Ibrani 11 - Perjanjian Baru Bahasa Melayu Maluku Utara

Orang dulu-dulu pe percaya pa Tuhan Allah itu jadi conto

¹ Sudara-sudara, skarang torang bicara tentang apa itu percaya pa Tuhan Allah. Percaya pa Tuhan Allah itu pe arti bagini: torang yakin torang akan tarima apa yang Tuhan Allah so janji pa torang, biar torang bolong dapa lia.

² Barang, torang orang Israel pe orang tua dulu-dulu pe percaya macam bagitu. Itu yang biking sampe Tuhan Allah sanang deng dorang.

³ Deng karna torang percaya pa Tuhan Allah, torang jadi mangarti, langit deng bumi ini Tuhan Allah biking cuma deng Dia pe bicara saja. Jadi apa yang torang bole lia itu, Dia biking dari apa yang torang tara dapa lia.

⁴ Kong karna Habel percaya pa Tuhan Allah, jadi dia kase binatang korban persembahan pa Tuhan Allah iko apa yang Tuhan Allah suru, tara sama deng dia pe kaka Kain. Deng karna Habel pe percaya itu, Tuhan Allah tarima deng hati sanang Habel pe persembahan itu, deng bilang, Habel itu so tara sala pa Tuhan Allah pe muka. Jadi biar Habel so mati, dia pe percaya itu jadi conto pa torang. Itu sama saja deng dia masi hidup kong bicara untuk ajar pa torang.

⁵ Kong karna Henokh percaya pa Tuhan Allah, Tuhan Allah angka pa dia ka atas di sorga supaya dia tara mati, kong so tarada orang yang lia lagi pa dia, karna Tuhan Allah so angka pa dia. Kong waktu Henokh bolong dapa angka, Tuhan Allah bilang, Henokh so biking Dia pe hati sanang.

⁶ Tara mungkin orang mo biking Tuhan Allah pe hati sanang, kalu dia tara percaya pa Tuhan Allah. Barang, sapa saja yang mo datang pa Tuhan Allah, dia musti yakin Tuhan Allah ada, deng dia lagi musti yakin, Tuhan Allah mo kase hal-hal yang bae pa orang-orang yang butul-butul cari pa Dia.

⁷ Nuh me percaya pa Tuhan Allah, jadi Tuhan Allah kase tau pa dia akan ada banjir basar. Biar Nuh bolong perna lia macam bagitu, tapi Nuh dengar-dengaran pa Tuhan Allah, jadi dia biking kapal satu yang basar skali untuk kase slamat pa dia deng dia pe keluarga. Kong karna Nuh biking kapal itu, itu jadi tanda dia percaya apa yang Tuhan Allah bilang. Jadi jelas, orang-orang yang tara dengar-dengaran pa Tuhan Allah pantas dapa hukum dari Tuhan Allah. Deng karna Nuh pe percaya itu, dia bole dapa apa yang Tuhan Allah janji, kong Tuhan Allah biking dia jadi orang yang tara sala pa Tuhan Allah pe muka.

⁸ Bagitu lagi deng Abraham. Karna Abraham percaya pa Tuhan Allah, dia iko Tuhan Allah pe parenta kong pigi jao di tana yang Tuhan Allah so janji mo kase pa dia. Biar dia bolong tau mo pigi ka mana, dia iko saja Tuhan Allah pe parenta itu.

⁹ Kong karna Abraham pe percaya itu, dia hidup sebagai pendatang di tana yang Tuhan Allah janji itu. Dia tinggal di tenda-tenda, kong babapinda tampa, sama-sama deng dia pe ana Ishak deng dia pe cucu Yakub. Dorang dua itu me dapa tana itu jadi dong punya, sama deng yang Tuhan Allah so janji pa Abraham.

¹⁰ Abraham bole batahang hidup sebagai pendatang, karna dia ada tunggu-tunggu deng yakin mo tinggal di kota yang baru di sorga yang Tuhan Allah biking iko Dia pe rencana sandiri. Kota itu pe fandasi kuat skali.

¹¹ Turus karna Abraham pe percaya itu, dia bisa dapa ana cucu dari dia pe bini Sara, padahal Sara itu tara bisa dapa ana, baru dong dua laki bini itu so tua skali. Dorang dua bisa dapa ana, barang Abraham percaya Tuhan Allah itu setia, deng pasti Dia mo biking apa yang Dia so janji, untuk mo kase turunan pa dorang dua.

¹² Jadi biar Abraham so tua skali amper mati, tapi dari satu orang itu saja masi dapa turunan. Dia pe turunan itu pe banya skali sampe tara bisa hitung, sama deng bintang di langit deng paser di pante.

¹³ Orang tua dulu-dulu yang tadi kita so bilang itu tetap percaya pa Tuhan Allah sampe dorang mati. Waktu dorang masi hidup, memang dorang bolong tarima apa yang Tuhan Allah janji pa dorang. Tapi dorang yakin dong akan tarima itu, jadi bole kase sama deng dorang ada balia dari jao apa yang Tuhan Allah janji pa dorang kong dorang sambut itu. Kong sementara dorang tunggu Tuhan pe janji mo jadi pa dorang, dong jaga bilang dong pe diri di dunia itu sama deng tamu deng pendatang saja yang tinggal tara lama di dunia ini.

¹⁴ Orang-orang yang sebut dong pe diri itu pendatang di dunia, itu jelas dorang ada rindu dong pe tampa tinggal yang tetap, tampa yang tarada di dunia ini.

¹⁵ Kong tampa yang dorang rindu itu, itu bukang dorang pe tampa tinggal dulu yang dong ada kase tinggal. Karna kalu tampa tinggal itu yang dorang rindu, dorang bole mo bale ulang di situ.

¹⁶ Tapi tampa tinggal yang dorang rindu itu, tampa tinggal yang lebe bagus. Tampa tinggal itu, sorga suda. Karna itu, Tuhan Allah tara malu waktu dorang bilang, Dia itu dorang pe Tuhan Allah, barang Dia so kase sadia kota itu untuk dorang tinggal.

¹⁷ Karna Abraham percaya pa Tuhan Allah, Abraham kase dia pe ana Ishak jadi korban persembahan waktu Tuhan Allah tes pa dia. Ishak itu, Abraham pe ana cuma satu itu saja, deng yang Tuhan Allah so janji mo ada banya turunan dari ana itu.

¹⁸ Pa Abraham itu suda Tuhan Allah so janji bagini, “Dari Ishak itu, ngana akan mo dapa banya turunan.”

¹⁹ Abraham mau saja kase Ishak jadi korban persembahan, barang Abraham yakin Tuhan Allah ada kuasa untuk kase hidup ulang pa Ishak. Deng memang, Tuhan Allah tara kase biar Abraham kase mati pa Ishak. Itu sama deng Tuhan Allah so kase hidup ulang pa Ishak dari kematian.

²⁰ Turus, karna Ishak percaya pa Tuhan Allah, dia minta supaya Tuhan Allah kase berkat pa dia pe ana Yakub deng Esau supaya nanti dong dua dapa berkat itu.

²¹ Bagitu lagi deng Yakub. Karna dia percaya pa Tuhan Allah, waktu dia so mo mati, dia berdoa minta berkat pa Tuhan Allah untuk Yusuf pe ana dua. Waktu itu dia batongka deng dia pe tongka-tongka untuk badiri supaya dia bole semba pa Tuhan Allah.

²² Kong karna Yusuf percaya pa Tuhan Allah, waktu dia so mo mati, dia kase tau pa dia pe keluarga tentang Tuhan Allah pe janji pa dia bagini: nanti satu waktu orang-orang Israel akan kaluar dari tana Mesir. Dia me pasáng pa dorang, kalu nanti dorang kaluar dari tana Mesir, dia pe tulang-tulang me dong iko bawa.

²³ Turus, karna Musa pe orang tua percaya pa Tuhan Allah, dorang tara tako langgar raja pe parenta yang suru bunu pa orang Israel pe ana laki-laki yang baru lahir. Jadi waktu Musa lahir, dorang kase sambunyi pa dia sampe tiga bulan, barang dong pe ana itu, dong lia bagus.

²⁴ Kong karna Musa percaya pa Tuhan Allah, biar raja Mesir pe ana parampuang ada piara pa dia dari kacil, tapi waktu dia so basar, dia so tara mau dapa sebut lagi raja Mesir pe cucu.

²⁵ Barang, dia rasa lebe bae dia hidup sengsara biking Tuhan Allah pe mau sama-sama deng Tuhan Allah pe umat, daripada dia berdosa karna cuma basanang-sanang di dalam raja pe istana. Dia tau, hidup sanang-sanang bagitu itu pe waktu tara slama-lamanya.

²⁶ Musa lebe suka batahang deng hina yang dia dapa karna dia iko Tuhan Allah pe mau, daripada tetap tinggal di Mesir untuk jadi orang kaya. Barang, Musa percaya Tuhan Allah pe janji untuk utus pa Mesias, Raja yang akan kase slamat pa manusia, kong dia tunggu-tunggu upah yang Tuhan Allah mo kase nanti di sorga.

²⁷ Kong karna nabi Musa pe percaya itu, dia barani kase tinggal tana Mesir untuk pimpin pa bangsa Israel, deng dia tara tako raja Mesir mara pa dia. Dia sabar kong bajalang maju turus deng dorang, barang dia lia sama deng Tuhan Allah ada sama-sama deng dia. Tuhan Allah itu yang tara dapa lia.

²⁸ Karna nabi Musa percaya pa Tuhan Allah, dia iko Tuhan Allah pe parenta. Dia suru orang Israel goso binatang pe dara di dong pe pintu ruma, supaya waktu malaekat datang untuk bunu orang Mesir pe ana-ana yang tua, dorang orang Israel pe ana-ana tara dapa bunu. Deng bagitu, nabi Musa so biking hari raya Paska yang pertama untuk orang Israel inga Tuhan Allah kase bebas pa dorang pe orang tua dulu-dulu yang dapa jaja dari bangsa Mesir.

²⁹ Kong karna orang Israel dulu-dulu itu percaya pa Tuhan Allah, dorang bisa menyebrang Laut Mera sama deng dong cuma bajalang di tana kiring. Tapi waktu tentara-tentara Mesir coba menyebrang laut itu untuk dusu pa orang Israel, dorang mati tenggelam, barang aer laut bale tutu laut yang tadi ada kiring itu.

³⁰ Kong karna orang Israel dulu-dulu itu percaya pa Tuhan Allah, abis dorang bajalang kase kuliling kota Yerikho selama tuju hari, kota itu pe pagar-pagar tembok yang kase kuliling kota itu rubu samua.

³¹ Di kota itu, ada parampuang nama Rahab. Biar dia parampuang tara bae, tapi dia percaya pa Tuhan Allah kong dia bantu pa orang Israel pe mata-mata, deng tarima bae-bae dorang pa dia pe ruma. Karna dia pe percaya itu, dia tara dapa bunu sama-sama deng orang-orang yang tara dengar-dengaran pa Tuhan Allah.

³² Ada banya lagi orang-orang yang percaya pa Tuhan Allah yang kita bisa kase carita pa ngoni, tapi kita pe waktu tara cukup. Kita tara ada waktu untuk carita tentang Gideon, Barak, Simson, Yefta, Daud, Samuel deng nabi-nabi laeng lagi.

³³ Dorang samua itu percaya pa Tuhan Allah, sampe ada dari dorang yang kase kala kerajaan-kerajaan, ada yang bapimpin deng adil, ada yang tarima apa yang Tuhan Allah janji pa dorang, deng ada lagi yang tutu singa-singa pe mulu.

³⁴ Deng karna dorang percaya pa Tuhan Allah, ada yang slamat dari api basar, ada yang lolos dari orang yang mo potong pa dorang, turus ada yang tara kuat, tapi Tuhan Allah biking dong jadi kuat. Ada lagi yang Tuhan Allah kase kuat waktu baku prang kong kase kala dorang pe musu-musu dari tentara bangsa-bangsa laeng.

³⁵ Turus, ada lagi parampuang-parampuang yang karna dorang percaya pa Tuhan Allah, Tuhan Allah kase hidup ulang dong pe keluarga yang so mati sampe dong bisa tarima ulang pa dorang. Ada lagi orang-orang yang dapa siksa karna dorang percaya pa Tuhan Allah. Dorang itu bole dapa bebas asal manyangkal pa Tuhan Allah, tapi dorang tara mau. Barang dorang pikir, kalu dorang mati, nanti dorang mo hidup ulang, kong hidup yang dorang dapa itu hidup yang lebe bae lagi.

³⁶ Ada lagi orang yang karna dorang percaya pa Tuhan Allah, dorang dapa hina deng ada yang dapa pukul deng tali yang ada barang tajam di dia pe ujung, sampe ada yang dapa rante kong dapa maso penjara.

³⁷ Kong ada lagi yang dapa lempar deng batu sampe mati, ada yang dapa potong deng gargaji sampe putus dua, turus ada lagi yang dapa potong deng parang. Kong ada lagi yang hidup babapinda, dong hidup susa skali, dong pe baju cuma dari domba pe kuli deng dari kambing pe kuli. Dorang hidup susa, menderita, deng dapa siksa lagi.

³⁸ Dorang itu hidup tara tetap. Dorang bapinda kasana-kamari, di padang gurun tampa yang jao dari kampong, deng di gunung-gunung. Dorang itu tinggal di goa-goa deng di cela-cela gunung. Jadi sebenarnya dunia ini tara pantas untuk orang-orang percaya yang hebat itu tinggal.

³⁹ Dorang samua itu hidup di dunia kase sanang Tuhan Allah pe hati, karna dorang pe percaya pa Tuhan Allah. Padahal dorang bolong tarima apa yang Tuhan Allah janji pa dorang.

⁴⁰ Barang, Tuhan Allah so kase sadia di sorga apa yang lebe bae untuk torang samua. Tuhan Allah tara mau dong dapa lebe kamuka, tapi Dia mau supaya torang deng dorang, torang samua sama-sama dapa apa yang Tuhan Allah so sadia di satu waktu, la torang samua jadi sempurna pa Tuhan Allah pe muka.