Galatia 4 - Perjanjian Baru Bahasa Melayu Maluku Utara

Tuhan Allah pe ana-ana ada hak mo tarima yang Dia so janji

¹ Sudara-sudara, kita mo kase conto satu lagi bagini: kalu ada satu orang yang mo tarima warisan dari dia pe orang tua, tapi dia masi ana kacil, dia bolong bisa. Dia itu so sama deng orang karja yang tarada hak apa-apa dari dia pe tuang pe warisan. Jadi, sebenarnya dia nanti mo dapa samua warisan itu, tapi karna dia masi kacil, dia bolong bisa dapa apa-apa.

² Ada orang-orang yang urus pa dia deng awasi dia pe warisan itu, sampe dia pe waktu yang dia pe papa so tentukan untuk tarima warisan itu.

³ Bagitu lagi deng torang manusia. Waktu Tuhan Yesus bolong datang kase slamat pa torang, torang itu masi jaga iko aturan-aturan di dunia ini, macam deng ana kacil iko-iko dia pe orang tua pe parenta.

⁴ Tapi, bagitu waktu yang Tuhan Allah tentukan so sampe, Tuhan Allah utus Dia pe Anak datang di dunia. Anak itu yang lahir dari parampuang satu, kong Anak itu, hidup iko agama Yahudi pe aturan-aturan yang ada di lima kitab Musa.

⁵ Anak Allah itu datang di dunia untuk tebus kong kase lapas pa torang yang taika deng aturan-aturan di lima kitab Musa itu, supaya torang bole jadi Tuhan Allah pe ana-ana.

⁶ Kong karna torang so jadi Tuhan Allah pe ana-ana, Tuhan Allah so suru pa Dia pe Anak pe Roh tinggal di torang pe hati, kong Roh yang ada di torang pe hati itu bakarja deng biking torang bole pangge pa Tuhan Allah itu, “Papa e, ya Bapa!”

⁷ Jadi ngoni bukang lagi sama deng orang karja yang tarada hak apa-apa, tapi ngoni itu so jadi Tuhan Allah pe ana-ana. Deng karna butul ngoni itu Dia pe ana-ana, ngoni pasti mo dapa samua yang Tuhan Allah so janji deng yang Dia so kase siap untuk Dia pe ana-ana.

Paulus jadi pikiran deng orang-orang Galatia

⁸ Dulu, waktu ngoni bolong kanal pa Tuhan Allah, ngoni pe puji-puji suru-suru pa ngoni sama deng jadi ngoni pe tuhan, padahal ngoni pe puji-puji itu bukang Tuhan Allah.

⁹ Tapi skarang ngoni so kanal pa Tuhan Allah, atau lebe bae kita bilang, Tuhan Allah yang so kanal pa ngoni ini. Jadi bikiapa kong ngoni bale lagi untuk jadi aturan-aturan di dunia ini pe suru-suru? Aturan-aturan itu tarada dia pe guna deng tara bisa kase slamat pa ngoni.

¹⁰ Ngoni paling rajin iko aturan-aturan, macam deng iko aturan di hari sabat yang orang tara bole bakarja, biking acara di hari, bulan-bulan, deng taong-taong yang agama Yahudi so tentukan.

¹¹ Kita hawater deng ngoni yang biking acara di hari-hari itu, jang sampe ngoni so tara bagantong lagi pa Tuhan Yesus untuk dapa slamat. Deng bagitu, kita pe karja karas untuk kase tau Kabar Bae tentang Tuhan Yesus pa ngoni itu so tarada dia pe guna lagi.

Paulus minta pa jemaat-jemaat Galatia supaya iko dia pe cara hidup

¹² Sudara-sudara, kita ini orang Yahudi, tapi biar kita orang Yahudi me kita so jadi sama deng ngoni orang yang bukang Yahudi, karna kita so tara iko aturan di lima kitab Musa itu untuk dapa slamat. Karna itu, kita minta pa ngoni supaya ngoni iko kita pe cara hidup skarang ini yang so tara taika lagi deng aturan-aturan itu. Waktu kita ada sama-sama deng ngoni, ngoni tara perna biking sala apa-apa pa kita.

¹³ Pasti ngoni masi inga, waktu kita pertama kali datang pa ngoni, itu karna kita saki. Kong justru itu, jadi kesempatan pa kita untuk kase tau Kabar Bae dari Tuhan Allah pa ngoni.

¹⁴ Waktu itu, kita ada saki sadiki barát sampe kita pe badan yang saki ini jadi beban pa ngoni, tapi ngoni tara perna hina atau tolak pa kita. Ngoni tarima pa kita sama deng kita ini Tuhan Allah pe malaekat. Ngoni sambut pa kita sama deng kita ini suda Kristus Yesus.

¹⁵ Waktu itu, ngoni dapa lia sanang skali. Tapi skarang, bikiapa kong ngoni so tara sanang macam bagitu lagi? Kita sandiri bole mo jadi saksi tentang ngoni dulu. Waktu itu ngoni suka skali bantu pa kita, rasa-rasa ngoni mo cungkel lagi ngoni pe mata kong kase pa kita.

¹⁶ Tapi skarang, ngoni anggap kita ini ngoni pe musu. Padahal, kita cuma kase tau yang butul pa ngoni.

¹⁷ Orang-orang yang ajar pa ngoni ajaran-ajaran yang tara butul itu, dorang berusaha skali perhatikan bae-bae pa ngoni supaya ngoni iko pa dorang, tapi yang dong ada biking itu tara bagus. Dorang suka kase putus tong dua deng ngoni pe hubungan supaya ngoni cuma mo iko pa dorang kong bukang iko pa tong dua.

¹⁸ Memang bagus orang berusaha turus untuk biking satu barang yang bae untuk ngoni. Tapi jang sampe cuma waktu kita ada saja, bagitu kita so tara ada, dorang berenti biking yang bae itu.

¹⁹ Ee, ngoni yang kita anggap sama deng kita pe ana-ana, skarang kita rasa lagi kita pe hati saki skali ada pikir-pikir tentang ngoni. Saki yang kita rasa, barát sama deng saki yang parampuang ada rasa waktu mo melahirkan. Kalu ngoni pe sifat so beruba iko Yesus Kristus pe sifat, itu baru kita pe hati saki mo ilang.

²⁰ Kita suka skali kalu skarang ini kita ada sama-sama deng ngoni di situ supaya kita bole mo bicara lebe bae-bae pa ngoni, karna skarang torang baku jao, kita so tara tau mo bilang apa lagi pa ngoni.

Hagar deng Sara jadi conto tentang Tuhan Allah pe janji

²¹ Ee, ngoni sudara-sudara yang mau hidup iko aturan-aturan di lima kitab Musa, ngoni musti mangarti dulu aturan-aturan itu pe maksut. Jang sampe ngoni tara mangarti conto yang tatulis di Kitab Suci.

²² Di Kitab Suci ada tatulis, Abraham pe ana ada dua. Yang satu lahir dari Hagar. Hagar itu Abraham pe pembantu satu yang dia perna bili yang tarada hak apa-apa, deng yang satu lagi lahir dari Sara, dia pe bini sandiri yang bukang dia pe pembantu.

²³ Ana yang lahir dari pembantu parampuang satu itu, dia lahir, karna manusia pe mau sandiri. Tapi ana yang lahir dari parampuang yang bukang pembantu, dia itu lahir, karna Tuhan Allah so janji pa Abraham.

²⁴ Abraham pe bini dua itu, bole mo kase sama deng dua janji yang Tuhan Allah ada biking. Abraham pe bini Hagar, itu bole mo kase sama deng perjanjian yang Tuhan Allah biking deng orang Israel waktu Dia bicara di gunung Sinai, karna perjanjian itu biking orang iko aturan sama deng dong jadi aturan itu pe suru-suru.

²⁵ Jadi Hagar itu bole mo kase sama deng gunung Sinai yang ada di tana Arab, deng bole lagi kase sama deng kota Yerusalem skarang ini. Barang, orang-orang di kota Yerusalem skarang, musti iko samua aturan di lima kitab Musa untuk jadi orang yang butul pa Tuhan Allah pe muka, dorang itu sama deng orang karja yang tara hak apa-apa.

²⁶ Tapi Sara itu bukang pembantu yang Abraham punya, jadi bole kase sama deng torang yang percaya pa Tuhan Yesus karna torang tara musti iko aturan-aturan di lima kitab Musa sama deng aturan itu suru-suru pa torang. Sara itu bole mo kase sama deng kota Yerusalem yang baru di sorga, di mana torang samua orang yang percaya pa Tuhan Yesus mo pigi, torang orang-orang yang so bebas dari aturan-aturan di lima kitab Musa.

²⁷ Itu yang ada tatulis di Kitab Suci bagini, “Ngana parampuang yang dulu bolong bisa dapa ana, ngana musti sanang! Sanang suda deng basimore suda ngana parampuang yang dulu bolong perna rasa saki karna melahirkan! Karna parampuang yang dia pe laki dulu ada kase tinggal, dia dapa ana lebe banya dari parampuang yang ada dia pe laki.”

²⁸ Jadi sudara-sudara, ngoni so jadi Tuhan Allah pe ana-ana karna ngoni so percaya Tuhan Allah pe janji, sama deng Ishak yang lahir karna Tuhan Allah pe janji pa Abraham.

²⁹ Dulu, Hagar pe ana lahir karna manusia pe mau, dia itu Ismael. Ismael itu yang siksa pa Sara pe ana, Ishak, ana yang lahir karna kuasa dari Roh Kudus. Bagitu lagi deng yang ada jadi skarang ini, orang yang iko aturan-aturan di lima kitab Musa jaga siksa pa torang yang percaya pa Yesus Kristus.

³⁰ Tapi di Kitab Suci ada tulis bagini, “User suda parampuang yang jadi Abraham pe pembantu itu, deng dia pe ana itu. Karna dia pe ana itu tara bole tarima warisan dari dia pe papa. Warisan itu untuk ana yang lahir dari parampuang yang bukang Abraham pe pembantu itu.”

³¹ Jadi sudara-sudara, torang ini tara sama deng parampuang yang jadi pembantu pe ana-ana karna torang tara taika deng aturan-aturan di lima kitab Musa untuk jadi butul pa Tuhan Allah pe muka, tapi torang ini sama deng parampuang yang bebas pe ana-ana, karna torang percaya pa Yesus Kristus yang biking torang jadi tara sala pa Tuhan Allah pe muka.