1 Yohanes 2 - Perjanjian Baru Bahasa Melayu Maluku Utara

Yesus Kristus yang mo bela pa torang

¹ Sudara-sudara yang kita sayang sama deng kita pe ana-ana, kita tulis surat ini pa ngoni supaya jang ngoni biking dosa lagi. Tapi kalu ada dari ngoni yang biking dosa, ada yang mo bela pa dia di Tuhan Allah torang pe Bapa pe muka. Yang mo bela itu, Yesus Kristus, Dia yang adil.

² Dia mati jadi korban supaya torang pe dosa dapa ampun. Kong bukang cuma torang pe dosa, tapi samua orang di dunia ini pe dosa-dosa lagi.

Orang yang biking Tuhan Allah pe parenta dia hidup di tarang

³ Kalu torang iko Tuhan Allah pe parenta-parenta, itu kase tunju torang butul-butul kanal pa Tuhan Allah.

⁴ Sapa saja yang bilang, “Kita kanal pa Tuhan Allah,” tapi dia tara biking Tuhan Allah pe parenta-parenta, dia itu pangbafoya kong ajaran yang butul tara ada di dia pe dalam hati.

⁵ Tapi sapa saja yang biking Tuhan Allah pe parenta-parenta, pa dia itu ada Tuhan Allah pe sayang yang biking dia bole sayang pa orang deng sempurna. Itu yang biking torang tau, torang hidup satu hati deng Tuhan Allah.

⁶ Jadi sapa saja yang bilang dia hidup satu hati deng Tuhan Allah, dia musti hidup sama deng Yesus Kristus pe cara hidup.

⁷ Sudara-sudara yang kita sayang, parenta yang kita tulis ini, bukang parenta yang baru tapi parenta yang so ada pa ngoni dari dulu. Parenta itu bagini: ngoni musti baku sayang satu deng yang laeng. Itu firman yang ngoni so perna dengar.

⁸ Tapi biar so lama, parenta yang kita tulis ini me tetap baru, karna parenta itu ngoni so lia Yesus jaga biking, deng ngoni me jaga biking. Itu sama deng galap so mulai ilang, kong tarang yang butul so bacahaya.

⁹ Sapa saja yang bilang dia hidup di tarang tapi dia binci pa dia pe sudara yang percaya, itu sama deng dia masi hidup di galap sampe skarang.

¹⁰ Sapa yang sayang pa dia pe sudara yang percaya, dia tetap ada di tarang, kong tarada yang biking dia jadi berdosa.

¹¹ Tapi sapa yang binci pa dia pe sudara yang percaya pa Tuhan, dia itu masi hidup di galap. Dia tara tau mo pigi di mana, karna galap itu yang biking sampe dia so tara lia apa-apa.

Orang yang hidup di tarang tara iko dunia pe mau

¹² Ngoni yang kita sayang sama deng kita pe ana-ana, kita tulis surat ini pa ngoni, barang ngoni so dapa ampun dari ngoni pe dosa karna apa yang Yesus Kristus so biking.

¹³ Bapa-bapa, kita tulis surat ini pa ngoni, karna ngoni so kanal pa Dia yang so ada dari dulu waktu dunia ini bolong ada. Kita me tulis surat ini pa ngoni pemuda-pemuda karna ngoni so kase kala Iblis, setang-setang pe raja.

¹⁴ Ana-ana, kita tulis surat ini pa ngoni, karna ngoni so kanal pa Tuhan Allah, torang pe Bapa. Bapa-bapa, kita tulis surat ini pa ngoni, barang ngoni so kanal pa Dia yang so ada dari dulu waktu dunia bolong ada. Kita me tulis surat ini pa ngoni pemuda-pemuda, karna ngoni pe percaya kuat, Tuhan Allah pe firman ada di ngoni pe hati, deng ngoni so kase kala pa Iblis, setang-setang pe raja.

¹⁵ Ngoni tara bole sayang dunia yang jahat ini deng samua yang ada. Kalu ngoni sayang dunia ini, pasti ngoni so tara sayang pa Tuhan Allah torang pe Bapa.

¹⁶ Karna samua yang jahat yang ada di dunia ini, pe asal bukang dari Tuhan Allah, torang pe Bapa, tapi dari manusia. Yang jahat di dunia itu bagini: hidup iko manusia pe mau yang suka biking dosa, ingin apa saja yang dapa lia deng mata, deng basombong deng apa yang ada pa dia.

¹⁷ Dunia ini cuma sementara saja, kong akan ancor. Samua yang manusia ingin me nanti ilang. Tapi orang yang jaga biking Tuhan Allah pe mau, dia itu tetap hidup deng Tuhan Allah sampe slama-lamanya.

Orang yang hidup di tarang musti jaga diri bae-bae jang sampe dapa tipu

¹⁸ Ngoni yang kita sayang sama deng kita pe ana-ana, hari kiamat so dekat, kong ngoni so dengar to, satu orang yang musu pa Yesus Kristus akan datang. Mala skarang dorang itu so banya yang datang. Itu dia pe tanda torang bole tau, hari kiamat so dekat.

¹⁹ Dorang yang musu pa Yesus Kristus itu, dulu dorang satu jemaat deng torang. Tapi dorang so kaluar dari torang. Kalu dorang butul iko Tuhan sama deng torang, dorang tara kase tinggal pa torang. Tapi biar bagitu suda, supaya torang tau, dorang itu tara sama deng torang yang iko pa Tuhan.

²⁰ Tapi ngoni, Tuhan Allah so kase Roh Kudus untuk kuasai pa ngoni, deng karna itu, ngoni samua so tau ajaran yang butul.

²¹ Kita tulis surat ini pa ngoni, bukang karna ngoni tara tau ajaran yang butul, tapi karna ngoni so tau itu, deng ngoni me tau, tarada yang tara butul di ajaran yang butul itu.

²² Sapa yang pangbafoya? Tantu orang yang bilang kata, Yesus Kristus itu bukang Raja yang Tuhan Allah pili untuk kase slamat pa manusia. Orang itu musu pa Yesus Kristus. Dia tara percaya pa Bapa torang pe Tuhan Allah deng pa Anak Allah.

²³ Barang, sapa yang manyangkal pa Anak Allah, dia tara hidup satu hati deng Tuhan Allah torang pe Bapa. Tapi sapa yang mangaku Yesus itu Anak Allah, itu dia me so hidup satu hati deng Tuhan Allah torang pe Bapa.

²⁴ Jadi apa yang ngoni so dengar dari dulu waktu ngoni baru jadi percaya, ngoni simpang di ngoni pe hati bae-bae. Deng bagitu, ngoni tetap hidup satu hati deng Anak deng Bapa.

²⁵ Kong Anak itu pe janji pa torang bagini: torang mo hidup deng Tuhan Allah slama-lamanya.

²⁶ Samua yang kita tulis pa ngoni ini, mo kase tau pa ngoni tentang orang-orang yang berusaha mo tipu pa ngoni deng ajaran yang tara butul.

²⁷ Tapi untuk ngoni sandiri, Tuhan Allah so kase Roh Kudus untuk kuasai pa ngoni. Roh itu masi tetap ada pa ngoni, jadi ngoni so tara perlu lagi orang laeng ajar. Roh Kudus itu so ajar pa ngoni tentang samua hal. Apa yang Dia kase ajar itu butul deng tara foya. Kong karna ngoni so tarima ajaran itu dari Dia, ngoni musti tetap hidup satu hati deng Yesus Kristus.

²⁸ Ngoni yang kita sayang sama deng kita pe ana-ana, ngoni musti tetap hidup satu hati deng Yesus Kristus, supaya waktu Dia datang ulang, torang so tara tako deng tara malu mo mangada pa Dia.

²⁹ Ngoni tau Dia itu butul, jadi ngoni me musti tau, tiap orang yang jaga biking barang yang butul, orang itu so jadi Tuhan Allah pe ana.