2 Korintus 3 - Perjanjian Baru Bahasa Melayu Maluku Utara

Tuhan Allah biking Dia pe janji yang baru pa manusia waktu Dia kase Roh Kudus pa Dia pe umat

¹ Tapi jang sampe ngoni kira kata, torang lagi ada puji-puji tong pe diri. Torang tara sama deng babarapa guru agama yang datang bawa surat pujian supaya ngoni tarima pa dorang. Waktu dorang pigi dari ngoni me dorang minta surat pujian dari ngoni la dong bawa di orang laeng. Tapi torang ini tara perlu surat macam bagitu.

² Ngoni itu sama deng surat yang tatulis pa tong pe hati, barang samua orang bisa lia ngoni pe hidup yang bagus deng dong bole tau, itu torang pe hasil karja. Waktu orang-orang lia itu, itu sama deng dong bisa baca tong dua pe surat pujian.

³ Kong karna ngoni pe hidup yang bagus itu, jadi jelas pa samua orang, ngoni ini hasil dari torang pe pelayanan kase tau tentang Yesus Kristus. Jadi torang bisa bilang, ngoni pe diri itu sama deng surat yang Yesus Kristus tulis sandiri. Dia tara tulis pake tinta, deng Dia tara tulis di batu, sama deng waktu Tuhan Allah kase aturan-aturan pa nabi Musa. Tapi ngoni jadi sama deng Yesus Kristus pe surat waktu Dia biking ngoni pe hidup beruba karna Roh Kudus bakarja di ngoni pe hati.

⁴ Torang barani bilang ngoni itu torang pe hasil karja, barang torang percaya pa Tuhan Allah, kong torang bole percaya pa Tuhan Allah, karna samua yang Yesus Kristus biking untuk torang.

⁵ Torang tara maksut tong sandiri yang mampo biking tugas itu. Torang tara mampo, tapi Tuhan Allah yang kase mampo pa torang untuk biking tugas yang Tuhan Allah kase pa torang ini.

⁶ Dia itu yang so biking torang mampo biking apa yang Dia suru, untuk kase tau Tuhan Allah pe janji yang baru pa orang-orang, janji antara Tuhan Allah deng manusia. Janji yang baru itu bukang bagantong dari apa yang so tatulis dalam aturan-aturan di lima kitab Musa, karna aturan-aturan itu kalu torang tara bisa iko samua, nanti waktu torang mati, torang tapisa deng Tuhan Allah slama-lamanya. Tapi janji yang baru itu bagantong dari Roh Kudus. Tuhan Allah kase Dia pe Roh pa torang, la torang ada kuasa iko Tuhan Allah pe mau, deng torang bole hidup deng Tuhan Allah slama-lamanya.

⁷ Memang janji yang lama itu Tuhan Allah tulis di batu kong kase pa nabi Musa, tapi orang tara mampo iko aturan-aturan itu jadi itu biking orang bisa mati tapisa deng Tuhan Allah. Tapi biar bagitu, Tuhan Allah pe kuasa yang hebat ada di aturan-aturan itu kong biking Musa pe muka basilau skali sampe orang Israel tara bisa haga pa Musa pe muka, biar lagi cahaya itu mulai ilang palang-palang sampe abis. Tuhan Allah pe kuasa bagitu hebat di aturan-aturan itu, jadi

⁸ pasti akan lebe hebat lagi Tuhan Allah pe kuasa di Dia pe janji yang baru, to? Karna Roh Kudus yang bakarja di torang pe hati untuk iko janji yang baru itu.

⁹ Kita pe maksut itu bagini. Aturan yang Tuhan Allah kase pa nabi Musa itu biking manusia tau dorang so biking dosa kong musti dapa hukum. Tapi kalu janji yang lama itu saja datang dari Tuhan Allah pe kuasa yang hebat, apalagi deng janji yang baru, pasti datang dari Tuhan Allah pe kuasa yang lebe hebat lagi, karna janji yang baru itu yang bole biking torang jadi tara sala pa Tuhan Allah pe muka.

¹⁰ Jadi torang tau, kuasa yang ada di aturan yang Tuhan Allah kase pa Musa dulu memang hebat, tapi skarang jadi tara hebat kalu mo kase banding deng Tuhan Allah pe kuasa yang paling hebat yang ada di janji yang baru itu.

¹¹ Barang, biar janji yang lama yang ada di lima kitab Musa itu cuma sementara saja, tapi dia pe kuasa itu hebat. Kong, apalagi janji yang baru, pasti dia pe kuasa lebe hebat skali karna tetap ada sampe slama-lamanya.

¹² Jadi, karna torang bagitu yakin deng Tuhan Allah pe janji yang baru itu, torang barani kase tau Kabar Bae tentang Yesus Kristus pa orang-orang.

¹³ Torang tara sama deng nabi Musa yang tutu dia pe muka pake kaeng waktu dia bilang aturan itu pa orang Israel, supaya dorang tara lia cahaya yang dari Tuhan Allah, biar lagi cahaya itu mulai ilang palang-palang dari dia pe muka.

¹⁴ Tapi orang Israel itu pe pikiran tatutu sampe tara mangarti aturan-aturan itu pe maksut. Kong skarang ini me waktu orang Israel baca janji yang lama itu lagi, dorang pe pikiran masi tatutu, macam deng kaeng yang Musa pake untuk tutu pa dia pe muka itu, jadi dorang tara mampo mangarti. Nanti kalu dorang so percaya pa Yesus Kristus, baru dong bole mangarti butul-butul Tuhan Allah pe janji.

¹⁵ Skarang me, tiap kali dorang baca aturan-aturan di lima kitab Musa, dong tetap tara mangarti karna dong pe pikiran masi tatutu, sama deng masi ada kaeng yang tutu dong pe muka sampe dong tara dapa lia apa-apa.

¹⁶ Tapi kalu ada yang bertobat kong percaya pa Tuhan Yesus, pasti dong pe pikiran yang tatutu itu mo tabuka.

¹⁷ Karna Tuhan yang kita bilang itu Roh, deng kalu Dia pe Roh itu tinggal di torang pe hati, torang dapa bebas dari aturan-aturan yang kase pisa pa torang deng Tuhan.

¹⁸ Kong untuk torang samua yang percaya, so tara ada lagi yang tutu tong pe pikiran, jadi torang bisa lia Tuhan pe kuasa yang luar biasa. Turus, orang me bisa lia Tuhan pe kuasa yang luar biasa pa torang pe diri. Barang, Tuhan salalu ruba torang pe hidup supaya torang bole jadi sama deng Dia, tamba hari torang pe kalakuang deng torang pe hidup tamba bae. Tuhan yang biking torang jadi bagitu, Dia itu suda Roh Kudus.