Galatia 2 - Perjanjian Baru Bahasa Melayu Maluku Utara

Rasul-rasul laeng setuju, Kabar Bae yang Paulus bawa itu butul

¹ Pas so lewat ampa blas taong, kita pigi ulang di kota Yerusalem sama-sama deng Barnabas. Kong waktu itu, kita me bawa pa Titus.

² Kita pigi di Yerusalem karna Tuhan Allah sandiri yang suru kita pigi ka sana. Kong di situ, kita baku dapa kusus deng pemimpin-pemimpin jemaat yang kita rasa ada pengaru. Kita kase carita pa dorang Kabar Bae tentang Yesus Kristus yang kita jaga kase tau pa orang-orang bukang Yahudi, supaya dorang bole dengar kong kase tau pa kita kalu kita pe ajaran itu butul. Jang sampe dorang bilang kata, kita pe usaha kase tau Kabar Bae pa orang bukang Yahudi yang kita so biking dulu deng skarang, samua itu tarada dia pe guna.

³ Tapi dorang setuju deng ajaran yang kita ajar pa orang bukang Yahudi, deng dorang me tarima pa Titus, orang bukang Yahudi yang ada sama-sama deng kita, deng dorang tara paksa pa dia la dapa sunat iko aturan di lima kitab Musa.

⁴ Memang ada babarapa orang laeng yang tantang supaya Titus dapa sunat. Dorang itu maso babadiam di jemaat, biking diri percaya pa Yesus Kristus sama deng torang, padahal dorang itu cuma mo cari tau pa torang. Dorang lia torang so bebas dari aturan-aturan di lima kitab Musa karna torang so percaya pa Kristus Yesus, kong dorang mo biking torang taika ulang deng aturan-aturan itu, sama deng orang karja yang taika pa dia pe tuang.

⁵ Tapi torang tara kase iko orang-orang itu pe mau, biar cuma sadiki lagi. Torang tara kase iko pa dorang supaya Kabar Bae yang butul yang ngoni jaga iko, tara baku campur deng dorang pe ajaran yang tara butul itu.

⁶ Kong tentang pemimpin-pemimpin jemaat di Yerusalem yang kita baku dapa itu, waktu dorang dengar Kabar Bae yang kita biasa kase tau pa orang-orang, dorang tara suru kita tamba apa-apa. (Biar lagi pemimpin-pemimpin itu orang anggap orang basar, kita tara pusing, karna Tuhan Allah tara pili-pili orang).

⁷ Dorang tara suru tamba apa-apa lagi, mala dorang jadi yakin Tuhan Allah yang kase percaya pa kita untuk kase tau Kabar Bae tentang Yesus Kristus pa orang-orang bukang Yahudi, sama deng Dia me ada kase percaya pa Petrus untuk kase tau pa orang-orang Yahudi.

⁸ Barang, Tuhan Allah yang kase kuasa pa Petrus jadi rasul pa orang-orang Yahudi itu, deng Tuhan Allah itu lagi yang kase kuasa pa kita jadi rasul untuk orang-orang yang bukang Yahudi.

⁹ Yakobus, Petrus deng Yohanes yang orang-orang jaga anggap pemimpin-pemimpin jemaat itu, waktu dorang sandiri jadi sadar Tuhan Allah so kase pa kita tugas kusus itu, dorang pegang tangan pa kita deng pa Barnabas. Dorang pegang tangan itu, jadi tanda dorang satu hati deng torang. Turus, dorang lagi setuju, kita deng Barnabas tetap kase tau Kabar Bae pa orang-orang yang bukang Yahudi, baru dorang tiga itu tetap kase tau Kabar Bae pa orang-orang Yahudi.

¹⁰ Dorang tiga cuma minta pa torang supaya torang tetap inga pa orang-orang miskin deng jaga bantu pa dorang, deng memang itu yang kita suka skali biking.

Paulus togor pa Petrus

¹¹ Satu kali waktu Petrus datang di kota Antiokhia, kita togor pa dia tarang-tarang, barang apa yang dia biking itu sala.

¹² Karna bagini: dia pe biasa dudu makang sama-sama deng sudara-sudara bukang Yahudi yang so percaya pa Yesus. Tapi bagitu orang-orang Yahudi yang Yakobus utus datang dari Yerusalem, Petrus bajao dari orang percaya yang bukang Yahudi itu. Dia so tara makang sama-sama deng dorang lagi, barang dia tako pa dorang orang Yahudi yang suka paksa samua orang percaya dapa sunat.

¹³ Orang-orang Yahudi laeng lagi yang so percaya pa Yesus Kristus, dorang me munafik sama deng Petrus. Dorang tara mau makang lagi deng orang bukang Yahudi, sampe Barnabas me so tapengaru jadi munafik sama deng dorang itu.

¹⁴ Yang dorang biking itu, kita lia tara baku cocok deng Kabar Bae tentang Yesus Kristus. Padahal, cuma Kabar Bae itu yang butul. Jadi kita bilang pa Petrus di samua orang pe muka, “Ngana orang Yahudi, tapi ngana so percaya pa Yesus Kristus, jadi ngana tara musti hidup iko aturan yang orang Yahudi jaga iko. Tapi bikiapa kong ngana paksa orang yang bukang Yahudi hidup iko agama Yahudi pe aturan-aturan untuk jadi percaya pa Yesus Kristus?”

Torang bole jadi orang yang tara sala pa Tuhan Allah pe muka cuma deng percaya pa Yesus Kristus

¹⁵ Kita deng Petrus so memang orang Yahudi dari lahir. Torang tara sama deng orang yang bukang Yahudi. Orang yang bukang Yahudi, dorang itu tara iko aturan di lima kitab Musa, jadi orang Yahudi anggap dorang orang berdosa.

¹⁶ Tapi biar bagitu, torang tau, Tuhan Allah biking orang jadi tara sala pa Dia pe muka bukang karna dorang iko aturan di lima kitab Musa, tapi karna dorang percaya pa Kristus Yesus. Karna itu, torang orang Yahudi, torang me percaya pa Kristus Yesus supaya deng torang pe percaya itu, Tuhan Allah biking torang jadi orang yang tara sala pa Dia pe muka, bukang karna torang ada biking aturan-aturan di lima kitab Musa. Karna di Kitab Suci ada tatulis bagini, “Tara ada orang yang jadi butul pa Tuhan Allah pe muka gara-gara dia ada biking aturan-aturan di lima kitab Musa.”

¹⁷ Torang ini orang Yahudi, kong torang so percaya pa Yesus Kristus karna torang suka Tuhan Allah biking pa torang jadi orang yang tara sala pa Dia pe muka. Tapi jang sampe ada orang yang mo bilang bagini, “Ngoni ini cuma percaya pa Yesus Kristus deng tara iko aturan di lima kitab Musa lagi, jadi ngoni orang yang berdosa, sama saja deng orang bukang Yahudi. Itu sama deng Yesus Kristus ada biking ngoni ini jadi orang berdosa.” Dorang bilang bagitu, itu tara butul!

¹⁸ Karna kalu kita mo bale ulang untuk biking aturan-aturan di lima kitab Musa supaya Tuhan Allah biking kita jadi orang yang tara sala pa Dia pe muka, itu sama deng orang yang ada kase badiri ulang gedung tua yang dia so kase ancor. Kalu kita biking bagitu, itu jelas kita memang butul-butul so berdosa pa Tuhan Allah.

¹⁹ Dulu waktu kita berusaha iko aturan-aturan di lima kitab Musa, kita tara mampo iko samua aturan itu. Karna itu, kita jadi orang yang sala pa Tuhan Allah pe muka. Itu sama deng kita so dapa hukuman mati karna aturan-aturan itu. Tapi skarang, karna Yesus Kristus mati di kayu salib, kita pe hidup yang jaga biking aturan itu sama deng so mati, supaya kita bole bebas untuk hidup kase sanang pa Tuhan Allah. Kong deng Yesus Kristus mati di kayu salib, kita sama deng so mati sama-sama deng Dia.

²⁰ Jadi, skarang kita hidup tara iko kita pe kekuatan sandiri lagi, tapi Yesus Kristus yang hidup deng berkuasa pa kita pe diri. Kong selama kita hidup di dunia skarang ini, kita hidup cuma deng percaya saja pa Anak Allah. Dia yang so sayang pa kita deng yang so serakan Dia pe diri mati untuk kita.

²¹ Tuhan Allah biking torang jadi orang yang tara sala pa Dia pe muka, kong kita tara tolak Dia pe bae itu. Karna kalu saja torang bole jadi orang yang tara sala pa Tuhan Allah pe muka deng cara biking aturan-aturan di lima kitab Musa, itu berarti, Yesus Kristus pe kematian di kayu salib tarada dia pe guna.