2 Korintus 13 - Perjanjian Baru Bahasa Melayu Maluku Utara

Orang percaya musti jaga bae-bae dorang pe hidup

¹ Ini akan jadi yang ketiga kali kita mo pigi lia pa ngoni. Inga apa yang so tatulis di Kitab Suci, “Kalu ada orang yang dapa tudu biking sala, musti ada dua atau tiga orang yang jadi saksi untuk bilang orang itu sala.”

² Waktu kita datang yang kedua kali pa ngoni, kita so perna togor pa orang-orang di situ yang biking dosa, supaya dorang berenti biking dosa. Skarang bagitu kita jao dari ngoni, kita kase inga lagi pa dorang, deng pa samua orang yang biking dosa. Ini yang kita kase inga: nanti waktu kita datang ulang, kita mo togor karas kong mo kase hukuman pa samua orang yang masi biking dosa.

³ Kita mo hukum pa ngoni yang masi biking dosa, karna ngoni sandiri yang minta bukti pa kita, apa Yesus Kristus yang suru kita kase tau Dia pe firman pa ngoni ka tarada. Yesus Kristus itu kalu togor pa ngoni, tara palang-palang, tapi Dia hukum pa ngoni deng Dia pe kuasa.

⁴ Memang waktu Dia mati di kayu salib, Dia tara kuat. Tapi skarang Dia hidup ulang deng kuasa dari Tuhan Allah. Bagitu lagi deng torang, torang percaya pa Yesus Kristus biar torang tara kuat. Tapi torang hidup deng Dia pe kuasa, kong deng Dia pe kuasa itu torang bisa hukum pa ngoni.

⁵ Coba ngoni uji ngoni pe diri sandiri, ngoni butul-butul percaya ka tarada. Priksa ngoni pe hati, apa ngoni tau pasti, Kristus Yesus ada di ngoni pe hati? Kalu tarada, berarti ngoni tara tahang uji.

⁶ Kong kita me harap ngoni akan tau pasti torang so tahang uji, torang ini memang butul Tuhan Yesus pe utusan.

⁷ Torang berdoa pa Tuhan Allah supaya jang ngoni biking dosa. Torang berdoa bagitu, bukang cuma supaya ngoni tau torang ini butul-butul Yesus Kristus pe utusan, tapi supaya ngoni biking yang butul iko Tuhan pe mau. Kalu torang tara dapa kesempatan kase tunju torang ini utusan, tara apa. Yang penting ngoni so biking yang butul.

⁸ Karna kalu ngoni ada biking barang yang butul, torang tara bole lawan pa ngoni. Torang cuma mo tolong pa ngoni supaya ngoni iko ajaran yang butul.

⁹ Barang, biar orang lia torang ini pemimpin yang tara kuat, torang pe hati tetap sanang asal ngoni pe percaya kuat pa Tuhan Yesus. Torang minta pa Tuhan la ngoni jadi tamba butul-butul iko pa Dia.

¹⁰ Jadi kita tulis surat ini untuk ngoni waktu kita masi jao dari ngoni la ngoni bertobat, supaya nanti waktu kita so sama-sama deng ngoni kita tara usa ambe tindakan karas untuk togor pa ngoni karna memang Tuhan so kase kuasa pa kita deng maksut untuk kase kuat ngoni pe percaya, bukang mo kase ancor ngoni pe percaya.

Paulus pe ahir surat

¹¹ Sudara-sudara, di ahir kita pe surat ini, kita minta ngoni samua hati sanang suda karna Tuhan. Ngoni berusaha la ngoni tamba butul-butul iko pa Tuhan Allah. Kong ngoni tarima kita pe nasehat samua ini. Ngoni hidup satu hati, deng hidup baku bawa bae-bae. Kalu ngoni hidup bagitu, Tuhan Allah yang sayang pa torang deng yang biking torang pe hati jadi tenang, akan sama-sama deng ngoni.

¹² Kong waktu ngoni baku dapa, ngoni baku kase salam satu deng yang laeng untuk kase tunju ngoni baku sayang. Samua orang yang so jadi Tuhan Allah pe umat di sini, ada kirim salam pa ngoni.

¹³ Kita minta supaya Tuhan Yesus Kristus kase Dia pe bae pa ngoni, deng supaya Tuhan Allah sayang pa ngoni, deng supaya ngoni samua bole hidup satu hati deng Roh Kudus.