Ibrani 12 - Perjanjian Baru Bahasa Melayu Maluku Utara

Tetap percaya pa Tuhan biar dapa siksa

¹ Sudara-sudara, biar orang-orang percaya dulu-dulu yang kita so bilang tadi itu so mati, dorang pe percaya waktu dong hidup di dunia itu jadi conto la torang iko, sama deng dorang masi hidup kong ada kuliling pa torang. Jadi, mari suda torang berusaha untuk buang samua beban deng lapas suda dosa-dosa yang masi malakat pa tong pe diri, supaya torang tara ada alangan apa-apa, la torang bole percaya butul-butul pa Tuhan Allah. Mari torang berusaha iko pa Dia sama deng torang ada iko lomba lari, torang tara berenti tapi lari turus sampe di garis finis.

² Mari suda torang biking turus sama deng orang yang iko lomba itu, jang lia kiri-kanan tapi lia pa Yesus turus. Barang, Dia yang pimpin pa torang, supaya torang bole percaya pa Tuhan Allah, deng Dia yang biking torang pe percaya jadi sempurna. Waktu dapa salib, Dia tetap batahang. Deng biar Dia dapa hina, Dia tara peduli, karna Dia tau, abis itu, Dia akan sanang. Skarang, Dia so ada di tampa yang terhormat, pa Tuhan Allah pe sabla kanan di sorga.

³ Jadi coba ngoni inga bae-bae apa yang Yesus Kristus so biking: Dia sabar turus waktu dapa pukul deng dapa sengsara dari orang-orang berdosa. Dia tarima samua itu, supaya ngoni pe percaya tetap kuat deng ngoni tara ilang smangat.

⁴ Waktu ngoni berusaha lawan dosa, ngoni bolong dapa siksa macam deng Yesus Kristus yang pe dara tatumpa.

⁵ Jang sampe ngoni so lupa Tuhan Allah pe bicara yang kase kuat ngoni pe hati, waktu Dia pangge pa ngoni Dia pe ana-ana. Dia bicara pa ngoni bagini, “Kita pe ana-ana, perhatikan bae-bae waktu Kita ajar pa ngoni. Deng jang ngoni ilang smangat kalu Kita togor.

⁶ Barang, Kita ngoni pe Tuhan, Kita togor pa orang-orang yang Kita sayang, deng Kita kase hukuman untuk ajar pa orang-orang yang Kita anggap Kita pe ana-ana.”

⁷ Jadi kalu ngoni dapa siksa, batahang saja. Ngoni anggap siksa yang ngoni dapa itu sama saja deng ngoni pe papa ada togor pa ngoni. Itu berarti, Tuhan Allah ada togor untuk biking ngoni jadi lebe bae. Barang, yang namanya ana, pasti dia pe papa musti togor, to?

⁸ Tapi kalu ngoni tara dapa togor macam deng samua Tuhan Allah pe ana-ana dapa, itu berarti, ngoni bukang Tuhan Allah pe ana-ana.

⁹ Memang torang pe papa di dunia jaga togor pa torang, kong torang hormati pa dia. Apalagi waktu torang pe Bapa di sorga togor pa torang, torang musti lebe hormati deng dengar-dengaran pa Dia, supaya torang bole dapa hidup deng Tuhan Allah slama-lamanya.

¹⁰ Barang, torang pe papa di dunia, dorang togor pa torang tara lama, cuma selama torang jadi ana saja. Kong dorang togor pa torang itu, iko deng apa yang dong anggap butul. Tapi kalu Tuhan Allah togor pa torang, Dia ingin supaya torang jadi bae, deng supaya torang jadi sama deng Dia yang suci.

¹¹ Memang tiap kali torang dapa togor, tong pe hati tara sanang, tapi tong sedi. Tapi kalu torang so abis dapa togor bagitu, dia pe hasil itu, torang bole jadi orang yang jaga biking barang yang butul pa Tuhan Allah pe muka, deng itu yang biking tong pe hati jadi tenang.

¹² Jadi karna itu, kase kuat suda ngoni pe percaya pa Tuhan Allah, macam deng orang yang iko lomba lari, dia kase kuat dia pe tangan deng lutut yang tara kuat.

¹³ Kong hidup iko turus pa Tuhan Allah saja supaya orang laeng yang kurang percaya pa Tuhan Allah bole iko ngoni pe conto itu, turus dorang me jadi percaya kuat pa Tuhan Allah. Itu bole kase sama deng ngoni bajalang di jalang yang lurus supaya orang yang pe kaki tempang mo iko pa ngoni la jang dong bajalang tasala lagi tapi bisa bajalang bae-bae.

Berusaha hidup baku bawa bae-bae deng samua orang

¹⁴ Ngoni berusaha suda hidup baku bawa bae-bae deng samua orang, deng ngoni berusaha lagi hidup deng hati yang bersi pa Tuhan Allah pe muka. Kalu orang tara hidup deng hati bersi pa Tuhan Allah pe muka, orang itu nanti tara mo lia pa Tuhan Allah.

¹⁵ Ngoni musti ati-ati. Jang sampe ada dari ngoni yang kase tinggal dia pe percaya pa Tuhan Allah sampe dia tara rasa lagi Tuhan Allah pe bae. Barang, orang yang kase tinggal dia pe percaya pa Tuhan Allah, dia itu pe hati saki, jadi jaga pengaru pa banya orang. Orang itu bole kase sama deng tanaman yang ada dia pe racong kong kase rusak tanaman laeng.

¹⁶ Ngoni jaga supaya jang ada dari ngoni yang baseks sabarang. Jang lagi ada yang tara hormati pa Tuhan Allah sama deng dulu Esau. Esau itu ada hak untuk dapa janji berkat dari Tuhan Allah, tapi dia pandang enteng janji berkat itu kong jual dia pe hak sebagai ana yang tua, cuma untuk makanang satu piring.

¹⁷ Jang ngoni biking bagitu. Barang, ngoni tau, abis itu waktu Esau so mo tarima janji berkat sebagai ana yang tua, dia pe papa tara kase, kong dia so tara dapa kesempatan untuk bertobat dari dia pe sala, biar lagi dia mamanangis.

Badengar pa Tuhan Allah

¹⁸ Sudara-sudara yang percaya, ngoni tara sama deng orang-orang Israel dulu waktu dorang datang pa Tuhan Allah di gunung Sinai, gunung yang bisa sontong. Di gunung itu ada api mamanyala, angin kancang deng gunung itu tatutu galap skali.

¹⁹ Dorang dengar trompet babunyi kuat skali, deng Tuhan Allah pe suara yang kuat bicara pa dorang. Waktu dorang dengar Tuhan Allah pe suara yang hebat itu, dorang tako skali sampe dorang bamohon supaya suara itu jang bicara langsung lagi deng dorang.

²⁰ Barang, dorang tara mampo tahang waktu dengar suara itu parenta bagini, “Samua yang sontong gunung ini, manusia ka, binatang ka, musti dapa lempar deng batu sampe mati.”

²¹ Memang, orang-orang Israel tako skali deng apa yang dong lia deng dengar itu, sampe nabi Musa saja bilang, “Kita tako skali sampe totofore.”

²² Tapi sudara-sudara, ngoni ini so percaya pa Tuhan Yesus yang biking Tuhan Allah pe janji yang baru. Jadi ngoni macam deng so datang di gunung Sion, kota Yerusalem itu. Itu bukang Yerusalem yang ada di dunia, tapi di Tuhan Allah yang hidup pe tampa tinggal di sorga. Kong di situ ngoni baku dapa deng malaekat yang pe banya deng ribu yang bakumpul kong yang puji Tuhan pe nama deng hati sanang.

²³ Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.

²⁴ Kong di situ lagi ngoni baku dapa deng Yesus Kristus. Dia itu yang mati supaya jadi sama deng jambatan la biking janji yang baru antara Tuhan Allah deng manusia. Kong Dia pe dara yang tatumpa itu lebe bagus dari Habel pe dara yang tatumpa dulu, barang hasil dari Habel pe dara itu, orang dapa hukum, tapi hasil dari Yesus pe dara itu biking orang bole dapa ampun dari dosa.

²⁵ Jadi, ngoni musti dengar bae-bae pa Tuhan Allah yang bicara pa ngoni, jang ngoni tolak pa Dia. Barang, dulu-dulu itu, orang-orang Israel tara peduli deng Tuhan Allah pe kata-kata yang nabi Musa bilang pa dorang di dunia, jadi dorang dapa hukum. Apalagi deng torang ini, torang pasti tara akan bebas dari Tuhan Allah pe hukuman kalu torang tara mau dengar Tuhan Allah yang dari sorga pe bicara.

²⁶ Waktu Tuhan Allah bicara pa orang-orang Israel dulu di gunung Sinai itu, Dia pe suara kuat skali sampe biking dunia me tagoyang. Tapi skarang, Tuhan Allah so janji bagini, “Satu kali lagi nanti, Kita mo goyang dunia ini, tapi bukang cuma tana saja yang tagoyang, langit me akan tagoyang.”

²⁷ Waktu Tuhan Allah bilang, “Satu kali lagi”, itu pe arti, samua yang Tuhan Allah biking di dunia ini mo dapa goyang deng ancor. Kong yang akan tatinggal itu cuma apa yang tara dapa goyang deng ancor.

²⁸ Jadi mari suda, torang bilang tarimakasi pa Tuhan Allah karna torang so jadi Dia pe umat pa Dia pe kerajaan yang tara akan tagoyang deng ancor slama-lamanya. Mari torang semba pa Tuhan Allah deng cara yang biking Dia pe hati sanang, torang semba deng rasa tako kong hormati pa Dia.

²⁹ Barang, Tuhan Allah yang torang semba itu, Dia sama deng api yang kase angus samua-samua.