2 Petrus 1 - Perjanjian Baru Bahasa Melayu Maluku Utara

Petrus pe salam

¹ Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

² Kita minta pa Tuhan Allah supaya Dia kase Dia pe bae pa ngoni deng Dia salalu biking ngoni pe hati tetap tenang, kong Dia kase itu talebe-lebe karna ngoni so kanal pa Tuhan Allah deng pa Yesus Kristus, torang pe Tuhan.

Tuhan Allah pili deng pangge pa torang untuk iko pa Dia

³ Tuhan Allah itu hebat deng hati bae, kong karna itu, Dia pangge pa torang untuk iko pa Dia la torang kanal pa Dia. Kong karna torang so kanal pa Dia, Dia pake Dia pe kuasa yang basar untuk kase pa torang samua yang torang perlu supaya torang bole hidup iko Dia pe mau.

⁴ Kong karna Dia hebat deng hati bae itu, Dia kase pa torang slamat, deng kase banya hal yang laeng lagi yang bagus deng berharga, sama deng yang Dia so janji. Dia kase itu supaya ngoni bisa talapas dari keinginan yang tara bae yang bisa kase rusak manusia pe hidup, deng supaya ngoni pe sifat bisa beruba jadi bae sama deng Dia pe sifat.

⁵ Jadi karna Tuhan Allah so kase samua itu untuk ngoni, ngoni musti berusaha karas supaya ngoni pe percaya itu jadi lengkap deng ngoni hidup yang butul pa Dia pe muka. Kong bukang cuma itu saja, tapi ngoni musti berusaha la ngoni bisa tau apa yang Tuhan Allah suka.

⁶ Turus kalu ngoni so tau apa yang Dia suka, ngoni lagi musti kuasai ngoni pe diri. Turus kalu ngoni so kuasai ngoni pe diri, ngoni me musti tetap percaya pa Dia biar dapa siksa. Kong biar lagi ngoni dapa siksa, ngoni me musti hidup iko Tuhan Allah pe mau,

⁷ kong kalu ngoni so hidup iko Dia pe mau, ngoni me musti sayang pa ngoni pe sudara-sudara yang percaya, deng ngoni me musti sayang pa samua orang.

⁸ Kalu ngoni biking samua yang bae itu, kong ngoni tamba biking itu turus, itu ada guna untuk ngoni, karna itu akan bantu pa ngoni untuk lebe kanal pa Yesus Kristus, torang pe Tuhan.

⁹ Tapi orang-orang percaya yang tara biking samua itu, dorang pe cara bapikir pende, dorang itu lagi sama deng orang buta, karna dorang lupa Tuhan Allah so kase ampun dong pe dosa-dosa.

¹⁰ Jadi sudara-sudara, karna Tuhan Allah so pili deng pangge pa ngoni jadi Dia pe umat, ngoni musti berusaha karas untuk iko pa Dia supaya ngoni tau deng yakin Dia so pili deng pangge pa ngoni. Karna kalu ngoni biking samua yang bae yang kita bilang itu, ngoni tara akan kase tinggal ngoni pe percaya pa Dia, itu sama deng ngoni ada bajalang turus-turus kong ngoni pe kaki tara tagate di batu sampe jatu.

¹¹ Deng bagitu, nanti Tuhan Allah akan buka pintu sorga untuk ngoni, Dia akan tarima pa ngoni di Tuhan Yesus Kristus pe tampa berkuasa sebagai Raja. Tuhan Yesus Kristus itu yang kase slamat pa torang, deng Dia itu yang jadi Raja slama-lamanya.

¹² Kong biar ngoni so tau samua itu, deng ngoni so kuat iko Tuhan pe ajaran yang ngoni so dengar, kita tetap mo kase inga turus pa ngoni.

¹³ Selama kita masi hidup ini, kita rasa pantas mo kase inga itu turus pa ngoni.

¹⁴ Barang kita tau, so tara lama lagi kita akan mati, sama deng Yesus Kristus torang pe Tuhan so kase tau itu pa kita.

¹⁵ Jadi kita berusaha turus kase tau pa ngoni, la nanti kalu kita so mati, ngoni bole inga samua itu turus-turus.

Petrus lia Yesus pe hebat

¹⁶ Torang so kase tau pa ngoni tentang torang pe Tuhan Yesus Kristus pe kuasa, deng tentang Dia mo datang ulang di dunia ini. Yang torang kase tau itu bukang carita-carita dulu-dulu yang torang karang sandiri, tapi tong tau samua itu karna torang so lia Dia pe hebat deng torang pe mata kapala sandiri.

^17-18 Perna satu kali, torang nae gunung yang kudus satu sama-sama deng Yesus. Di situ torang dengar sandiri suara dari sorga, suara itu dari Tuhan Allah, torang pe Bapa yang paling hebat. Dia puji deng hormat pa Yesus, bilang bagini, “Ini Kita pe Anak yang Kita sayang. Dia biking Kita pe hati sanang.”

¹⁹ Jadi, dari samua yang torang lia deng dengar di atas gunung itu, torang lebe tamba yakin apa yang dulu nabi-nabi so kase tau tentang Yesus Kristus itu memang butul. Ngoni musti perhatikan bae-bae nabi-nabi pe pasáng itu supaya ngoni tau yang butul, sama deng ngoni ada perhatikan lampu yang bacahaya dalam galap. Ngoni perhatikan yang nabi-nabi tulis itu, deng biking itu sampe Yesus Kristus datang ulang yang kedua kali. Waktu Dia datang ulang itu, ngoni akan butul-butul kanal pa Dia, sama deng ngoni ada lia bintang timur yang muncul amper siang waktu hari so mo pagi.

²⁰ Ini yang penting yang ngoni musti tau: samua yang nabi-nabi tulis di Kitab Suci, itu tara bole orang kase arti iko dong pe mau sandiri.

²¹ Karna samua yang nabi-nabi kase tau itu me, tara perna iko manusia pe mau. Tapi Roh Kudus yang kuasai pa nabi-nabi itu yang biking sampe dorang bisa kase tau Tuhan Allah pe pasáng.