Ibrani 13 - Perjanjian Baru Bahasa Melayu Maluku Utara

Hidup untuk kase sanang Tuhan Allah pe hati

¹ Ngoni musti tetap baku-baku sayang turus e, karna ngoni orang yang sama-sama percaya pa Tuhan!

² Ngoni musti tarima pa orang-orang yang ngoni bolong kanal di ngoni pe ruma. Barang, ada babarapa orang yang tarima pa orang laeng pa dong pe ruma, dong kira orang biasa, padahal yang dong tarima itu malaekat-malaekat.

³ Ngoni me musti inga pa orang-orang yang ada di dalam penjara. Ngoni inga pa dorang, sama deng ngoni lagi ada sama-sama deng dorang di dalam penjara. Ngoni inga lagi pa orang yang dapa siksa, sama deng ngoni sandiri ada rasa siksa yang dong dapa itu.

⁴ Samua orang musti hargai dong pe perkawinan. Laki bini musti setia, tara bole baku suka deng orang laeng. Barang, Tuhan Allah akan hukum pa orang-orang yang baseks sabarang deng pa orang yang baku suka deng orang pe laki atau orang pe bini.

⁵ Jang ngoni gila doi, tapi lebe bae ngoni puas suda deng apa yang ada pa ngoni. Barang, Tuhan Allah so perna bilang bagini, “Kita tara akan perna kase biar pa ngana, deng Kita tara akan perna kase tinggal pa ngana sandiri.”

⁶ Deng karna Tuhan Allah so bilang bagitu, torang bisa yakin kong bilang bagini, “Tuhan itu yang salalu tolong pa kita, jadi kita tara akan tako. Manusia tara bisa biking apa-apa pa kita!”

⁷ Ngoni inga pa ngoni pe pemimpin-pemimpin yang so kase tau Tuhan Allah pe firman pa ngoni. Ngoni perhatikan waktu dong masi hidup sampe dong pe ahir hidup, kong ngoni iko suda dong pe percaya pa Tuhan Allah.

⁸ Yesus Kristus tetap sama, dari dulu, skarang deng sampe slama-lamanya.

⁹ Jang ngoni iko ajaran-ajaran yang tara butul yang bole biking ngoni jadi sesat. Barang, kalu iko aturan tentang makanang yang halal deng haram, tarada dia pe guna untuk biking ngoni jadi sempurna pa Tuhan Allah pe muka. Cuma Tuhan Allah pe sayang deng pe bae yang bisa biking ngoni pe percaya pa Tuhan jadi kuat.

¹⁰ Torang yang percaya pa Yesus Kristus lebe untung dari orang yang iko agama Yahudi pe aturan. Barang, kalu iko agama Yahudi pe aturan, imam-imam biasa bakar binatang korban persembahan di tampa bakar binatang korban persembahan untuk hapus umat pe dosa, kong imam-imam itu dapa bagian dari binatang yang dong kase korban itu. Tapi waktu Yesus Kristus mati, Dia sandiri yang jadi torang pe korban persembahan. Itu persembahan yang paling bagus karna persembahan itu untuk hapus samua orang yang percaya pe dosa satu kali, kong imam-imam itu tara dapa untung dari korban itu sama deng apa yang torang dapa dari Yesus Kristus.

¹¹ Barang, dara dari binatang yang imam basar potong itu, imam basar bawa maso di Ruang Paling Suci jadi korban persembahan untuk hapus dosa. Kong binatang itu, imam-imam bawa kase kaluar dari umat Israel pe tampa tinggal kong dong bakar.

¹² Dorang bakar bangke di luar tampa tinggal itu, itu bole kase sama deng Yesus Kristus lagi menderita kong mati di luar kota Yerusalem untuk kase Dia pe dara sandiri, supaya biking ngoni jadi Dia pe umat yang bersi dari dosa.

¹³ Jadi, mari suda torang iko pa Yesus Kristus saja, biar orang hina pa torang bagimana lagi macam deng dong biking pa Yesus Kristus di luar kota Yerusalem.

¹⁴ Barang, di dunia ini torang tara punya tampa tinggal yang tetap untuk torang tinggal slama-lamanya, tapi torang tunggu-tunggu deng rindu mo dapa tampa tinggal yang tetap untuk torang tinggal nanti di sorga.

¹⁵ Kong karna Yesus Kristus so jadi korban di kayu salib untuk hapus torang pe dosa, torang so tara perlu lagi bawa binatang korban persembahan untuk hapus torang pe dosa. Jadi, mari suda torang puji-puji pa Tuhan Allah. Torang pe kata-kata itu, so sama deng torang so serakan torang pe korban persembahan pa Dia.

¹⁶ Deng jang ngoni lupa biking yang bae pa orang, deng tolong pa dorang. Barang, deng ngoni bantu orang, itu sama saja deng ngoni so serakan ngoni pe korban persembahan pa Tuhan Allah yang biking Dia pe hati sanang.

¹⁷ Ngoni musti dengar-dengaran pa ngoni pe pemimpin-pemimpin deng biking apa yang dorang parenta. Barang, dorang yang Tuhan Allah kase tugas untuk jaga ngoni pe percaya. Deng nanti dorang me musti tanggung jawab pa Tuhan Allah apa yang dong so biking itu. Ngoni musti dengar-dengaran pa dorang, la deng bagitu, dong bisa karja deng hati yang sanang. Tapi kalu ngoni tara dengar-dengaran pa dorang, dong pe hati susa, kong itu nanti biking ngoni rugi.

¹⁸ Ngoni kase berdoa turus pa torang. Barang, torang yakin torang pe hati bersi deng torang mau biking apa yang butul turus dalam samua hal.

¹⁹ Kong kita minta supaya ngoni kase berdoa kusus pa kita, ngoni minta supaya Tuhan Allah buka jalang la kita bisa capat bale ulang pa ngoni.

Doa minta berkat deng ahir surat

²⁰ Tuhan Allah yang salalu biking torang pe hati tetap tenang, Dia yang kase hidup ulang pa Yesus waktu Yesus mati. Yesus itu torang pe Tuhan yang pimpin pa torang bae-bae, sama deng gembala jaga dia pe domba bae-bae. Dia pe dara yang tatumpa itu so biking Tuhan Allah pe janji deng manusia jadi kuat sampe slama-lamanya. Jadi kita minta pa Tuhan Allah,

²¹ supaya Dia kase pa ngoni samua yang ngoni perlu la ngoni bisa biking Dia pe mau, deng supaya Yesus Kristus bakarja di torang pe hati la biking torang mampo biking Tuhan Allah pe hati sanang. Puji deng hormat suda pa Dia sampe slama-lamanya! Amin.

²² Sudara-sudara, kita minta deng sunggu-sunggu supaya ngoni dengar bae-bae kita pe nasehat ini, biar lagi cuma pende saja kita pe surat ini.

²³ Kita mau ngoni tau, Timotius torang pe sudara yang percaya itu so bebas dari penjara. Jadi kalu dia so datang pa kita, torang mo sama-sama ka sana pigi pa ngoni.

²⁴ Ngoni kase sampe tong pe salam pa samua ngoni pe pemimpin jemaat deng pa samua orang yang so jadi Tuhan Allah pe umat di situ. Sudara-sudara yang percaya di Italia me ada kirim salam pa ngoni.

²⁵ Kita minta pa Tuhan Allah supaya Dia kase Dia pe bae pa ngoni samua.