Efesus 2 - Perjanjian Baru Bahasa Melayu Maluku Utara

Tuhan Allah kase slamat pa torang karna Dia pe bae

¹ Sudara-sudara, dulu waktu ngoni bolong percaya pa Yesus Kristus, ngoni jaga biking dosa deng jaga langgar Tuhan Allah pe parenta, ngoni itu sama deng orang yang so mati.

² Waktu itu, ngoni hidup masi suka biking dosa sama deng orang yang bolong kanal pa Tuhan Allah, baru ngoni lagi iko Iblis pe mau. Iblis itu setang-setang pe raja yang berkuasa di udara, deng dia itu suda yang skarang ini ada pengaru pa orang-orang yang tara dengar-dengaran pa Tuhan Allah.

³ Dulu torang samua itu sama deng dorang lagi, torang hidup cuma iko manusia pe mau yang suka biking dosa, deng torang cuma iko torang pe keinginan deng pikiran yang tara bae. Sebenarnya torang pantas dapa hukum dari Tuhan Allah, karna yang torang biking itu jahat, sama deng samua orang di dunia jaga biking.

⁴ Tapi Tuhan Allah pe rasa kasiang pa torang itu basar skali. Karna itu, Dia sayang skali pa torang.

⁵ Waktu torang masi jaga langgar Tuhan Allah pe parenta, itu bole mo kase sama deng torang so mati. Tapi biar bagitu, waktu Tuhan Allah kase hidup ulang pa Yesus Kristus, itu sama deng Dia so kase hidup ulang pa torang. Jadi, Dia kase slamat pa torang dari dosa-dosa cuma karna Dia pe bae pa torang.

⁶ Barang, sama deng Kristus Yesus mati kong Tuhan Allah kase hidup ulang pa Dia, itu lagi yang jadi deng torang yang so satu hati deng Kristus Yesus. Tuhan Allah so kase torang hidup deng cara yang baru kong Dia kase pa torang tampa untuk berkuasa sama-sama deng Kristus Yesus di sorga.

⁷ Tuhan Allah biking bagitu, supaya mulai dari sini ka sana orang-orang bole dapa tau Tuhan Allah pe bae deng pe sayang yang talebe-lebe, yang Dia kase pa torang karna torang so satu hati deng Kristus Yesus.

⁸ Tuhan Allah kase slamat pa torang yang so percaya pa Yesus Kristus karna Dia pe bae pa torang. Dia kase slamat pa torang dari dosa-dosa bukang karna torang pe usaha biking barang yang bae, tapi Dia kase slamat itu deng cuma-cuma pa torang.

⁹ Jadi, tarada orang yang bole basombong bilang kata, karna dia pe usaha biking barang yang bae sampe dia dapa slamat.

¹⁰ Barang, Tuhan Allah yang biking torang jadi manusia yang pe hidup so tara sama deng dulu lagi karna torang so satu hati deng Kristus Yesus. Tuhan Allah kase torang hidup deng cara yang baru supaya torang bole biking barang yang bae, yang Dia so rencana dari dulu untuk torang.

Yesus Kristus kase baku bae orang Yahudi deng orang bukang Yahudi

¹¹ Sudara-sudara, coba ngoni inga ngoni pe hidup yang dulu. Mulai dari lahir, ngoni bukang orang Yahudi, jadi orang-orang Yahudi hina pa ngoni, bilang ngoni itu bukang Tuhan Allah pe umat, barang ngoni tara dapa sunat sama deng dorang. Padahal sunat itu cuma manusia sandiri yang biking di badan.

¹² Waktu itu, ngoni tara tau sama skali sapa itu Yesus Kristus. Ngoni itu orang asing yang bukang dari bangsa Israel. Jadi ngoni bukang Tuhan Allah pe umat yang Dia pili, deng ngoni tara akan dapa apa yang Tuhan Allah janji pa orang Israel. Ngoni hidup di dunia ini tara ada hubungan deng Tuhan Allah, jadi ngoni tara bisa baharap pa sapa-sapa supaya bole dapa slamat dari dosa-dosa.

¹³ Tapi skarang, karna ngoni so satu hati deng Kristus Yesus, ngoni so tara sama deng dulu waktu ngoni pe hidup masi jao dari Tuhan Allah. Skarang Tuhan Allah so biking ngoni jadi dekat deng Dia karna Yesus Kristus pe dara so tatumpa di kayu salib.

¹⁴ Barang, Yesus Kristus itu suda yang biking torang samua pe hubungan deng Tuhan Allah jadi bae-bae ulang, supaya torang orang Yahudi deng ngoni orang yang bukang Yahudi jadi baku bae-bae ulang kong jadi satu. Dulu, torang orang Yahudi deng ngoni orang yang bukang Yahudi baku musu sama deng ada pagar tembok basar yang kase pisa pa torang. Tapi waktu Yesus mati di kayu salib, itu sama saja deng Dia so kase ancor pagar itu.

¹⁵ Skarang, karna deng Yesus Kristus mati di kayu salib, Dia biking supaya torang yang percaya pa Dia tara perlu lagi iko aturan-aturan di lima kitab Musa untuk dapa slamat dari dosa-dosa. Kong karna itu, torang orang Yahudi yang jaga iko aturan itu, deng ngoni orang yang bukang Yahudi yang tara iko aturan itu, bole jadi satu kelompok yang baru karna torang samua so satu hati deng Yesus Kristus, kong Dia biking torang bole hidup baku bawa bae-bae.

¹⁶ Jadi, deng Yesus Kristus so mati di kayu salib, Dia biking torang orang-orang Yahudi deng ngoni orang-orang bukang Yahudi pe hubungan so bae-bae ulang deng Tuhan Allah, kong torang samua so tara baku musu lagi.

¹⁷ Itu yang biking sampe Yesus Kristus datang di dunia ini. Dia datang kase tau Kabar Bae yang biking orang bole baku bae deng Tuhan Allah. Dia kase tau itu pa orang-orang bukang Yahudi yang dulu jao dari Tuhan Allah deng pa orang-orang Yahudi yang dulu dekat deng Tuhan Allah.

¹⁸ Barang, karna Yesus Kristus itu, torang samua dapa pintu maso untuk badekat pa Tuhan Allah torang pe Bapa. Kong Roh Kudus yang ada pa torang samua pe hati itu suda yang tolong pa torang untuk badekat deng Dia.

¹⁹ Jadi sudara-sudara yang bukang Yahudi, ngoni itu bukang lagi sama deng orang asing atau orang pendatang, tapi ngoni itu so jadi Tuhan Allah pe umat, deng ngoni itu so termasuk Tuhan Allah pe keluarga.

²⁰ Skarang torang yang so jadi Tuhan Allah pe keluarga bole kase sama deng ruma yang Tuhan Allah ada kase badiri. Kong kalu orang kase badiri satu ruma, musti taru kamuka batu yang paling penting di fandasi itu untuk kase kuat ruma itu. Kristus Yesus itu bole kase sama deng batu yang paling penting di fandasi itu. Kong ada Yesus Kristus pe utusan yang orang sebut rasul-rasul, deng ada lagi nabi-nabi yang jaga kase turus Tuhan Allah pe pasáng, dorang itu bole kase sama deng ruma pe tiang-tiang.

²¹ Torang yang so satu hati deng Yesus Kristus, Dia so biking torang jadi Dia pe umat yang hidup cuma biking Dia pe mau, itu sama deng bahan-bahan ruma yang ada kase susun di atas batu fandasi yang kuat itu sampe jadi satu ruma yang ada kase kusus untuk Tuhan Allah tinggal.

²² Jadi skarang, karna torang so jadi satu hati deng Yesus Kristus, biar dari bangsa mana saja, Dia biking torang samua jadi satu, sama deng satu ruma, kong di situ tampa untuk Tuhan Allah pe Roh tinggal.