Efesus 1 - Perjanjian Baru Bahasa Melayu Maluku Utara

Paulus pe salam

¹ Sudara-sudara yang so jadi Tuhan Allah pe umat di kota Efesus, ngoni yang so percaya pa Kristus Yesus. Salam dari kita Paulus. Kita ini Kristus Yesus pe utusan yang orang sebut rasul, kong kita jadi rasul karna Tuhan Allah pe mau.

² Kita minta pa Tuhan Allah, torang samua pe Bapa deng pa Tuhan Yesus Kristus, supaya yang kase bae pa ngoni, deng salalu biking ngoni pe hati tetap tenang.

Tuhan Allah kase Dia pe bae pa torang

³ Mari suda torang puji pa Tuhan Allah, torang pe Tuhan Yesus Kristus pe Bapa! Dia so kase sagala berkat rohani dari sorga pa torang, karna torang so percaya pa Yesus Kristus.

⁴ Barang, dulu waktu Tuhan Allah bolong biking dunia ini, Dia so pili pa torang untuk percaya pa Yesus Kristus supaya torang bole jadi Tuhan Allah pe umat yang pe hati bersi, deng tarada sala pa Dia pe muka.

⁵ Tuhan Allah sayang pa torang, kong karna itu, dari dulu Dia so ada rencana untuk kase jadi torang Dia pe ana-ana. Torang jadi Dia pe ana-ana itu karna apa yang Yesus Kristus biking, kong memang itu suda yang Tuhan Allah ingin biking.

⁶ Jadi mari suda, torang puji pa Tuhan Allah karna Dia so kase Dia pe bae yang hebat itu pa torang. Dia kase Dia pe bae itu karna torang so percaya pa Yesus Kristus yang Dia sayang.

⁷ Barang, deng Yesus Kristus mati kong Dia pe dara tatumpa untuk tebus pa torang, torang bole dapa ampun dari torang pe dosa-dosa. Samua itu torang dapa, karna Tuhan Allah pe bae yang basar skali pa torang.

⁸ Dia pe bae itu Dia kase talebe-lebe pa torang, kong Dia biking torang bijaksana deng biking torang mangarti banya hal tentang Dia pe rencana.

⁹ Dulu, tarada orang yang tau Dia pe rencana itu, tapi skarang Dia so kase tau pa torang. Dia pe rencana itu tentang Yesus Kristus, kong rencana itu suda yang Dia ingin biking dari dulu.

¹⁰ Dia pe rencana itu bagini: kalu so sampe dia pe waktu yang Tuhan Allah so tentukan, Dia mo biking samua yang ada di sorga deng di bumi jadi satu, kong Yesus Kristus yang berkuasa pa samua itu.

¹¹ Tuhan Allah ator samua yang ada itu, iko Dia pe mau yang Dia so tentukan. Dari dulu, Dia so pili pa torang supaya torang bole tarima apa yang Dia so janji mo kase pa torang karna torang percaya pa Yesus Kristus.

¹² Jadi torang orang Yahudi yang so kamuka baharap pa Yesus Kristus, torang bole puji deng hormat pa Tuhan Allah yang hebat.

¹³ Kong ngoni orang-orang yang bukang Yahudi, skarang ngoni me so dengar ajaran yang butul kong so jadi percaya pa Yesus Kristus. Ajaran yang butul itu, Kabar Bae tentang Yesus Kristus yang so kase slamat pa ngoni dari dosa-dosa. Kong waktu ngoni percaya pa Yesus Kristus, Tuhan Allah kase Roh Kudus pa ngoni supaya jadi tanda ngoni itu so jadi Tuhan Allah punya. Roh Kudus itu suda yang Tuhan Allah so janji dari dulu.

¹⁴ Roh Kudus itu jadi tanda, torang akan dapa samua hal yang Tuhan Allah janji untuk torang, karna torang ini yang so jadi Tuhan Allah punya. Dia so kase janji itu pas di waktu yang Dia so tentukan untuk kase bebas pa torang dari samua-samua yang jahat. Karna itu, mari suda torang puji pa Tuhan Allah yang hebat itu.

Paulus berdoa supaya orang mangarti Tuhan Allah itu hebat

¹⁵ Jadi, waktu kita dengar ngoni pe percaya pa Tuhan Yesus deng ngoni pe sayang pa samua orang yang so jadi Tuhan Allah pe umat,

¹⁶ kita tara berenti-berenti bilang tarimakasi banya pa Tuhan Allah karna ngoni. Deng waktu kita berdoa, kita salalu inga pa ngoni.

¹⁷ Kita berdoa pa Tuhan Allah, torang pe Tuhan Yesus Kristus pe Bapa yang hebat. Kita minta supaya Dia pe Roh pe kuasa buka ngoni pe pikiran deng biking ngoni lebe mangarti tentang Tuhan Allah, sampe ngoni kanal pa Dia lebe dalam lagi.

¹⁸ Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

¹⁹ Kong kita minta lagi pa Tuhan Allah, supaya Dia biking ngoni mangarti pe hebat skali Dia pe kuasa yang bakarja pa torang yang percaya pe hati. Kuasa yang ada pa torang itu luar biasa skali,

²⁰ sama deng kuasa yang Dia pake waktu kase hidup ulang pa Yesus Kristus. Kong deng kuasa itu lagi Dia angka pa Yesus Kristus dudu di tampa yang terhormat, pa Dia pe sabla kanan di sorga.

²¹ Kong kuasa yang so ada pa Yesus Kristus itu paling basar skali, lebe basar dari samua kuasa deng dari samua yang berkuasa di langit deng di bumi. Kong Dia pe kuasa itu lebe basar dari samua-samua yang ada, bukang cuma skarang ini saja, tapi sampe slama-lamanya.

²² Tuhan Allah kase kala samua-samua yang ada, supaya samua-samua itu ada di bawa Yesus Kristus pe kuasa. Deng Tuhan Allah biking Yesus Kristus jadi kapala pa samua orang yang percaya pa Dia.

²³ Kong orang-orang percaya itu bole kase sama deng Dia pe badan. Dia itu sama deng torang pe kapala yang biking torang ini jadi lengkap. Jadi, Yesus Kristus itu suda yang kase apa yang Dia punya pa Dia pe jemaat. Kong Dia me yang berkuasa pa samua-samua yang ada di mana saja.