2 Yohanes 1 - Perjanjian Baru Bahasa Melayu Maluku Utara

Yohanes pe salam

¹ Ibu yang Tuhan Allah pili iko pa Dia deng ibu pe ana-ana, yang butul-butul kita sayang. Salam dari kita, penatua di jemaat. Bukang cuma kita yang sayang pa ngoni, tapi samua orang yang iko Tuhan pe ajaran me sayang pa ngoni.

² Torang sayang pa ngoni karna Tuhan pe ajaran itu ada pa torang pe hati, kong ajaran itu ada turus pa torang sampe slama-lamanya.

³ Kita minta pa Tuhan Allah torang pe Bapa, deng pa Kristus Yesus torang pe Tuhan, supaya kase Dia pe bae deng Dia pe sayang pa torang samua, deng salalu biking torang pe hati tetap tenang. Samua itu untuk torang yang jaga iko Tuhan pe ajaran deng yang jaga baku sayang.

Hidup baku sayang deng jaga biking barang yang butul

⁴ Kita sanang skali karna kita dengar ada dari ibu pe ana-ana yang hidup iko Tuhan pe ajaran. Apa yang dorang biking itu sama deng yang Tuhan Allah, torang pe Bapa, parenta pa torang.

⁵ Jadi skarang kita minta pa ibu supaya torang samua baku-baku sayang. Yang kita bilang ini, bukang parenta baru, tapi parenta yang so ada pa torang dari pertama waktu torang baru jadi percaya pa Tuhan.

⁶ Kalu torang butul-butul sayang Tuhan Allah, itu berarti, torang hidup iko Dia pe parenta. Dia pe parenta itu, torang musti hidup baku-baku sayang. Parenta itu ngoni so dengar dari waktu pertama kali ngoni jadi percaya pa Yesus Kristus.

⁷ Kita tulis surat ini pa ngoni karna ada banya orang skarang pigi bakuliling di seluru dunia untuk kase sesat orang. Dorang itu tara percaya, Yesus Kristus itu datang di dunia sebagai manusia. Dorang itu pangbafoya deng dong musu pa Yesus Kristus.

⁸ Jadi ngoni musti jaga bae-bae ngoni pe percaya pa Yesus Kristus, supaya torang pe karja kase tau Kabar Bae pa ngoni itu tetap ada dia pe guna, deng supaya ngoni tetap dapa ngoni pe upah yang Tuhan Allah so janji.

⁹ Tiap orang yang so tara iko Yesus Kristus pe ajaran, kong iko ajaran laeng, dia itu so tara hidup satu hati deng Tuhan Allah. Tapi orang yang iko Yesus Kristus pe ajaran, dia itu so hidup satu hati deng Tuhan Allah, torang pe Bapa, deng Yesus Kristus, Anak Allah.

¹⁰ Jadi kalu ada orang datang kase tau pa ngoni ajaran yang tara sama deng Yesus Kristus pe ajaran, jang ngoni tarima pa dia di ngoni pe ruma deng jang kase salam pa dia.

¹¹ Barang, sapa yang tarima deng kase salam pa orang itu, itu sama saja deng dia so biking yang jahat sama deng orang itu biking.

Yohanes pe ahir surat

¹² Memang masi banya yang kita mo bilang pa ngoni, tapi lebe bae jang lewat surat. Kita harap bisa baku dapa deng ngoni la bisa bicara langsung deng ngoni, supaya torang pe hati butul-butul sanang.

¹³ Ibu pe sudara yang Tuhan pili, dia pe ana-ana me ada kirim salam pa ibu.