Ibrani 10 - Perjanjian Baru Bahasa Melayu Maluku Utara

Yesus Kristus jadi korban persembahan satu kali untuk slama-lamanya

¹ Cara semba pa Tuhan Allah iko aturan-aturan di lima kitab Musa, itu bole kase sama deng bayangan yang tara sama deng dia pe asli. Dia pe asli itu cara semba yang butul pa Tuhan Allah karna Yesus Kristus so datang. Kalu iko aturan-aturan itu, orang yang mo semba pa Tuhan Allah musti kase binatang korban persembahan turus-turus tiap taong. Tapi biar dong kase binatang korban persembahan turus-turus tiap taong, itu tara biking dong jadi sempurna pa Tuhan Allah pe muka.

² Barang, kalu saja orang-orang yang semba pa Tuhan Allah itu pe hati so bersi pa Tuhan Allah pe muka deng dong so tara berdosa, pasti dorang so tara akan datang lagi untuk kase dong pe binatang korban persembahan.

³ Tapi, deng dorang kase binatang-binatang korban persembahan tiap taong itu, itu yang kase inga pa dorang, dorang itu orang berdosa.

⁴ Barang, tara mungkin binatang macam deng sapi laki-laki atau kambing laki-laki pe dara, bisa hapus manusia pe dosa-dosa.

⁵ Kong karna binatang korban persembahan pe dara itu tara cukup untuk hapus manusia pe dosa, itu yang biking sampe Yesus Kristus bilang bagini waktu Dia datang di dunia, “Tuhan Allah, Tuhan tara mau binatang korban persembahan deng persembahan-persembahan laeng, tapi Tuhan Allah so sadia Kita pe badan untuk jadi persembahan pa Tuhan Allah.

⁶ Tuhan Allah tara sanang deng binatang korban persembahan deng korban persembahan laeng untuk hapus dosa.

⁷ Turus, Kita bilang, ‘Tuhan Allah! Lia, ini Kita. Kita datang untuk biking Tuhan Allah pe mau, itu sama deng Tuhan Allah janji dulu mo jadi pa Kita kong ada tatulis di Kitab Suci.’ ”

⁸ Jadi, yang kamuka yang Yesus Kristus bilang itu, “Tuhan Allah tara mau deng tara sanang deng binatang korban persembahan deng persembahan-persembahan laeng, termasuk binatang korban persembahan yang dong bakar untuk hapus dosa.” Padahal, persembahan-persembahan itu, orang bakase karna iko aturan-aturan di lima kitab Musa.

⁹ Abis itu, Yesus Kristus bilang lagi bagini, “Tuhan Allah! Lia, ini Kita. Kita datang untuk biking Tuhan Allah pe mau.” Deng bilang bagitu, Yesus Kristus so tara pake aturan tentang korban persembahan di janji yang lama, tapi Dia so kase Dia pe diri jadi korban persembahan di janji yang baru.

¹⁰ Yesus Kristus ada iko Tuhan Allah pe mau waktu Dia jadi korban persembahan satu kali untuk slama-lamanya. Kong deng Dia kase korban Dia pe diri itu, Dia biking torang jadi Dia pe umat yang bersi dari dosa satu kali untuk slama-lamanya.

¹¹ Tiap-tiap hari, samua imam agama Yahudi biking dong pe tugas. Ulang-ulang dorang bakar binatang korban persembahan pa Tuhan Allah untuk hapus dosa, tapi korban persembahan itu sama skali tara bisa hapus manusia pe dosa.

¹² Tapi Yesus Kristus, cuma satu kali Dia serakan Dia pe diri jadi korban persembahan untuk hapus manusia pe dosa-dosa, kong korban itu berlaku untuk slama-lamanya. Abis itu, Dia dudu di tampa yang terhormat di sorga, pa Tuhan Allah pe sabla kanan.

¹³ Kong skarang, Yesus Kristus ada tunggu-tunggu dia pe waktu Tuhan Allah biking Yesus Kristus pe musu-musu kala samua, itu sama deng Tuhan Allah taru samua Dia pe musu di Yesus Kristus pe di bawa kaki.

¹⁴ Barang, deng Dia kase korban Dia pe diri satu kali saja, Dia so biking orang-orang percaya jadi sempurna sampe slama-lamanya, dorang itu yang Dia sementara biking jadi Dia pe umat sandiri yang bersi dari dosa.

¹⁵ Kong Roh Kudus me kase tau yang sama tentang itu pa torang, bagini:

¹⁶ “Tuhan Allah bilang bagini, ‘Nanti Kita mo biking janji yang baru deng dorang. Kita akan taru Kita pe aturan-aturan di dorang pe hati, deng tulis itu pa dong pe pikiran.’ ”

¹⁷ Tuhan Allah bilang lagi, “Kita so tara akan inga-inga lagi dorang pe dosa-dosa, deng dorang pe kalakuang-kalakuang yang jahat.”

¹⁸ Jadi karna Tuhan Allah so kase ampun torang pe dosa deng torang pe kalakuang yang jahat, itu berarti, torang so tara perlu lagi kase binatang korban persembahan untuk hapus torang pe dosa.

Tetap batahang percaya biar dapa siksa

¹⁹ Sudara-sudara, Yesus Kristus pe dara so tatumpa untuk hapus torang pe dosa-dosa, jadi skarang torang tara usa tako lagi untuk datang pa Tuhan Allah, itu sama deng torang barani maso pa Tuhan Allah pe Ruang Paling Suci.

²⁰ Yesus Kristus so buka jalang pa torang la tong dapa hidup deng Tuhan Allah slama-lamanya. Dia buka jalang itu waktu Dia kase Dia pe diri mati di kayu salib. Apa yang Dia biking itu, itu sama deng Dia so robe kaeng pampele basar di Ruma Ibada Pusat jadi dua, sampe biking orang so bisa maso di Ruang Paling Suci untuk langsung semba pa Tuhan Allah.

²¹ Kong Yesus Kristus itu skarang so jadi torang pe Imam Basar yang hebat yang pimpin pa torang samua Tuhan Allah pe umat.

²² Dia so biking torang pe hubungan deng Tuhan Allah jadi bae-bae ulang, jadi mari suda torang datang pa Tuhan Allah deng hati yang tara ragu deng percaya butul-butul pa Dia. Barang, torang pe hati so jadi bersi dari yang jahat, deng tong pe badan so dapa kase bersi deng aer bersi.

²³ Mari suda torang tetap pegang kuat torang pe percaya pa Yesus yang torang so akui itu, Dia itu torang pe tampa baharap. Barang, Tuhan Allah itu setia, Dia pasti biking samua yang Dia so janji pa torang.

²⁴ Deng mari suda torang baku perhatikan, deng baku kase smangat, supaya torang samua lebe tamba sayang pa orang-orang, deng lebe tamba biking hal-hal yang bae.

²⁵ Kong jang torang pamalas bakumpul deng orang-orang percaya, sama deng babarapa orang percaya laeng jaga biking. Tapi mari suda torang bakumpul turus-turus la baku kase kuat torang pe percaya, lebe-lebe lagi karna torang tau Tuhan Yesus pe waktu mo datang ulang yang kedua kali so lebe dekat.

²⁶ Barang, kalu torang so tarima Kabar Bae tentang Yesus Kristus, turus torang masi sangaja biking dosa lagi, nanti so tarada lagi korban persembahan untuk hapus torang pe dosa itu.

²⁷ Kalu torang pe kalakuang macam deng itu, torang tinggal tunggu dia pe waktu Tuhan Allah mo hukum pa torang yang paling biking dapa tako. Dia mo hukum pa torang deng api yang mamanyala. Api itu mo kase angus abis pa orang-orang yang malawang pa Dia.

²⁸ Dulu, sapa saja yang tara iko aturan-aturan di lima kitab Musa, orang itu pasti dapa hukuman mati, kong tara dapa ampun, asal ada dua atau tiga orang yang basaksi bilang dia itu sala. Kalu ada dua atau tiga orang yang lia dia tara iko aturan itu kong dong sama-sama basaksi bilang dia sala, orang itu dapa hukum.

²⁹ Orang yang tara iko lima kitab Musa saja dapa hukuman barát bagitu, apalagi orang yang so pandang enteng pa Anak Allah, dia pasti dapa hukuman yang lebe barát lagi karna dia so tolak pa Yesus Kristus. Dia sama deng so injang-injang pa Anak Allah, deng anggap Yesus Kristus pe dara tara arti apa-apa. Padahal, Yesus Kristus pe dara so tatumpa untuk biking janji yang baru antara manusia deng Tuhan Allah, kong dara itu lagi yang biking orang itu jadi Tuhan Allah pe umat yang bersi dari dosa. Jadi orang yang pandang enteng itu so hina pa Roh Kudus, padahal Roh Kudus itu yang Tuhan Allah kase pa torang cuma karna Dia pe bae pa torang.

³⁰ Torang tau itu butul, karna torang so kanal pa Tuhan Allah yang perna bilang di Kitab Suci bagini, “Kita yang pe hak mo balas pa orang yang biking jahat, deng Kita yang mo kase hukuman.” Turus, ini lagi yang Tuhan Allah bilang, “Tuhan yang mo adili pa Dia pe umat.”

³¹ Ii, pe dengar Tuhan Allah bilang itu, torang jadi tako skali kalu mo dapa hukum dari Tuhan Allah yang hidup!

³² Coba ngoni inga waktu ngoni baru tarima Kabar Bae tentang Yesus Kristus deng jadi percaya pa Dia. Waktu itu, ngoni banya menderita karna ngoni pe percaya, tapi biar bagitu, ngoni tetap pegang kuat ngoni pe percaya.

³³ Ada dari ngoni yang dapa hina deng dapa siksa di orang banya pe muka, kong ada lagi dari ngoni yang bantu ngoni pe tamang yang dapa siksa, sampe dorang dapa siksa sama deng yang ngoni dapa lagi.

³⁴ Ngoni memang rasa kasiang kong so bantu pa orang-orang yang maso penjara karna percaya pa Yesus Kristus. Kong waktu orang rampas ngoni pe harta, ngoni tarima deng hati sanang saja, barang ngoni tau, nanti ngoni akan dapa harta dari Tuhan di sorga yang lebe bagus, kong harta itu akan tetap ada sampe slama-lamanya.

³⁵ Jadi jang ngoni kase tinggal ngoni pe percaya yang kuat itu, karna kalu ngoni setia, ngoni mo dapa upah yang basar dari Tuhan.

³⁶ Karna itu, ngoni musti batahang percaya biar dapa siksa, supaya kalu ngoni so biking apa yang Tuhan Allah mau, ngoni mo tarima apa yang Dia so janji itu.

³⁷ Barang, di Kitab Suci tatulis Tuhan Allah so janji bagini, “So tara lama lagi, Dia yang mo datang itu so mo datang, Dia so tara akan tunda-tunda lagi Dia pe waktu mo datang.

³⁸ Tapi Kita pe umat yang hidup butul pa Tuhan Allah pe muka, dorang itu hidup cuma bagantong deng dorang pe percaya pa Kita. Tapi kalu ada dari dorang yang so tara mau percaya lagi, Kita tara akan sanang deng dia.”

³⁹ Tapi sudara-sudara, torang samua tara bagitu. Torang ini bukang orang-orang yang so kase tinggal torang pe percaya kong tapisa deng Tuhan Allah sampe slama-lamanya, tapi torang samua ini orang-orang yang percaya deng yang dapa slamat.