2 Petrus 3 - Perjanjian Baru Bahasa Melayu Maluku Utara

Torang pe Tuhan mo datang ulang yang kedua kali

¹ Sudara-sudara yang kita sayang, ini kita pe surat yang kedua pa ngoni. Di dua surat yang kita tulis pa ngoni, kita berusaha kase inga ulang apa yang ngoni so tau, supaya ngoni tetap smangat untuk pikir yang bae tentang itu.

² Ngoni musti inga Tuhan Allah pe pasáng yang dulu Dia pe nabi-nabi so perna kase tau. Ngoni me musti inga parenta dari torang pe Tuhan Yesus yang kase slamat pa torang. Parenta itu, Yesus pe utusan-utusan yang orang sebut rasul ada kase tau pa ngoni.

³ Ini yang paling penting yang ngoni musti tau, kalu so mo kiamat, nanti ada banya orang yang suka bahina torang pe percaya, barang dorang hidup cuma iko dong pe keinginan yang jahat.

⁴ Dorang bilang bagini, “Yesus ada janji Dia mo datang ulang, tapi skarang mana Dia? Karna dari dulu, dari tong pe orang tua dulu-dulu mati sampe skarang, tarada yang beruba. Mulai dari dunia ini ada sampe skarang, samua tetap sama.”

⁵ Dorang bilang bagitu karna dorang sangaja tara mau akui, Tuhan Allah biking langit cuma deng Dia pe bicara saja. Kong cuma deng bicara lagi, Dia biking bumi dari aer, deng kase pisa bumi itu dari aer.

⁶ Kong deng aer lagi Tuhan Allah kase ancor dunia ini deng banjir basar.

⁷ Kong cuma deng bicara lagi, Tuhan Allah jaga langit deng bumi skarang, sampe di waktu Dia mo hukum pa orang-orang yang tara iko Dia pe mau deng Dia mo biking dorang mati slama-lamanya. Di waktu itu, Dia mo bakar kase abis dunia deng langit ini.

⁸ Sudara-sudara yang kita sayang, ada satu hal yang ngoni musti inga: Tuhan Allah pe cara hitung, beda deng torang. Dia hitung, satu hari sama deng saribu taong atau saribu taong sama deng satu hari.

⁹ Tapi ada orang yang anggap Tuhan Allah talalu lama mo biking Dia pe janji tentang Yesus Kristus mo datang ulang, padahal tara bagitu. Yesus Kristus bolong datang itu, karna Tuhan Allah sabar deng ngoni, Dia suka samua orang ada waktu untuk bertobat. Dia tara mau ada orang yang mati tapisa slama-lamanya dari Dia, biar lagi cuma satu orang.

¹⁰ Tapi tempo apa Yesus Kristus mo datang ulang, tarada orang yang tau. Dia datang sama deng papancuri datang, yang kage-kage so ada, tarada yang tau. Hari itu, langit akan ancor deng babunyi kuat skali, kong matahari, bulan deng bintang akan tabakar sampe abis, turus bumi deng samua dia pe isi akan abis.

¹¹ Jadi karna samua itu nanti akan abis deng cara bagitu, torang yang hidup skarang ini musti hidup deng hati bersi, deng lagi hidup iko Tuhan Allah pe mau,

¹² sementara torang tunggu Yesus Kristus mo datang ulang di hari kiamat yang Tuhan Allah so tentukan, deng lagi biking apa yang mau supaya Yesus Kristus mo datang capat. Di hari itu, api akan bakar kase ancor langit, kong matahari, bulan deng bintang mo malele karna panas.

¹³ Tapi untuk torang orang percaya, Tuhan Allah so janji Dia akan biking langit deng bumi yang baru, kong torang ada tunggu itu. Di situ nanti mo jadi tampa tinggal untuk orang-orang yang cuma biking barang yang butul pa Tuhan Allah pe muka.

¹⁴ Karna itu, sudara-sudara yang kita sayang, sementara ngoni tunggu samua itu mo jadi, ngoni musti berusaha turus-turus supaya ngoni pe hidup bersi deng tarada sala apa-apa pa Tuhan Allah pe muka, deng lagi ngoni pe hubungan deng Dia tetap bae.

¹⁵ Inga ajaran ini bae-bae: Tuhan Yesus bolong datang karna Tuhan Allah sabar deng torang. Dia sabar itu karna Dia mau supaya banya orang dapa slamat. Torang pe sudara Paulus yang torang sayang itu so perna tulis tentang ini karna Tuhan Allah so biking dia pande.

¹⁶ Di samua Paulus pe surat, dia tulis hal-hal macam itu. Memang ada babarapa hal di surat-surat itu yang orang susa mangarti. Orang yang tara tau ajaran yang butul deng orang yang pe percaya tara kuat, dorang so ruba dia pe arti jadi sala, sama deng dong kase sala arti kitab-kitab yang laeng di Kitab Suci. Karna itu, Tuhan Allah mo hukum pa dorang tapisa deng Dia slama-lamanya.

¹⁷ Jadi sudara-sudara yang kita sayang, ngoni so kamuka tau samua itu. Karna itu ngoni musti ati-ati deng guru-guru palsu yang jaga malawang Tuhan Yesus pe ajaran, supaya ngoni tara iko dong pe sala itu, tapi ngoni tetap percaya.

¹⁸ Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.