Ibrani 3 - Perjanjian Baru Bahasa Melayu Maluku Utara

Yesus lebe hebat dari nabi Musa

¹ Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

² Yesus Kristus itu Tuhan Allah pili, kong Dia setia pa Tuhan Allah. Dia pe setia itu bole kase sama deng nabi Musa dulu yang setia layani di Tuhan Allah pe ruma. Tuhan Allah pe ruma itu, Tuhan Allah pe umat suda.

³ Tapi biar bagitu, Yesus Kristus lebe pantas dapa puji deng hormat. Itu sama deng tukang yang biking ruma lebe pantas dapa puji deng hormat dari ruma yang dia biking.

⁴ Conto itu butul, barang, tiap ruma ada tukang yang biking, tapi samua-samua yang ada di dunia ini, itu Tuhan Allah yang biking.

⁵ Nabi Musa memang setia pa Tuhan Allah pe umat sama deng orang karja yang setia pa dia pe tuang. Nabi Musa setia kase tau pa Tuhan Allah pe umat tentang apa yang Tuhan Allah mo biking yang mo jadi nanti.

⁶ Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Jang bakapala batu, iko suda pa Tuhan Allah

⁷ Jadi karna itu, dengar apa yang Roh Kudus bilang, “Hari ini, kalu ngoni dengar Tuhan Allah pe suara,

⁸ jang ngoni kapala batu, macam deng ngoni pe orang tua dulu-dulu biking. Waktu itu di padang gurun, dorang malawang Kita pe parenta jadi dong uji Kita pe sabar,

⁹ selama ampa pulu taong di padang gurun, ngoni pe orang tua dulu-dulu so lia Kita biking mujizat. Tapi biar bagitu, dorang tetap uji deng coba Kita pe sabar.

¹⁰ Jadi itu yang biking Kita mara skali pa dorang. Kong Kita bilang bagini, ‘Dorang pe hati cuma mau iko apa yang tara butul, deng dorang tara mau tau apa yang Kita suru.’

¹¹ Dorang biking Kita mara bagitu sampe Kita basumpa bagini, ‘Dorang itu tara akan bisa maso di tana yang Kita so janji pa dorang la dorang baistrahat sama-sama deng Kita di situ.’ ”

¹² Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

¹³ Tapi ngoni, tiap hari, selama masi ada kesempatan yang torang bilang “hari ini”, ngoni musti baku kase kuat ngoni pe hati untuk tamba percaya pa Yesus, supaya tara ada satu dari ngoni yang dapa tipu kong biking dosa sampe jadi tara dengar-dengaran lagi pa Tuhan Allah.

¹⁴ Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

¹⁵ Itu sama deng yang tatulis di Kitab Suci bagini, “Hari ini, kalu ngoni dengar Tuhan Allah pe suara, jang ngoni kapala batu, macam deng ngoni pe orang tua dulu-dulu biking, waktu dorang malawang pa Tuhan Allah.”

¹⁶ Sapa itu orang-orang yang dengar Tuhan Allah pe suara tapi dong masi bakapala batu pa Dia? Dorang itu orang-orang Israel to, yang nabi Musa so pimpin supaya kase bebas pa dorang dari bangsa Mesir yang jaja pa dorang!

¹⁷ Kong sapa itu orang-orang yang Tuhan Allah mara selama ampa pulu taong? Dorang itu to, yang nabi Musa so kase bebas dari Mesir tapi dong masi tetap biking dosa? Karna itu, Tuhan Allah hukum kase mati pa dorang di padang gurun.

¹⁸ Kong sapa yang Tuhan Allah bajanji deng basumpa, dorang itu tara akan maso di tana Kanaan yang Tuhan Allah mo kase pa orang percaya untuk baistrahat sama-sama deng Dia? Tantu dorang itu suda yang tara dengar-dengaran pa Tuhan Allah, to?

¹⁹ Jadi so jelas, torang orang Israel pe orang tua dulu-dulu tara bisa maso di tana yang Tuhan Allah so janji, barang dorang tara percaya pa Dia.