Filemon 1 - Perjanjian Baru Bahasa Melayu Maluku Utara

Paulus pe salam

¹ Filemon, torang pe tamang satu karja yang kita sayang! Salam dari kita Paulus. Kita kirim surat ini dari dalam penjara. Kita di sini gara-gara kita ada kase tau Kabar Bae tentang Kristus Yesus pa orang-orang. Kita deng Timotius, torang pe sudara yang sama-sama percaya, yang ada tulis surat ini pa ngana, Filemon.

² Surat ini torang tulis lagi pa Apfia, torang pe sudara parampuang yang sama-sama percaya pa Tuhan, deng pa Arkhipus, torang pe tamang yang sama-sama karja karas untuk kase tau tentang Tuhan Yesus pa orang-orang. Deng surat ini lagi untuk jemaat yang biasa jaga bakumpul untuk sambayang di ngana pe ruma.

³ Kita minta pa Tuhan Allah, torang pe Bapa, deng pa Tuhan Yesus Kristus, supaya kase yang pe bae pa ngoni, deng salalu biking ngoni pe hati tetap tenang.

Paulus bilang tarimakasi pa Tuhan Allah karna Filemon pe percaya deng pe sayang

⁴ Filemon, waktu kita berdoa, kita salalu inga pa ngana, deng kita bilang tarimakasi pa Tuhan Allah yang kita jaga semba.

⁵ Barang kita dengar, ngana butul-butul percaya pa Tuhan Yesus deng ngana sayang pa samua orang yang so jadi Tuhan Allah pe umat.

⁶ Deng kita berdoa, supaya ngoni yang so percaya bole lebe tamba hidup satu hati satu deng yang laeng. Kong karna itu, ngoni bole lebe mangarti samua Tuhan pe bae yang Dia kase pa ngoni karna ngoni so satu hati deng Yesus Kristus.

⁷ Filemon, kita pe sudara, ngana pe sayang pa orang-orang yang so jadi Tuhan Allah pe umat, itu yang biking kita sanang skali. Kong itu biking kita pe hati jadi lebe kuat, karna ngana so biking dorang pe hati jadi sanang ulang.

Paulus minta pa Filemon supaya tarima ulang pa Onesimus

⁸ Filemon, Yesus Kristus ada kase kuasa pa kita, karna itu kita bole mo suru pa ngana untuk biking apa yang musti ngana biking.

⁹ Tapi kita inga ngana pe sayang pa orang-orang percaya. Karna itu, kita tara mo suru-suru pa ngana, tapi kita lebe suka minta pa ngana. Kita ini so tua, deng apalagi skarang kita me ada dapa kase maso dalam penjara karna kita kase tau tentang Kristus Yesus pa orang-orang.

¹⁰ Kita minta tolong pa ngana tentang Onesimus, ngana pe orang karja yang ngana bili itu. Waktu dia datang lia pa kita di dalam penjara, kita kase tau pa dia tentang Tuhan Yesus kong dia so jadi percaya. Karna itu, kita so anggap dia sama deng kita pe ana sandiri.

¹¹ Memang dulu, dia tara ada guna pa ngana kong so lari dari ngana. Tapi skarang, dia so ada guna skali, bukang cuma pa ngana tapi pa kita lagi.

¹² Skarang, Onesimus yang kita sayang itu, kita kase pulang ulang pa ngana.

¹³ Sebenarnya kalu mo iko kita pe mau, kita mo tahang pa dia di sini supaya dia ganti pa ngana bantu pa kita, sementara kita ada di dalam penjara ini, karna kita kase tau Kabar Bae tentang Yesus Kristus.

¹⁴ Tapi kalu ngana tara setuju, kita tara mo suru dia tinggal la bantu deng kita di sini. Kita mau ngana sandiri yang suru pa dia, supaya tara kantara kita paksa pa ngana la suru dia tinggal.

¹⁵ Kita pikir, kaapa ini suda dia pe alasan sampe ngana deng dia dapa kase pisa untuk babarapa waktu, supaya dia bole jadi percaya pa Tuhan Yesus, kong ngana bole tarima ulang pa dia untuk sama-sama deng ngana turus-turus.

¹⁶ Jadi skarang ngana tarima ulang pa dia. Dia bukang cuma ngana pe orang karja saja, tapi lebe dari itu, dia me so jadi ngana pe sudara yang sama-sama percaya. Ngana sayang pa dia, sama deng kita so sayang pa dia. Ngana sayang pa dia karna dia itu ngana pe orang karja, deng dia itu lagi ngana pe sudara yang sama-sama percaya pa Tuhan.

¹⁷ Jadi Filemon, kalu ngana anggap kita ini ngana pe tamang yang sama-sama percaya pa Tuhan, kita harap kalu dia bale ulang pa ngana, ngana mau tarima pa dia sama deng ngana ada tarima pa kita sandiri.

¹⁸ Deng, kalu dia so perna kase rugi pa ngana atau dia ada utang pa ngana, biar nanti kita yang tanggung samua itu.

¹⁹ Justru skarang ini, kita mo tulis ini deng kita pe tangan sandiri, “Kita ini, Paulus, mo bayar Onesimus pe utang itu pa ngana.” Itu jadi bukti pa ngana. Tantu kita tara perlu mo kase inga pa ngana, ngana jadi percaya pa Tuhan Yesus karna kita yang kase tau Kabar Bae pa ngana, itu sama deng ngana itu ada bautang pa kita.

²⁰ Jadi, kita pe sudara Filemon, kita minta pa ngana yang percaya pa Tuhan supaya ngana tarima suda pa Onesimus. Torang dua ini so sama-sama percaya Kristus Yesus, kong kalu ngana tarima pa Onesimus, kita pe hati pasti sanang.

²¹ Kita tulis surat ini karna kita yakin, pasti ngana biking apa yang kita minta. Kita tau, ngana akan biking lebe dari apa yang kita ada minta pa ngana.

²² Sementara itu, kita minta tolong supaya ngana kase siap kamar satu untuk kita pake di ngana pe ruma. Karna kita baharap deng yakin, Tuhan Allah mo jawab ngoni pe doa supaya kita bole mo kaluar dari penjara ini kong mo sama-sama ulang deng ngoni samua.

Paulus pe ahir surat

²³ Epafras ada kirim salam pa ngana. Dia itu kita pe tamang yang sama-sama dapa tahang dalam penjara karna dia me jaga biking apa yang Kristus Yesus suru.

²⁴ Deng ada salam lagi dari Markus, Aristarkhus, Demas deng Lukas. Dorang itu kita pe tamang yang sama-sama jaga kase tau Kabar Bae tentang Yesus Kristus pa orang-orang.

²⁵ Kita minta supaya Tuhan Yesus Kristus kase Dia pe bae pa ngoni.