Ibrani 4 - Perjanjian Baru Bahasa Melayu Maluku Utara

Orang percaya akan baistrahat sama-sama deng Tuhan Allah

¹ Jadi sudara-sudara, biar torang pe orang tua dulu-dulu tara dapa maso di tana yang Tuhan Allah janji untuk baistrahat, skarang Tuhan Allah pe janji untuk baistrahat sama-sama deng Dia masi ada. Jadi torang musti ati-ati, jang sampe ada satu dari torang yang tara bisa baistrahat deng Tuhan Allah.

² Barang, torang me so dengar kabar yang bae tentang bisa baistrahat sama-sama deng Tuhan Allah, sama deng torang pe orang tua dulu-dulu so dengar. Tapi kabar yang torang pe orang tua dulu-dulu dengar itu tara ada guna, barang dorang tara percaya butul-butul.

³ Karna cuma orang yang percaya yang bisa baistrahat sama-sama deng Dia. Tapi tentang orang yang tara percaya itu, Tuhan Allah bilang bagini, “Kita mara pa dorang, jadi Kita basumpa: ‘Dorang tara akan bisa maso di tana yang Kita so janji pa dorang la dorang baistrahat sama-sama deng Kita.’ ” Tuhan Allah bilang bagitu, karna Dia so biking tana istrahat itu dari dulu waktu Dia biking dunia ini.

⁴ Torang samua tau, Tuhan Allah so kase sadia hari istrahat untuk torang samua, barang itu so tatulis di Kitab Suci bagini, “Tuhan Allah kase selesai samua Dia pe karja biking dunia ini, kong Dia baistrahat di hari ketuju.”

⁵ Tapi inga apa yang so tatulis di Kitab Suci tentang orang yang tara percaya, “Dorang tara akan bisa maso di tana yang Kita so janji pa dorang la dorang baistrahat sama-sama deng Kita.”

⁶ Jadi dari ayat-ayat itu so jelas, torang pe orang tua dulu-dulu so kamuka dengar kabar yang bae tentang tana itu, tapi dorang tara jadi maso di situ, karna dorang tara dengar-dengaran pa Tuhan Allah. Tapi biar bagitu, masi ada kesempatan untuk Tuhan Allah pe umat bole baistrahat sama-sama deng Dia.

⁷ Barang, Tuhan Allah so tentukan hari laeng lagi, supaya manusia bole baistrahat sama-sama deng Dia. Hari yang Dia so tentukan itu, yang torang bilang “Hari ini” suda. Barang, deng ratus-ratus taong abis nabi Musa itu, Tuhan Allah biking raja Daud bicara pa Tuhan Allah pe umat tentang hari itu bagini, “Hari ini, kalu ngoni dengar Tuhan Allah pe suara, jang ngoni bakapala batu.”

⁸ Hari istrahat baru yang Tuhan Allah maksut itu, bukang di tana Kanaan waktu Yosua bawa maso pa orang Israel dulu. Karna kalu itu pe maksut di tana Kanaan, Tuhan Allah tara akan bicara tentang hari laeng lagi untuk baistrahat sama-sama deng Dia.

⁹ Jadi untuk Tuhan Allah pe umat, masi ada kesempatan tarima Tuhan Allah pe janji untuk baistrahat sama-sama deng Dia. Itu sama deng waktu Tuhan Allah baistrahat di hari ketuju, abis Dia biking dunia ini.

¹⁰ Barang, sapa saja yang tarima Tuhan Allah pe janji untuk baistrahat sama-sama deng Dia, nanti dorang baistrahat dari samua dong pe karja, sama deng Tuhan Allah so biking waktu Dia abis biking dunia ini.

¹¹ Jadi, mari suda torang berusaha supaya torang bole baistrahat sama-sama deng Tuhan Allah. Jang sampe ada satu dari torang yang tara dapa baistrahat itu karna dia iko torang pe orang tua dulu-dulu pe sifat yang tara dengar-dengaran pa Tuhan Allah.

¹² Barang, Tuhan Allah pe firman itu hidup deng ada kuasa. Firman itu bisa nilai samua torang pe pikiran deng torang pe maksut yang ada di torang pe hati. Tara ada satu yang bisa torang sambunyi. Firman itu lebe tajam dari parang yang muka-balakang tajam skali. Itu kalu kase pake bapotong, bisa sampe kase tabuka isi deng tulang-tulang samua.

¹³ Di langit deng di bumi me tarada satu yang tasambunyi dari Tuhan Allah. Barang, Dia bisa lia samua-samua, sampe torang pe pikiran deng hati me Dia tau. Kong nanti torang musti tanggung jawab pa Tuhan Allah samua-samua yang torang so biking.

Yesus so jadi Imam Basar yang Paling Hebat

¹⁴ Skarang ini torang so untung, karna torang so ada Imam Basar yang Paling Hebat. Dia itu suda Yesus Kristus, Anak Allah. Dia yang kase bae-bae torang manusia yang berdosa pe hubungan deng Tuhan Allah. Dia so nae di sorga, kong so ada sama-sama deng Tuhan Allah. Jadi, mari suda torang tetap kuat percaya pa Dia.

¹⁵ Barang, Yesus Kristus torang pe Imam Basar itu, Dia mangarti skali torang manusia ini tara kuat kong gampang tagoda biking barang jahat. Karna waktu Dia di dunia, Dia me perna dapa goda macam-macam sama deng torang, cuma Dia tara perna tagoda sampe biking dosa.

¹⁶ Karna itu, jang torang tako lagi, tapi mari suda torang badekat untuk berdoa pa Tuhan Allah, torang pe Raja yang pe hati bae. Torang berdoa pa Dia itu, supaya Dia tolong pa torang sampe torang tarima Dia pe rasa kasiang deng Dia pe bae, pas di waktu yang torang perlu.