Ibrani 5 - Perjanjian Baru Bahasa Melayu Maluku Utara

¹ Ngoni so tau to, tiap imam basar agama Yahudi dapa pili dari antara Tuhan Allah pe umat. Kong dia pe tugas tarima umat pe persembahan deng binatang korban persembahan kong serakan pa Tuhan Allah, supaya Tuhan Allah hapus umat pe dosa-dosa. Deng imam biking bagitu, dia kase bae-bae umat yang berdosa pe hubungan deng Tuhan Allah.

² Imam basar itu cuma manusia biasa saja, yang bisa saja tagoda biking dosa, jadi dia musti sabar untuk layani pa orang-orang yang bolong tau banya tentang Tuhan Allah pe mau, deng pa orang-orang yang jaga biking dosa.

³ Kong karna dia bisa tagoda biking dosa, dia lagi musti kase binatang korban persembahan pa Tuhan Allah, bukang cuma untuk minta Tuhan Allah kase ampun umat pe dosa-dosa, tapi deng dia lagi pe dosa-dosa.

⁴ Tara ada satu orang yang bole angka dia pe diri sandiri jadi imam basar. Orang bisa jadi imam basar, cuma kalu Tuhan Allah pili pa dia, sama deng yang jadi pa Harun dulu.

⁵ Bagitu lagi deng Yesus Kristus. Dia tara angka Dia pe diri sandiri jadi Imam Basar, tapi Tuhan Allah yang angka pa Dia supaya dapa puji deng hormat. Tuhan Allah bilang pa Yesus Kristus bagini, “Ngana Kita pe Anak. Hari ini Kita jadi Ngana pe Papa.”

⁶ Kong di bagian laeng lagi di Kitab Suci, Tuhan Allah bilang bagini, “Ngana itu Imam untuk slama-lamanya, sama deng Melkisedek me jadi imam.”

⁷ Waktu Yesus Kristus hidup di dunia ini, Dia berdoa kong minta sunggu-sunggu sampe babataria deng mamanangis pa Tuhan Allah yang punya kuasa untuk kase lapas pa Dia dari kematian. Tuhan Allah dengar Dia pe doa itu, barang Dia butul-butul iko Tuhan Allah pe mau.

⁸ Dia itu Anak Allah, tapi biar bagitu, Dia kase Dia pe diri dapa siksa macam itu, la jadi tanda, Dia dengar-dengaran pa Tuhan Allah.

⁹ Deng Yesus biking bagitu, Tuhan Allah so biking Dia jadi sempurna, supaya Dia yang bisa kase slamat pa sapa saja yang dengar-dengaran pa Dia untuk slama-lamanya.

¹⁰ Kong Tuhan Allah angka pa Dia jadi Imam Basar, sama deng Melkisedek dulu.

Jang kase tinggal ngoni pe percaya tapi lebe tamba iko pa Yesus Kristus

¹¹ Sudara-sudara, masi ada banya hal yang perlu tong kase tau pa ngoni tentang Yesus Kristus yang jadi torang pe Imam Basar, cuma ngoni ini pamalas dengar ajaran yang lebe dalam itu, jadi susa skali mo biking ngoni mangarti.

¹² Ngoni so lama percaya pa Yesus Kristus, jadi sebenarnya ngoni ini yang musti ajar pa orang laeng. Tapi ternyata skarang ini, ngoni masi perlu lagi mo dapa ajar tentang ajaran-ajaran dasar dari Tuhan Allah pe firman. Ngoni masi sama deng ana-ana kacil yang cuma bisa minum susu, bolong bisa makang makanang karas.

¹³ Barang, orang yang cuma dapa ajar ajaran dasar saja, yang bolong tau mana yang sala deng mana yang butul, dorang itu macam deng ana kacil yang memang cuma bole minum susu.

¹⁴ Tapi, sapa yang salalu lati dia pe diri sampe bisa kase beda mana yang butul deng mana yang sala, dia itu bole kase sama deng orang basar yang so bole makang makanang karas.