-orang susa.

³² Jadi, ngana suru suda orang pigi di Yope la ambe pa Simon yang orang jaga pangge pa dia Petrus. Dia ada tinggal di satu orang pe ruma, orang itu me nama Simon. Dia pe ruma di pinggir pante. Dia pe karja jaga biking bersi binatang pe kuli.’

³³ Jadi, kita langsung suru pa dorang pigi ambe pa bapa, kong pe untung skali bapa mau datang kamari. Skarang torang samua so ada di sini, pa Tuhan Allah pe muka. Torang mo dengar samua yang Tuhan Allah suru bapa bilang pa torang.”

Orang bukang Yahudi tarima Kabar Bae tentang Yesus Kristus

³⁴ Turus, Petrus mulai bicara pa dorang, “Sudara-sudara! Skarang kita baru tau butul-butul, Tuhan Allah itu tara pili-pili orang.

³⁵ Tapi, Tuhan Allah tarima samua orang dari samua suku bangsa yang tako pa Dia deng yang jaga biking yang butul pa Dia pe muka.

³⁶ Ngoni pasti so tau Kabar Bae yang Tuhan Allah bilang pa orang-orang Israel: Yesus Kristus itu Raja yang mo kase slamat pa manusia, Dia yang bole biking manusia pe hubungan deng Tuhan Allah jadi bae. Yesus Kristus itu yang jadi Tuhan untuk samua orang.

³⁷ Ngoni me so tau to, samua yang Yesus biking baru-baru ini di samua daera Yudea. Itu mulai di daera Galilea, waktu Yohanes so kase tau pa orang-orang, dorang musti dapa baptis supaya jadi tanda dorang so bertobat.

³⁸ Tuhan Allah pili pa Yesus dari Nazaret kong kase Dia pe Roh Kudus deng kase Dia pe kuasa. Abis itu, Yesus bajalang bakuliling kong biking banya barang yang bae, deng kase sembu pa orang-orang yang Iblis kuasai, barang Tuhan Allah ada sama-sama deng Dia.

³⁹ Torang ini Tuhan Yesus pe utusan-utusan yang orang sebut rasul-rasul. Torang yang lia deng torang pe mata kapala sandiri, samua yang Yesus biking di Yerusalem deng di samua daera yang torang orang Yahudi tinggal. Tapi orang-orang Yahudi di Yerusalem so bunu pa Dia deng cara paku pa Dia di kayu salib.

⁴⁰ Kong dia pe hari ketiga, Tuhan Allah kase hidup ulang pa Dia deng biking Dia bole kase tunju Dia pe diri.

⁴¹ Tapi tara samua orang Yahudi yang bole dapa lia pa Dia. Cuma torang yang Tuhan Allah so pili kamuka yang bole dapa lia kong jadi Dia pe saksi-saksi itu. Torang ini yang so makang deng minum sama-sama deng Dia, waktu Dia so hidup ulang.

⁴² Turus, Dia suru pa torang kase tau Kabar Bae tentang Dia pa orang-orang. Torang musti basaksi kase tau, Dia itu suda, Orang yang Tuhan Allah so pili untuk mo adili pa samua orang yang masi hidup deng pa orang yang so mati.

⁴³ Dulu, samua nabi so perna kase tau Tuhan Allah pe pasáng yang bilang, Yesus mo datang. Dorang bilang kalu orang percaya pa Dia, orang itu pe dosa-dosa pasti mo dapa ampun karna Yesus pe kuasa.”

⁴⁴ Kong waktu Petrus masi bicara, Roh Kudus turung pa samua orang yang dengar Petrus pe bicara itu.

⁴⁵ Di situ, ada orang-orang Yahudi yang so percaya pa Yesus, dorang datang dari Yope sama-sama deng Petrus. Waktu dorang lia banya orang bukang Yahudi tarima Roh Kudus, dorang jadi herang, karna dorang bolong perna lia Roh Kudus tacura pa orang-orang bukang Yahudi.

⁴⁶ Barang, so jelas orang-orang bukang Yahudi itu so tarima Roh Kudus, karna dorang bicara deng puji pa Tuhan Allah, pake bahasa-bahasa laeng yang Roh Kudus kase pa dorang. Turus, Petrus tamba dia pe bicara,

⁴⁷ “Coba ngoni lia, dorang so tarima Roh Kudus sama deng yang torang orang Yahudi tarima. Jadi skarang, so tara ada orang yang mo larang dorang dapa baptis deng aer, to?”

⁴⁸ Pe bilang bagitu, Petrus suru baptis pa dorang dalam nama Yesus Kristus. Abis itu, dorang minta pa Petrus tinggal babarapa hari lagi sama-sama deng dorang.