Galatia 1 - Perjanjian Baru Bahasa Melayu Maluku Utara

Paulus pe salam

¹ Surat ini dari kita Paulus. Kita ini Yesus Kristus pe utusan yang orang sebut rasul. Kita jadi rasul, bukang karna manusia yang suru, atau karna manusia yang pili pa kita, tapi Yesus Kristus deng Tuhan Allah yang pili pa kita. Tuhan Allah itu suda torang pe Bapa, yang kase hidup ulang pa Yesus Kristus waktu Dia mati.

² Salam untuk ngoni jemaat-jemaat yang ada di daera Galatia. Samua sudara yang percaya yang ada sama-sama deng kita di sini me ada kirim salam pa ngoni!

³ Kita minta pa Tuhan Allah, torang samua pe Bapa, deng pa Tuhan Yesus Kristus, supaya kase yang bae pa ngoni deng salalu biking ngoni pe hati tetap tenang.

⁴ Tuhan Yesus Kristus yang so serakan Dia pe diri untuk tebus torang pe dosa-dosa, supaya Dia bole kase bebas pa torang dari kuasa jahat yang skarang ada di dunia ini. Dia biking samua itu, iko Tuhan Allah, torang pe Bapa pe mau.

⁵ Samua puji deng hormat hanya untuk Tuhan Allah sampe slama-lamanya! Amin.

Paulus togor jemaat Galatia karna dorang so tara iko ajaran yang butul tentang Yesus Kristus

⁶ Sudara-sudara, kita herang skali pa ngoni! Tuhan Allah so pangge pa ngoni untuk jadi Dia pe umat, kong Dia so kase slamat pa ngoni cuma karna Yesus Kristus pe bae pa ngoni. Tapi ngoni pe capat skali tara iko Kabar Bae itu lagi. Ngoni so iko ajaran laeng yang dorang bilang kata, Kabar Bae, padahal bukang.

⁷ Sebenarnya tarada jalang laeng untuk dapa slamat. Tapi ada orang yang kase putar bale Kabar Bae yang butul tentang Yesus Kristus sampe dong biking ngoni pe pikiran jadi kaco.

⁸ Tapi dengar bae-bae! Kalu ada dari torang atau malaekat satu dari sorga yang datang kase tau pa ngoni ajaran yang tara sama deng Kabar Bae tentang Yesus Kristus yang ngoni so tarima dari torang, dia itu suda Tuhan Allah mo kutuk!

⁹ Waktu torang masi ada deng ngoni, torang so perna bilang pa ngoni, kong skarang kita sandiri mo bilang ulang lagi pa ngoni bagini: kalu ada orang yang kase tau pa ngoni ajaran yang tara sama deng Kabar Bae tentang Yesus Kristus yang ngoni so tarima dari torang, dia suda yang Tuhan Allah mo kutuk!

¹⁰ Kita bilang bagitu, kita tara maksut supaya dapa puji dari manusia. Tapi kita cuma suka cari dapa puji dari Tuhan Allah. Mangkali ada dari ngoni yang pikir, kita cuma mo biking sanang manusia pe hati? Tarada kasiang. Kalu saja kita cuma suka mo biking sanang manusia pe hati, itu berarti, kita ini bukang orang yang jaga biking apa yang Yesus Kristus suru.

Paulus carita bagimana dia jadi rasul

¹¹ Sudara-sudara, ngoni musti tau, Kabar Bae tentang Yesus Kristus yang kita so perna kase tau pa ngoni, itu bukang dari manusia.

¹² Karna Kabar Bae itu kita tara tarima dari manusia, deng bukang lagi manusia yang kase ajar itu pa kita, tapi Yesus Kristus sandiri yang bilang langsung pa kita.

¹³ Tantu ngoni so dengar tentang kita pe hidup dulu waktu kita masi iko aturan agama Yahudi. Waktu itu, kita sandiri yang kase siksa Tuhan Allah pe jemaat deng kita berusaha karas la bisa kase abis pa dorang.

¹⁴ Kita banya skali balajar tentang aturan-aturan agama Yahudi deng kita jaga biking aturan itu. Jadi kalu mo kase banding deng orang Yahudi yang satu umur deng kita, kita yang paling jago. Kita memang butul-butul iko samua aturan yang kita pe orang tua dulu-dulu jaga iko.

¹⁵ Tapi Tuhan Allah yang so pili pa kita waktu kita masi ada di kita pe mama pe dalam puru. Kong di waktu yang Dia so tentukan, Dia pangge pa kita jadi Dia pe utusan yang orang sebut rasul. Dia pangge pa kita bagitu, karna Dia pe bae pa kita.

¹⁶ Waktu Tuhan Allah pangge pa kita itu, deng sanang hati Dia kase lia Dia pe Anak, la kita kanal sapa Dia supaya kita bole kase tau pa orang-orang yang bukang Yahudi tentang Dia pe Anak itu. Kong waktu kita so abis lia Dia pe Anak, kita tara minta pa sapa-sapa untuk bantu pa kita kase mangarti Kabar Bae tentang Yesus Kristus itu, karna kita so tarima langsung dari Dia.

¹⁷ Kita me tara pigi di kota Yerusalem la baku dapa deng rasul-rasul yang so kamuka jadi rasul dari kita supaya dorang bole bantu pa kita untuk biking lebe mangarti tentang Kabar Bae itu. Tarada! Tapi kita pigi di tana Arab, abis itu kita bale ulang di kota Damsyik.

¹⁸ Kong nanti waktu so lewat tiga taong, kita pigi di kota Yerusalem untuk baku dapa deng Petrus. Kita tinggal deng dia lima blas hari.

¹⁹ Tapi waktu itu, kita tara baku dapa deng rasul-rasul yang laeng. Kita cuma baku dapa deng Yakobus, Tuhan Yesus pe sudara.

²⁰ Sudara-sudara, samua yang kita tulis tentang kita pe diri ini memang butul, Tuhan Allah tau kita tara bafoya.

²¹ Kong abis di Yerusalem itu, kita pigi di daera Siria deng daera Kilikia.

²² Sampe waktu itu, kita bolong sempat baku dapa deng jemaat-jemaat di daera Yudea yang so percaya pa Yesus Kristus, jadi dorang bolong kanal pa kita.

²³ Dorang cuma dengar carita tentang kita yang bagini, “Orang yang dulu jaga siksa pa torang, skarang ini dia so jaga kase tau Kabar Bae pa orang-orang la dorang percaya pa Tuhan Yesus. Padahal dulu dia itu suda yang mo kase abis pa torang yang percaya pa Tuhan Yesus.”

²⁴ Pe dengar itu, dorang puji deng hormat pa Tuhan Allah karna apa yang Tuhan Allah so biking dalam kita pe hidup.