Galatia 6 - Perjanjian Baru Bahasa Melayu Maluku Utara

Ngoni musti baku-baku bantu satu deng yang laeng

¹ Sudara-sudara, kalu ngoni dapa ngoni pe sudara satu yang percaya ada biking dosa, lebe bae ngoni yang Roh Kudus kuasai kase nasehat pa dia bae-bae supaya jang dia biking bagitu lagi, kong dia bole bale ulang di jalang yang butul. Ngoni me musti jaga-jaga supaya ngoni sandiri jang sampe tagoda untuk biking dosa sama deng orang itu.

² Ngoni baku-baku bantu suda satu deng yang laeng, karna itu sama deng ngoni ada bantu pikul orang laeng pe beban. Kalu ngoni biking bagitu, ngoni so biking parenta yang Yesus Kristus ada suru untuk ngoni mo biking.

³ Karna kalu ada orang yang pikir kata, dia pe diri itu lebe penting dari orang laeng, padahal tara bagitu, dia itu so kase foya pa dia pe diri sandiri.

⁴ Lebe bae tiap orang pikir bae-bae tentang apa yang dia so biking, itu bae ka tarada. Kalu yang dia biking itu barang yang bae, dia bole rasa sanang, kong tara perlu dia kase banding apa yang dia biking itu deng yang orang laeng biking.

⁵ Barang, masing-masing orang musti tanggung jawab apa yang dia so biking.

⁶ Tiap orang yang dapa kase ajar Tuhan Allah pe firman, dia itu musti barbage dia pe hasil karja pa orang yang so kase ajar Tuhan Allah pe firman itu.

⁷ Sudara-sudara, jang sampe ngoni sala mangarti: apa yang torang biking, itu suda yang nanti Tuhan mo pake untuk tentukan apa yang Dia balas pa torang. Itu sama deng apa yang torang ada tanam di kobong, itu lagi hasil yang nanti torang mo pete. Jadi, jang ada yang bapikir dia bole mo kase bodo pa Tuhan Allah.

⁸ Sapa yang hidup cuma iko manusia pe mau yang suka biking dosa, dia itu nanti mo dapa dia pe balasan dari Tuhan Allah, dia itu mo tapisa deng Tuhan Allah slama-lamanya. Tapi sapa yang biking barang yang bae iko Roh Kudus pe mau, dia itu nanti mo dapa dia pe balasan dari Tuhan Allah, dia mo hidup deng Tuhan Allah slama-lamanya.

⁹ Jang torang pastiu untuk salalu biking barang yang bae, karna kalu torang tetap biking yang bae, Tuhan mo balas torang pe bae itu di waktu yang Dia so tentukan, itu sama deng petani mo dapa hasil dari apa yang dia so tanam di kobong.

¹⁰ Jadi selama torang masi hidup, mari suda torang biking barang yang bae pa samua orang, lebe-lebe lagi pa torang pe sudara-sudara yang sama-sama percaya.

Paulus pe ahir surat

¹¹ Sudara-sudara, coba ngoni perhatikan. Kita ada tulis bagian terahir surat ini deng kita pe tangan sandiri. Kita tulis pake huruf yang basar-basar ini.

¹² Orang-orang Yahudi yang coba paksa pa ngoni yang percaya untuk iko aturan sunat lagi, dorang itu mo biking bagitu cuma supaya orang laeng puji pa dorang. Dorang so percaya pa Yesus tapi dong tako orang Yahudi laeng mo siksa pa dorang kalu dong ajar pa ngoni untuk percaya saja pa Yesus Kristus yang mati di salib, kong tara ajar untuk iko aturan sunat.

¹³ Padahal, dorang yang iko aturan sunat itu, dorang sandiri tara jaga iko aturan-aturan di lima kitab Musa itu. Tapi dorang berusaha buju pa ngoni iko aturan sunat supaya dorang bole angka diri sandiri deng bilang ngoni itu ada iko dong pe aturan sunat.

¹⁴ Tapi untuk kita, kita tara mau sama skali puji diri tentang apa yang kita so biking. Kita cuma mo puji torang pe Tuhan Yesus Kristus deng tentang apa yang Dia so biking di kayu salib, barang Yesus Kristus mati dapa salib untuk kase bebas pa kita dari kita pe dosa. Karna waktu Dia mati itu, itu sama deng samua kita pe keinginan so iko dapa salib sama-sama deng Dia. Jadi kita so tara tapengaru iko dunia pe mau lagi.

¹⁵ Barang, dapa sunat atau tara dapa sunat, bukang itu yang penting. Tapi yang penting itu, Tuhan biking torang jadi orang yang hidup deng cara baru.

¹⁶ Turus ngoni yang hidup iko apa yang kita bilang ini, kita minta supaya Tuhan Allah salalu biking ngoni pe hati tetap tenang deng supaya Dia kase Dia pe rasa kasiang pa ngoni. Ngoni yang hidup bagitu, ngoni itu suda Tuhan Allah pe umat.

¹⁷ Kita minta supaya mulai dari skarang, jang ada orang yang cari hal lagi deng kita. Barang, masi ada bakas-bakas luka pa kita pe badan, karna waktu kita kase tau tentang Yesus Kristus, ada orang-orang yang siksa pa kita. Itu samua tanda-tanda, kita ini Yesus Kristus pe umat.

¹⁸ Sudara-sudara, kita minta pa Yesus Kristus, torang pe Tuhan, untuk kase Dia pe bae pa ngoni. Amin.