Efesus 3 - Perjanjian Baru Bahasa Melayu Maluku Utara

Paulus carita tentang dia pe tugas pa orang-orang yang bukang Yahudi

¹ Sudara-sudara, kita Paulus dapa kase maso di penjara, barang kita kase tau Kabar Bae tentang Kristus Yesus untuk ngoni orang-orang bukang Yahudi.

² Pasti ngoni so dengar, Tuhan Allah pe bae pa kita sampe Dia so kase tugas pa kita untuk kase tau Kabar Bae tentang Yesus Kristus pa ngoni.

³ Memang, dulu bolong ada orang yang tau tentang Tuhan Allah pe rencana pa orang-orang bukang Yahudi. Tapi skarang, Tuhan Allah pe Roh Kudus so kase tau Dia pe rencana itu pa kita. Kong kita so tulis tentang Tuhan Allah pe rencana itu di surat ini, tapi cuma pende saja.

⁴ Kong kalu ngoni baca surat ini, ngoni akan mangarti Tuhan Allah pe rencana tentang Yesus Kristus itu sama deng yang kita tau.

⁵ Dulu, Tuhan Allah bolong kase tau Dia pe rencana itu pa orang-orang, tapi skarang Dia pe Roh so pili pa kita supaya kase tau Dia pe rencana itu pa orang-orang yang Dia so pili. Dorang itu, Yesus Kristus pe utusan-utusan yang orang sebut rasul-rasul, deng pa nabi-nabi yang jaga kase turus Tuhan Allah pe pasáng.

⁶ Tuhan Allah pe rencana itu bagini: ngoni orang-orang yang bukang Yahudi akan percaya Kabar Bae tentang Yesus Kristus, jadi ngoni me bole sama-sama deng orang-orang Yahudi jadi Dia pe ana-ana yang tarima samua yang Tuhan Allah so janji. Ngoni orang bukang Yahudi deng torang orang Yahudi so jadi satu sama deng jadi satu badan. Kong torang samua itu mo dapa yang Tuhan Allah janji pa torang yang so percaya pa Kristus Yesus.

⁷ Tuhan Allah pe bae pa kita sampe Dia kase tugas pa kita untuk kase tau Kabar Bae tentang Yesus Kristus pa orang-orang. Dia pe bae pa kita itu bantu pa kita supaya kita bole biking tugas itu pake Tuhan Allah pe kuasa yang bakarja di kita pe hati.

⁸ Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

⁹ Tuhan Allah yang biking samua-samua yang ada, Dia itu yang kase tugas itu pa kita, supaya samua orang dapa lia jelas Tuhan Allah pe rencana yang so deng ratus-ratus taong Dia bolong kase tau itu so jadi.

¹⁰ Tuhan Allah pe maksut supaya samua yang bapimpin deng yang berkuasa di langit bole tau, Tuhan Allah itu tau samua hal deng tara perna abis akal untuk ator samua yang ada. Dorang bole tau itu karna dorang lia Dia biking orang Yahudi deng orang bukang Yahudi jadi satu karna skarang dorang so percaya pa Yesus Kristus.

¹¹ Tuhan Allah biking dorang jadi satu itu iko apa yang Dia so rencana dari dulu, waktu Dia bolong biking dunia ini. Kong Dia pe rencana itu bole jadi karna apa yang Kristus Yesus torang pe Tuhan so biking.

¹² Kong karna torang so percaya pa Yesus Kristus, torang dapa pintu maso untuk badekat pa Tuhan Allah, deng torang tara usa tako tapi bole yakin Dia akan tarima pa torang.

¹³ Jadi, kita minta pa ngoni, biar ngoni dengar kita menderita deng sengsara gara-gara kita kase tau Kabar Bae tentang Yesus Kristus pa ngoni, jang ngoni hati susa, karna siksa yang kita rasa itu dia pe tujuan supaya ngoni bole dapa puji deng hormat.

Paulus pe doa supaya orang mangarti butul-butul Yesus Kristus pe sayang

¹⁴ Jadi sudara-sudara, waktu kita inga Tuhan Allah pe bae yang Dia so kase pa ngoni itu, kita berlutut berdoa pa Tuhan Allah torang pe Bapa.

¹⁵ Dia itu suda yang jadi Bapa untuk torang samua yang percaya yang ada di dunia deng di sorga, kong Dia so biking torang jadi sama deng satu keluarga.

¹⁶ Kita minta pa Tuhan Allah yang paling hebat la Dia pe Roh pe kuasa kase kuat ngoni pe hati,

¹⁷ supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

¹⁸ Kita minta pa Tuhan Allah supaya ngoni deng samua orang yang so jadi Tuhan Allah pe umat, bole mangarti pe basar skali Yesus Kristus pe sayang pa torang. Dia pe sayang yang basar itu, torang tara bisa ukur dia pe lebar, dia pe panjang, dia pe tinggi deng dia pe dolom,

¹⁹ kong Dia pe sayang itu, lebe basar dari apa yang torang pikir. Kita minta pa Tuhan Allah la ngoni bole butul-butul mangarti Yesus Kristus pe sayang itu, supaya orang lebe tamba dapa lia Tuhan Allah pe sifat pa ngoni pe hidup.

²⁰ Tuhan Allah pe kuasa yang bakarja pa torang pe hidup itu paling basar skali, kong deng Dia pe kuasa itu Dia bisa biking lebe dari apa yang torang minta, deng lebe dari apa yang torang pikir.

²¹ Jadi, torang yang so jadi Dia pe jemaat, torang yang so satu hati deng Kristus Yesus, mari suda torang puji deng hormat pa Dia sampe slama-lamanya. Amin.