Ibrani 6 - Perjanjian Baru Bahasa Melayu Maluku Utara

¹ Jadi, jang torang cuma ulang-ulang balajar ajaran-ajaran dasar yang tong tarima waktu tong baru jadi percaya pa Yesus Kristus. Tapi, torang yang so lama percaya musti balajar ajaran yang biking torang pe percaya pa Yesus Kristus lebe tamba kuat. Torang tara usa ulang-ulang balajar ajaran dasar macam ini: ajaran tentang bertobat dari torang pe kalakuang yang tarada dia pe guna, ajaran tentang musti percaya pa Tuhan Allah,

² ajaran tentang baptisan, ajaran tentang taru tangan di atas orang untuk kase berdoa, ajaran tentang orang yang so mati nanti mo hidup ulang, deng ajaran tentang orang yang tara percaya nanti mo dapa hukuman dari Tuhan Allah slama-lamanya.

³ Jadi kalu Tuhan Allah kase ijin pa torang, mari suda torang balajar ajaran yang lebe dalam lagi, supaya torang pe percaya pa Yesus Kristus lebe tamba kuat.

⁴ Orang-orang yang so kase tinggal dorang pe percaya pa Yesus Kristus, so tara mungkin lagi bisa bawa pa dorang untuk bertobat. Barang, dulu dorang hidup di dalam tarang, deng dong so rasa banya Yesus Kristus pe bae yang Dia kase dari sorga, deng dorang lagi so tarima Roh Kudus di dong pe hati.

⁵ Dorang so perna tau, Tuhan Allah pe firman itu paling bagus, deng dorang lagi so rasa Tuhan Allah pe kuasa yang akan ada di dunia yang baru nanti.

⁶ Kong biar dorang so tau deng rasa samua itu, dorang so kase tinggal dorang pe percaya pa Dia, jadi tara mungkin mo pimpin bale pa dorang untuk bertobat. Barang, deng dorang kase tinggal dong pe percaya itu, dorang sama deng so kase salib ulang pa Anak Allah deng kase malu pa Dia di muka umum.

⁷ Ambe conto bagini, torang pe hidup ini macam deng tana yang dapa ujang dari Tuhan Allah. Kalu tana itu salalu isap aer ujang, tana itu akan jadi subur kong kase kaluar hasil banya untuk orang kobong. Tana itu tetap dapa berkat dari Tuhan Allah.

⁸ Tapi kalu tana itu cuma kase kaluar rumpu duri deng kusu-kusu, tana itu tarada dia pe guna. Tana itu akan Tuhan Allah kutuk, ahirnya dapa bakar sampe angus.

⁹ Tapi ngoni sudara-sudara yang kita sayang, biar torang bicara bagitu, torang yakin ngoni tara sama deng tana yang dapa kutuk itu. Tapi yang ngoni biking itu kase tunju ngoni so jadi percaya pa Tuhan Allah, jadi torang yakin, ngoni termasuk orang yang dapa slamat dari dosa-dosa.

¹⁰ Barang, Tuhan Allah itu adil, jadi Dia tetap inga ngoni pe bae yang ngoni so biking untuk Dia, deng ngoni pe sayang yang ngoni so kase tunju pa orang-orang yang so jadi Tuhan Allah pe umat, yang ngoni layani dari dulu sampe skarang.

¹¹ Torang mau, ngoni samua tetap smangat biking yang bae itu turus-turus sampe hari kiamat, supaya jelas ngoni akan dapa apa yang ngoni harap dari Tuhan Allah di sorga.

¹² Kong jang ngoni pamalas. Tapi ngoni musti hidup iko conto dari orang-orang percaya yang akan tarima samua yang Tuhan Allah so janji, karna dorang pe percaya kuat deng dorang tara berenti sampe ahir.

Tuhan Allah pasti biking yang Dia so janji

¹³ Dulu, Tuhan Allah bajanji pa Abraham. Waktu Dia bajanji itu, Dia mo biking supaya Dia pe janji jadi kuat, tapi karna tara ada nama yang lebe hebat dari Dia, Tuhan Allah basumpa pake Dia pe nama sandiri.

¹⁴ Tuhan Allah bajanji pa Abraham bagini, “Kita pasti mo kase banya skali berkat pa ngana deng biking ngana pe turunan jadi banya skali.”

¹⁵ Abraham batunggu-tunggu janji itu deng sabar, kong deng bagitu, dia tarima apa yang Tuhan Allah janji itu.

¹⁶ Barang, biasa kalu ada orang kase kuat dia pe janji, dia basumpa pake nama yang lebe tinggi dari dia. Dia pe sumpa itu biking kuat dia pe janji, supaya samua orang jadi percaya dia mo biking apa yang dia so janji itu.

¹⁷ Bagitu lagi deng Tuhan Allah. Waktu Tuhan Allah bajanji pa Dia pe umat, Tuhan Allah suka kase kuat torang pe hati la torang tau, Dia pe rencana tara perna beruba. Jadi Dia basumpa pake Dia pe nama supaya jelas, apa yang Dia so janji itu, pasti Dia biking.

¹⁸ Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

¹⁹ Torang pe harapan itu biking torang pe hati kuat deng tenang, sama deng jangkar di laut yang tara tapinda-pinda. Kong karna itu, torang so bole langsung berdoa pa Dia, itu sama deng torang so bole maso pa Tuhan Allah pe Ruang Paling Suci yang dulu orang biasa tara bole maso karna ada pele deng kaeng pampele basar.

²⁰ Jadi torang tara usa tako lagi mo datang pa Tuhan Allah, karna Yesus Kristus yang so kamuka maso di situ la bicara pa Tuhan Allah untuk torang. Dia jadi torang pe Imam Basar untuk slama-lamanya, sama deng Melkisedek dulu yang jadi imam basar.