2 Petrus 2 - Perjanjian Baru Bahasa Melayu Maluku Utara

Guru-guru agama palsu ajar ajaran yang tara butul

¹ Dulu, ada orang-orang yang muncul di orang Israel pe tenga-tenga, yang bilang kata, dorang itu Tuhan Allah pe nabi yang kase turus Tuhan Allah pe pasáng, padahal dong foya. Kong sama deng itu, skarang ini akan ada lagi di ngoni pe tenga-tenga guru-guru agama palsu. Guru-guru palsu itu mo kase ajar ajaran yang orang kira butul, padahal tarada, kong ajaran itu biking rusak orang pe hidup. Kong bukang cuma itu, orang yang iko ajaran itu me mo manyangkal Tuhan Yesus yang so tebus pa dorang. Jadi, apa yang guru-guru palsu biking itu cuma mo biking dong sandiri capat mati kong tapisa deng Tuhan Allah slama-lamanya.

² Biar bagitu me, banya orang akan iko guru-guru palsu itu deng dong pe napsu yang tara bae. Jadi, karna guru-guru palsu itu, banya orang akan hina-hina Tuhan pe ajaran yang butul.

³ Guru-guru palsu itu gila doi, jadi dorang karang-karang carita la tipu pa ngoni samua, supaya dong dapa doi. Tapi dari dulu, Tuhan Allah so rencana untuk hukum pa dorang. Dorang itu pasti mo mati tapisa dari Tuhan Allah slama-lamanya.

⁴ Ambe conto, dulu malaekat-malaekat yang biking dosa me Tuhan Allah hukum. Dia buang pa dorang di neraka, turus ika deng rante pa dorang di tampa yang galap itu. Dorang di situ tara kaluar sampe hari kiamat, waktu Tuhan Allah mo adili pa samua orang.

⁵ Bagitu lagi deng orang-orang yang tara iko pa Tuhan Allah waktu jaman Nuh. Tuhan Allah tara kase biar dorang malawang turus pa Dia, tapi Dia hukum pa dorang deng banjir basar. Kong cuma Nuh deng dia pe keluarga tuju orang yang Tuhan Allah kase slamat dari banjir basar itu, barang Nuh yang kase tau Tuhan Allah pe pasáng kong suru dorang biking yang butul.

⁶ Bagitu lagi deng orang-orang di kota Sodom deng kota Gomora dulu yang tara dengar-dengaran pa Tuhan Allah, Tuhan Allah hukum pa dorang pake api sampe dong pe kota samua angus tabakar. Tuhan Allah biking bagitu la orang tau, orang-orang yang tara iko Tuhan Allah pe mau akan dapa hukuman.

⁷ Tapi Lot, Tuhan Allah kase slamat pa dia dari kota itu. Lot itu orang yang jaga biking apa yang butul pa Tuhan Allah pe muka. Dia turus-turus sedi skali karna orang-orang yang ada di sekitar dia pe cara hidup tara bae, karna dorang cuma iko dong pe napsu.

⁸ Barang, Lot yang jaga biking apa yang butul itu, tinggal di orang jahat itu pe tenga-tenga. Jadi tiap hari dia lia deng dengar kajahatan yang dong jaga biking, kong itu biking dia pe hati susa skali.

⁹ Jadi, conto-conto itu biking jelas, Tuhan Allah pasti kase slamat Dia pe umat dari dorang pe sengsara. Dia me akan tahang orang-orang yang tara biking Dia pe mau, kong nanti di hari kiamat, Dia mo hukum pa dorang itu.

¹⁰ Lebe-lebe lagi pa orang-orang yang cuma hidup iko dong pe napsu yang tara bae, deng yang pandang enteng Tuhan Allah pe kuasa yang luar biasa. Guru-guru palsu itu barani skali deng makang puji, sampe dorang tara tako-tako mo bahina pa samua yang berkuasa di sorga.

¹¹ Padahal malaekat-malaekat sandiri, biar dorang lebe kuat deng lebe berkuasa dari guru-guru palsu itu, dorang tara barani mangada pa Tuhan Allah kong bicara tara bae tentang dong pe sudara malaekat atau yang laeng yang berkuasa di sorga.

¹² Tapi guru-guru palsu itu bahina hal-hal yang dorang sandiri tara mangarti, dorang asal bicara saja, sama deng binatang yang tara akal, atau sama deng binatang yang lahir cuma untuk dapa tangka deng dapa bunu. Jadi, sama deng binatang liar dapa bunu dari manusia, bagitu lagi guru-guru palsu akan dapa hukum dari Tuhan Allah karna dong pe kalakuang yang jahat.

¹³ Tuhan Allah akan kase hukuman yang barát pa dorang untuk balas samua yang tara bae yang dorang so biking. Siang-siang me, dorang suka skali biking apa yang cuma kase sanang dong pe diri sandiri. Kong kalu ada acara makang-makang, dorang itu cuma kase puas dong pe diri saja. Dorang tara tau malu, jadi dong biking sampe ngoni jemaat pe nama bae rusak. Deng biking bagitu dorang sama deng noda yang biking kotor di kaeng satu yang bersi.

¹⁴ Dorang pe mata kalu lia parampuang, haga deng napsu. Dorang tara perna puas biking dosa. Dorang jaga goda pa orang-orang yang pe percaya bolong kuat pa Tuhan, supaya iko pa dorang untuk biking yang jahat. Dorang itu tara perna puas deng dong pe barang yang so ada, kong dong me mo ambe orang punya. Dorang itu Tuhan Allah pasti mo hukum!

¹⁵ Guru-guru palsu itu so tara iko Tuhan Allah pe ajaran, jadi dorang so tara butul. Dorang so iko conto nabi dulu-dulu, yang dia pe nama Bileam. Bileam ini Beor pe ana. Dia suka biking barang yang jahat, yang penting dapa doi.

¹⁶ Kong karna nabi Bileam bagitu, dia dapa togor karas skali. Tuhan Allah biking dia pe keledai tiba-tiba bisa bicara sama deng manusia, kong dia pe keledai itu togor pa dia, sampe dia pe rencana jahat itu tara jadi biking.

¹⁷ Guru-guru palsu pe ajaran itu tara ada guna. Dorang sama deng mata aer yang so kiring, sama lagi deng awan galap yang tara jadi ujang karna angin so tiop. Tuhan Allah so kase sadia tampa yang paling galap untuk hukum pa dorang.

¹⁸ Barang, dorang kalu bicara, makang puji skali, padahal yang dong bicara itu tara ada guna. Dorang buju orang-orang yang baru percaya pa Tuhan supaya dorang biking barang yang tara bae iko manusia pe napsu saja. Padahal orang-orang yang dapa buju itu bolong lama talapas dari dong pe percaya yang sala.

¹⁹ Dorang ajar pa orang-orang yang baru percaya itu, deng bilang, “Kalu ngoni iko torang pe ajaran, ngoni akan bebas dari samua aturan. Jadi ngoni bole biking apa saja yang ngoni suka.” Padahal, guru-guru palsu itu sandiri tara bebas karna dong pe keinginan tara bae yang banya so kuasai pa dorang, kong itu yang biking dong berdosa. Barang, apa saja yang kuasai pa orang, itu yang biking dia berdosa.

²⁰ Kita pe maksut, kalu dorang itu so kanal pa Yesus Kristus torang pe Tuhan deng Juruslamat, dorang me so lapas dari dunia pe mau yang jahat. Tapi kalu dorang bale ulang untuk iko keinginan-keinginan yang jahat itu, dorang pe keadaan nanti mo lebe soe dari yang pertama.

²¹ Jadi lebe bae dorang tara perna tau ajaran tentang bagimana dorang bole jadi orang yang tara sala pa Tuhan Allah pe muka, daripada dorang so tau kong tara mau iko lagi parenta yang kudus yang orang so kase tau pa dorang.

²² Yang dorang biking itu, memang sama deng orang jaga bilang bagini, ‘Anjing bale jilat ulang dia pe munta, deng babi yang so bersi, bale ulang di pece-pece.’