Filipi 2 - Perjanjian Baru Bahasa Melayu Maluku Utara

Nasehat supaya jemaat pe sifat iko sama deng Yesus Kristus pe sifat

¹ Sudara-sudara, ngoni so percaya pa Yesus Kristus, jadi Dia so biking ngoni pe hati kuat. Ngoni pe hati sanang karna Dia sayang pa ngoni. Ngoni so hidup satu hati satu deng yang laeng karna Roh Kudus yang pimpin pa ngoni. Ngoni me baku-baku sayang, deng ada rasa kasiang satu deng yang laeng.

² Jadi, ngoni biking suda kita pe hati lebe tamba sanang deng cara bagini: ngoni musti hidup satu hati deng satu pikiran, ngoni musti lebe baku-baku sayang, ngoni musti ada hubungan dekat satu deng yang laeng, deng ngoni lagi musti hidup deng satu tujuan.

³ Jang ngoni biking satu barang cuma untuk kase sanang ngoni pe diri sandiri, atau supaya ngoni dapa puji. Tapi lebe bae, ngoni hidup tara basombong. Yang satu musti anggap yang laeng lebe penting dari dia pe diri.

⁴ Jang ngoni cuma pikir diri sandiri saja, tapi ngoni musti pikir pa orang laeng lagi.

⁵ Kong ngoni pe sifat musti sama deng Kristus Yesus pe sifat yang macam bagini:

⁶ Biar Dia itu sama persis deng Tuhan Allah, tapi Dia tara pusing deng Dia pe posisi itu la jadi alasan pa Dia untuk mo batahang deng Dia pe posisi itu.

⁷ Mala, Dia kase tinggal samua-samua itu, turus datang di dunia jadi sama deng manusia biasa, kong biking Dia pe diri jadi sama deng orang karja yang cuma biking apa yang Tuhan Allah suru.

⁸ Kong waktu Dia jadi manusia, Dia biking Dia pe diri macam deng orang yang tarada arti apa-apa, Dia biking Tuhan Allah pe mau sampe Dia mati, mala sampe mati di kayu salib.

⁹ Karna itu suda sampe Tuhan Allah kase pa Dia posisi yang paling tinggi dari samua-samua, kong kase pa Dia kuasa yang lebe basar dari samua kuasa yang ada,

¹⁰ supaya deng Dia pe kuasa itu, samua mo berlutut semba pa Dia: samua yang ada di sorga, samua yang ada di bumi, deng samua yang ada di tampa orang mati.

¹¹ Dorang samua mo mangaku, “Yesus Kristus itu suda Tuhan.” Deng bagitu Tuhan Allah torang pe Bapa, mo dapa puji deng hormat!

Ngoni pe kalakuang musti bae sama deng bintang-bintang yang kase tarang dunia ini

¹² Sudara-sudara yang kita sayang, waktu kita ada sama-sama deng ngoni, ngoni salalu dengar-dengaran pa Tuhan Allah. Lebe-lebe skarang kita so jao dari ngoni, jadi ngoni musti tetap dengar-dengaran pa Dia. Ngoni musti berusaha turus hidup deng kalakuang yang pantas untuk orang yang so dapa slamat dari dosa-dosa. Ngoni hidup bagitu deng rasa tako deng hormat pa Tuhan Allah.

¹³ Barang, Tuhan Allah sandiri yang bakarja di ngoni pe hati, supaya ngoni mau deng mampo iko apa yang Dia ingin ngoni biking.

¹⁴ Apa saja yang ngoni biking, biking suda itu kong jang mengelu-mengelu deng jang baku-baku malawang,

¹⁵ supaya ngoni hidup deng hati bersi, deng tarada orang yang bisa kase sala pa ngoni. Kalu ngoni pe hidup macam bagitu, orang akan lia ngoni pe bae itu sama deng dong lia bintang-bintang yang kase tarang dunia ini. Itu akan jadi jelas pa orang-orang, ngoni memang Tuhan Allah pe ana-ana yang tarada sala di tenga-tenga orang yang jahat deng orang yang tara tau apa yang butul.

¹⁶ Ngoni pegang kuat suda Tuhan Allah pe firman yang bole biking orang hidup deng Tuhan Allah slama-lamanya. Kalu ngoni hidup bagitu, nanti kita pe hati bole sanang waktu Yesus Kristus datang ulang yang kedua kali, karna ngoni butul-butul percaya pa Yesus Kristus. Kong karna ngoni pe percaya itu, kita bole tau, kita pe usaha kase tau Kabar Bae pa ngoni di dunia ini tara sia-sia, tapi ada dia pe hasil.

¹⁷ Dulu waktu pertama kita kase tau Kabar Bae tentang Yesus Kristus pa ngoni, ngoni jadi percaya deng ngoni kase ngoni pe diri untuk biking Dia pe mau. Jadi biar lagi orang mo bunu pa kita nanti gara-gara kita so kase tau Kabar Bae, itu tara apa-apa. Barang, itu sama deng kita pe dara so tatumpa untuk jadi korban persembahan pa Tuhan Allah. Jadi biar kita pe dara tatumpa sampe mati, kita pe hati tetap sanang deng kita rasa sanang sama-sama deng ngoni samua.

¹⁸ Bagitu lagi deng ngoni. Ngoni pe hati musti iko sanang, deng ngoni musti rasa sanang sama-sama deng kita.

Timotius deng Epafroditus pe tugas

¹⁹ Kita baharap pa Tuhan Yesus, so tara lama lagi kita bole suru Timotius pigi lia pa ngoni. Deng bagitu, waktu dia bale pa kita, kita bisa tau ngoni pe kabar dari dia la kita pe hati jadi sanang.

²⁰ Kita suru dia pigi pa ngoni itu, karna yang satu hati deng satu pikiran deng kita, cuma Timotius saja. Dia itu yang butul-butul pikir ngoni pe bae.

²¹ Dorang yang laeng itu cuma pikir dong pe diri sandiri saja. Dorang tara pusing deng Yesus Kristus pe mau.

²² Tapi Timotius itu so berusaha karas bantu pa kita kase tau Kabar Bae tentang Yesus Kristus, sama deng ana bantu dia pe papa. Karna ngoni sandiri so lia Timotius bagitu, ngoni so tau Timotius itu bae.

²³ Jadi, bagitu kita tau kita pe perkara ini pe hasil bagimana nanti, kita harap kita langsung mo suru dia pigi pa ngoni.

²⁴ Kong kita yakin, Tuhan nanti tolong pa kita supaya so tara lama lagi kita sandiri yang mo pigi pa ngoni.

²⁵ Turus tentang Epafroditus, torang pe sudara satu yang sama-sama percaya, kita rasa lebe bae kita suru dia pulang ulang pa ngoni. Dulu, dia yang perna ngoni kase tugas untuk bantu kita pe karja di sini, kong dia so berusaha karas sama-sama deng kita.

²⁶ Kita kirim dia pa ngoni, barang dia itu so inga skali pa ngoni samua di situ, kong dia lagi pe hati susa skali, karna ngoni so dengar kabar, dia ada saki.

²⁷ Memang butul dia perna dapa saki, sampe amper mo mati. Tapi Tuhan Allah kasiang pa dia, deng bukang cuma pa dia saja, tapi pa kita lagi, supaya kita tara tatamba hati susa kalu jadi apa-apa deng dia.

²⁸ Kita ingin skali mo suru dia capat-capat pulang pa ngoni, supaya kalu ngoni lia pa dia, ngoni jadi sanang lagi, deng kita pe hati me jadi tenang.

²⁹ Jadi, kita minta pa ngoni, tarima suda pa dia deng hati yang paling sanang, karna dia itu ngoni pe sudara yang sama-sama deng ngoni so satu hati deng Tuhan. Ngoni me musti hormati pa orang-orang yang sama deng dia itu.

³⁰ Barang, dia jaga biking apa yang Yesus Kristus suru, kong dia amper-amper mo mati waktu biking tugas itu. Dia tara peduli, dia mo hidup ka, mati ka, barang dia suka mo bantu pa kita. Dia sama deng ngoni pe pengganti untuk bantu pa kita karna kita jao dari ngoni skarang.