Ibrani 8 - Perjanjian Baru Bahasa Melayu Maluku Utara

Yesus Kristus itu torang pe Imam Basar yang tara sama deng imam-imam di dunia

¹ Yang paling penting dari samua yang kita so bilang itu, bagini: Yesus Kristus itu so jadi torang pe Imam Basar yang kase bae-bae torang pe hubungan deng Tuhan Allah. Dia so dudu di tampa yang terhormat, pa Tuhan Allah yang Paling Berkuasa pe sabla kanan di sorga.

² Yesus Kristus tara sama deng imam di dunia yang biking dong pe tugas layani pa Tuhan Allah di Tenda Ibada yang manusia biking, tapi Dia biking Dia pe tugas di Tuhan Allah pe tampa tinggal yang sebenarnya di sorga, tampa yang Tuhan Allah biking, deng yang kudus.

³ Barang, tiap imam basar di dunia ini dapa pili untuk biking tugas serakan umat pe binatang korban persembahan deng persembahan laeng pa Tuhan Allah. Bagitu lagi deng Yesus Kristus. Karna Dia torang pe Imam Basar, Dia lagi musti ada persembahan yang Dia kase pa Tuhan Allah.

⁴ Kalu saja Yesus Kristus masi ada di dunia ini, Dia tara akan jadi imam, barang di dunia ini so ada imam-imam yang jaga serakan umat pe persembahan pa Tuhan Allah iko aturan-aturan yang ada di lima kitab Musa.

⁵ Imam-imam pe tugas yang dong biking di Tuhan Allah pe Tenda Ibada di dunia itu cuma gambaran atau conto saja deng apa yang mo jadi di sorga nanti. Jadi itu sama deng dulu, waktu nabi Musa mo biking Tenda Ibada itu, Tuhan Allah bilang pa dia, “Inga e! Ngana biking Tenda itu sama persis deng yang Kita so kase tunju pa ngana di atas gunung.”

⁶ Tapi Yesus Kristus so jadi Imam Basar yang lebe hebat dari imam-imam yang biking dong pe tugas di Tenda Ibada di dunia ini. Barang, Dia yang jadi sama deng manusia pe wakil untuk biking janji yang baru antara Tuhan Allah deng manusia. Kong deng janji yang baru itu biking manusia pe hubungan deng Tuhan Allah jadi bae ulang. Tuhan Allah pe janji yang baru itu lebe bagus skali dari janji yang lama, karna Tuhan Allah ada janji hal-hal yang lebe bagus di janji yang baru itu.

⁷ Barang, kalu saja korban persembahan di janji yang lama itu so bisa biking torang pe hubungan deng Tuhan Allah jadi bae ulang, pasti Yesus so tara perlu lagi kase Dia pe diri untuk jadi korban di Tuhan Allah pe janji yang baru.

⁸ Barang, Tuhan Allah me lia orang Israel tara mampo iko aturan-aturan yang ada di janji yang lama itu. Jadi Dia bilang pa dorang bagini, “Ngoni dengar yang Kita mo bilang ini e! Nanti akan ada dia pe waktu, Kita mo biking janji yang baru deng orang-orang bangsa Israel deng orang-orang bangsa Yehuda.

⁹ Janji yang baru itu tara sama deng janji yang Kita so perna biking deng dorang pe orang tua dulu-dulu waktu Kita pimpin pa dorang kaluar dari tana Mesir. Kita pimpin pa dorang itu sama deng Kita ada pegang dorang pe tangan untuk kaluar dari tana Mesir. Kita biking janji yang baru itu, barang dorang tara biking apa yang Kita suru di janji yang lama itu. Jadi Kita kase biar suda dorang biking apa yang dong mau, biar sala.

¹⁰ Jadi ini suda janji yang baru yang Kita akan biking deng orang-orang bangsa Israel nanti: Kita mo taru Kita pe aturan-aturan pa dorang pe pikiran, deng Kita mo tulis itu di dorang pe hati. Kita akan jadi dorang pe Tuhan Allah, deng dorang akan jadi Kita pe umat.

¹¹ Kong dorang so tara akan baku kase ajar lagi pa dorang pe tamang yang satu bangsa atau dorang pe sudara untuk kanal pa Kita, barang dorang samua akan kanal pa Kita, mulai dari orang yang tara penting sampe orang yang penting.

¹² Dorang akan kanal pa Kita karna Kita mo kase tunju Kita pe rasa kasiang pa dorang, sampe Kita kase ampun dorang pe dosa-dosa, deng Kita so tara inga-inga lagi dorang pe dosa-dosa.”

¹³ Jadi sudara-sudara, waktu Tuhan Allah bilang Dia mo biking janji yang baru lagi deng dorang, itu berarti, Dia pe janji yang lama so tara pake lagi. Janji yang lama itu so tua, kong apa yang so tua itu so tara lama mo ilang.