2 Korintus 6 - Perjanjian Baru Bahasa Melayu Maluku Utara

Paulus tetap kase tau Kabar Bae biar dapa siksa

¹ Torang deng Tuhan Allah karja sama-sama untuk kase tau Kabar Bae tentang Yesus Kristus pa orang-orang. Ngoni ini so tarima Tuhan Allah pe bae waktu Yesus Kristus dapa salib, jadi torang minta pa ngoni, jang kase sia-sia Tuhan Allah pe bae itu.

² Barang, Tuhan Allah bilang di Kitab Suci bagini, “Di waktu yang Kita so ator, Kita dengar pa ngana. Kong di hari yang Kita kase slamat pa orang-orang, di hari itu suda Kita tolong pa ngana.” Jadi sudara-sudara, inga e, hari ini suda dia pe waktu yang Tuhan so ator itu. Hari ini suda dia pe waktu, yang Tuhan kase slamat pa orang-orang dari dosa-dosa.

³ Torang berusaha hidup bae-bae supaya jang torang biking orang tara mo iko pa Yesus Kristus. Jadi, deng torang hidup bae-bae bagitu, tara ada orang yang mo kase sala apa-apa pa torang di torang pe pelayanan.

⁴ Mala samua yang torang biking, torang biking bae-bae supaya jelas torang ini orang yang karja untuk Tuhan Allah, macam deng bagini: biar torang dapa siksa, susa deng sengsara, torang batahang turus.

⁵ Biar torang dapa pukul, dapa maso di penjara, deng dapa koroyo, torang tetap sabar. Torang karja karas untuk Tuhan Allah, biar laengkali torang tara tidor-tidor deng tara makang-makang.

⁶ Samua yang torang biking, tong biking deng hati bersi, torang lagi tau banya hal karna Tuhan Allah bantu pa torang, torang sabar, torang bae-bae deng orang, torang sayang orang butul-butul, deng Roh Kudus bakarja di torang pe hati.

⁷ Torang salalu kase tau ajaran yang butul pa orang-orang, deng Tuhan Allah pe kuasa ada pa torang. Torang jaga biking yang butul kong itu sama deng torang bawa senjata, karna kalu torang so biking yang butul, torang bisa lawan orang yang tara suka torang iko pa Tuhan Yesus.

⁸ Waktu torang dapa hormat, dapa hina, dapa kase tara bae nama, deng dapa puji, torang tetap saja biking yang Tuhan Allah suru. Kong ada yang bilang torang ajar yang sala, padahal torang ini salalu ajar yang butul.

⁹ Torang ini sebenarnya banya orang kanal, tapi ada yang pura-pura tara kanal pa torang. Torang amper-amper mati, tapi torang tetap saja hidup. Torang dapa hukuman barát ulang-ulang, tapi torang tetap tara mati.

¹⁰ Biar torang dapa banya susa, torang pe hati tetap saja rasa sanang. Biar torang tara ada doi, tapi torang so bantu banya orang la percaya pa Yesus Kristus, itu sama deng torang biking dorang jadi kaya. Deng biar torang tara ada apa-apa di dunia, tapi sebenarnya torang dapa samua-samua dari Tuhan.

¹¹ Ee ngoni orang-orang Korintus! Torang bilang deng turus tarang ini pa ngoni, deng torang sayang skali pa ngoni.

¹² Torang pe sayang pa ngoni basar skali, tapi ngoni pe sayang pa torang cuma sadiki.

¹³ Skarang, kita bicara pa ngoni sama deng ngoni itu kita pe ana-ana, jadi kita bilang pa ngoni: buka ngoni pe hati lebar-lebar la sayang pa torang, sama deng torang me sayang pa ngoni.

Jang tapengaru deng orang yang tara percaya

¹⁴ Ngoni yang percaya pa Tuhan Yesus, jang baika diri deng orang-orang yang tara percaya. Coba ngoni pikir! Orang yang jaga biking barang yang butul deng orang yang jaga biking barang yang tara butul, tara sama, to? Itu sama deng tarang tara mungkin mo jadi satu deng galap!

¹⁵ Yesus Kristus deng Iblis, setang-setang pe raja tara sama, to? Bagitu lagi deng orang-orang yang percaya pa Tuhan Yesus deng orang-orang yang tara percaya pa Tuhan Yesus, tara sama!

¹⁶ Apa ada hubungan antara Tuhan Allah pe Ruma deng manusia pe tampa semba puji-puji? Tara ada hubungan! Torang orang-orang percaya, tong ini sama deng Tuhan Allah pe Ruma, karna Tuhan Allah yang hidup tinggal di torang pe hati. Itu sama deng Tuhan Allah janji dulu, kong skarang so jadi, “Kita mo tinggal sama-sama deng dorang, deng hidup deng dorang, kong Kita mo jadi dorang pe Tuhan Allah, deng dorang mo jadi Kita pe umat.”

¹⁷ Karna itu Tuhan Allah bilang lagi bagini, “Ngoni kaluar suda dari dorang pe tenga-tenga, dorang yang tara percaya. Ngoni bapisa dari dorang. Jang ngoni iko dorang biking dosa, supaya jang ngoni jadi orang yang tara bersi pa Kita pe muka. Iko yang Kita bilang ini la Kita tarima pa ngoni.

¹⁸ Kita akan jadi ngoni pe Bapa, deng ngoni lagi mo jadi Kita pe ana-ana laki-laki deng Kita pe ana-ana parampuang.” Itu yang Tuhan Allah bilang di Kitab Suci. Dia itu yang Paling Berkuasa.