3 Yohanes 1 - Perjanjian Baru Bahasa Melayu Maluku Utara

Yohanes sanang karna Gayus setia pa Tuhan

¹ Kita pe tamang Gayus, yang butul-butul kita sayang. Salam dari kita Yohanes, penatua di jemaat.

² Kita pe sudara yang kita sayang, kita berdoa supaya ngana sehat-sehat deng bae-bae dalam samua hal, sama deng ngana pe percaya yang kuat.

³ Kita sanang skali waktu torang pe sudara-sudara yang percaya datang kase tau ngana pe kabar pa kita. Dorang bilang ngana tetap percaya ajaran yang butul, deng memang ngana iko samua ajaran yang butul itu.

⁴ Kita paling sanang skali dengar, orang-orang yang kita so sayang sama deng kita pe ana-ana ada iko Tuhan pe ajaran. Tarada hal laeng yang biking kita sanang macam bagitu.

Yohanes puji pa Gayus karna dia pe pelayanan bagus

⁵ Gayus, kita pe sudara yang kita sayang, kita sanang karna ngana setia bantu pa torang pe sudara-sudara yang percaya waktu dong singga kase tau Kabar Bae di ngana pe kampong. Biar dorang itu ngana bolong kanal, ngana bantu pa dorang.

⁶ Sudara-sudara yang ngana bantu itu so datang kamari, turus dorang so kase tau pa jemaat tentang ngana pe sayang itu. Bagus skali ngana bantu pa dorang itu, jadi kita minta pa ngana untuk tolong pa dorang lagi, supaya dorang bisa kase turus dong pe perjalanan. Deng bagitu, ngana so biking Tuhan Allah pe hati sanang.

⁷ Barang, waktu dong kase tau tentang Yesus Kristus pa orang-orang, dorang tara dapa bantuan apa-apa dari orang yang bolong percaya.

⁸ Jadi torang musti tarima deng bantu sudara-sudara yang percaya itu, deng bagitu torang samua so ambe bagian dalam dong pe karja untuk kase ajar Tuhan pe ajaran.

Diotrefes tukang biking kaco

⁹ Kita so perna tulis surat sadiki untuk jemaat di situ, tapi Diotrefes tara mau dengar pa kita, barang dia suka skali jadi tuang basar di jemaat.

¹⁰ Jadi, kalu kita ka sana di situ, kita mo kase tau turus tarang pa ngoni tentang samua yang dia biking, karna dia so carita tara bae untuk mo kase jatu pa torang. Tapi samua itu bolong cukup pa dia. Barang, waktu sudara-sudara yang percaya datang, dia tara mau tarima pa dorang. Mala, dia larang pa orang-orang di jemaat situ untuk tarima pa sudara-sudara yang datang itu. Kalu dorang tarima pa orang yang datang itu, dia user pa dorang dari jemaat.

Demetrius kase tunju conto yang bae

¹¹ Gayus, kita pe sudara yang kita sayang, jang iko barang yang jahat, tapi iko barang yang bae. Sapa yang biking barang bae, dia itu Tuhan Allah pe umat. Tapi sapa yang biking barang yang jahat, dia itu bolong kanal pa Tuhan Allah.

¹² Lia pa Demetrius! Samua orang deng kita me puji pa dia. Dia pantas dapa puji karna apa yang dia biking iko Tuhan pe ajaran. Kong ngoni tau, apa yang torang kase tau tentang dia itu butul. Torang tara bafoya.

Yohanes pe ahir surat

¹³ Ada banya hal lagi yang kita mo bilang pa ngana Gayus, tapi kita tara mau tulis pake surat.

¹⁴ Kita harap, tara lama lagi tong dua baku dapa, la tong bacarita langsung.

¹⁵ Sampe di sini dulu kita pe surat pa ngana Gayus. Kita minta pa Tuhan Allah supaya Dia salalu biking ngana pe hati tetap tenang. Ngana pe tamang-tamang yang di sini me kirim salam pa ngana. Kong kase tau lagi kita pe salam pa kita pe tamang-tamang samua yang ada di situ.