Kisah Para Rasul 1 - Perjanjian Baru Bahasa Melayu Maluku Utara

Tuhan Allah janji mo kase Roh Kudus

¹ Bapa Teofilus yang bae. Di kita pe kitab yang pertama, kita so tulis tentang samua yang Yesus perna biking deng ajar,

² sampe waktu Dia taangka ka atas di sorga. Sebelum Yesus taangka, Dia pasáng pa Dia pe utusan-utusan yang orang sebut rasul-rasul, apa yang dorang musti biking. Dorang itu yang Dia so pili, kong Dia pasáng pa dorang itu pake Roh Kudus pe kuasa.

³ Pa dorang itu, waktu Yesus mati kong hidup ulang, Dia kase tunju Dia pe diri ulang-ulang la dorang tau butul-butul, Dia memang so hidup ulang. Dia kase tunju Dia pe diri pa dorang selama ampa pulu hari kong bicara pa dorang tentang bagimana Tuhan Allah Berkuasa sebagai Raja.

⁴ Satu kali bagini, waktu Yesus deng Dia pe rasul-rasul itu makang sama-sama, Dia pasáng pa dorang bagini, “Jang dulu ngoni kase tinggal kota Yerusalem ini. Ngoni tinggal di sini supaya tunggu Kita pe Bapa pe janji pa ngoni, sama deng yang Kita perna bilang pa ngoni.

⁵ Barang, dulu Yohanes baptis pa orang deng aer, tapi tara lama lagi Tuhan Allah mo baptis pa ngoni deng Roh Kudus.”

Yesus utus Dia pe rasul-rasul

⁶ Satu kali bagini, Yesus bakumpul lagi deng Dia pe utusan-utusan yang orang sebut rasul-rasul, kong dorang tanya pa Dia, “Tuhan, apa skarang ini Tuhan mo kase bebas pa torang bangsa Israel dari bangsa Roma yang jaja pa torang, kong mo jadi torang orang Israel pe raja?”

⁷ Yesus jawab, “Ngoni tara perlu tau tempo apa samua mo jadi. Cuma Kita pe Bapa yang tau, karna Dia yang pe hak untuk ator samua waktu.

⁸ Tapi nanti Roh Kudus mo turung pa ngoni, baru ngoni mo dapa kuasa. Kong deng kuasa itu, ngoni mo jadi Kita pe saksi la pigi kase tau tentang Kita pa orang-orang di kota Yerusalem, di daera Yudea, daera Samaria, sampe di tampa-tampa yang jao skali di dunia ini.”

⁹ Pe abis bilang bagitu, Yesus taangka ka atas di sorga pa dorang pe muka-muka, kong awan tutu pa Dia sampe dorang so tara dapa lia lagi pa Dia.

¹⁰ Waktu dorang masi bahaga ka atas di langit, kage-kage ada dua orang badiri pa dorang pe pinggir. Dorang dua itu pake baju puti.

¹¹ Kong dong dua bilang bagini, “Ee, orang-orang Galilea, bikiapa kong ngoni masi bahaga ka atas di langit? Yesus so taangka ka atas di sorga. Nanti Dia akan datang ulang di dunia ini, sama deng skarang ini ngoni lia Dia taangka ka atas di sorga.”

Matias ganti pa Yudas jadi Yesus pe utusan

¹² Abis itu, Yesus pe utusan-utusan yang orang sebut rasul-rasul itu turung dari Bukit Zaitun kong bale ulang di kota Yerusalem. Bukit itu pe jao dari Yerusalem kira-kira satu kilo.

¹³ Waktu dorang sampe di kota Yerusalem, dorang pigi di ruma yang dong tinggal kong nae ka atas di tingkat. Dorang itu: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus (Alfeus pe ana), Simon (dari gerakan Yahudi Merdeka) deng Yudas (Yakobus pe ana).

¹⁴ Dorang samua salalu bakumpul la berdoa deng satu hati. Dorang berdoa sama-sama deng babarapa parampuang, Yesus pe sudara-sudara, deng Maria Yesus pe mama.

¹⁵ Satu kali bagini, waktu orang-orang yang percaya pa Yesus bakumpul sama-sama, dorang itu pe banya mangkali saratus dua pulu orang. Turus Petrus badiri pa dong pe tenga-tenga kong bilang,

¹⁶ “Sudara-sudara, dulu Roh Kudus so bilang pa raja Daud apa yang mo jadi pa Yudas. Itu so ada di Kitab Suci, kong memang musti jadi. Yudas itu yang so bawa orang-orang pigi tangka pa Yesus.

¹⁷ Padahal, Yudas itu satu dari torang. Dia jaga pigi pelayanan sama-sama deng torang.”

¹⁸ (Yudas itu yang bahianat pa Yesus, kong dari hasil dia pe kajahatan itu, dia dapa doi, turus doi itu so pake bili tana. Di tana itu suda dia tapalaka sampe dia pe puru me tabalá kong dia pe gale-gale me kaluar.

¹⁹ Apa yang jadi pa Yudas itu, samua orang di kota Yerusalem so tau, sampe tana itu dorang kase nama pake dorang pe bahasa sandiri, Akeldama, yang pe arti, ‘Tana Dara’).

²⁰ Kong Petrus bilang lagi, “Dulu raja Daud so tulis memang tentang Yudas di kitab Mazmur, bagini: ‘Biar suda dia pe tampa tinggal jadi sunyi, kong biar suda tarada orang yang tinggal di situ.’ Raja Daud me tulis lagi bagini: ‘Biar suda orang laeng ambe dia pe tugas.’

²¹ Jadi skarang, torang musti tamba satu orang yang mo ganti pa Yudas. Orang itu musti orang yang so biasa iko deng torang waktu Tuhan Yesus masi sama-sama deng torang,

²² mulai dari Yohanes baptis pa Yesus sampe Yesus taangka ka atas di sorga kase tinggal pa torang. Orang itu mo sama-sama deng torang untuk jadi saksi kase tau pa orang-orang, Yesus so hidup ulang.”

²³ Pe abis Petrus bicara bagitu, orang-orang yang bakumpul di situ kase usul dua orang. Yang satu pe nama Yusuf yang orang biasa pangge Barsabas atau Yustus, deng yang satu lagi dia pe nama Matias.

²⁴ Abis itu, dorang samua berdoa, dong bilang, “Tuhan, Tuhan lebe tau samua orang pe hati. Jadi kase tunju pa torang, dari dong dua ini sapa yang Tuhan mo pili pa dia,

²⁵ supaya dia ganti pa Yudas dalam pelayanan ini untuk jadi Yesus pe rasul. Barang, Yudas so mati kong dia so ada di tampa yang pantas iko sama deng apa yang dia biking.”

²⁶ Pe abis berdoa, dorang cabu undi, kong Matias yang dapa. Jadi dong angka pa Matias jadi rasul sama-sama deng dorang seblas orang itu.