1 Timotius 5 - Perjanjian Baru Bahasa Melayu Maluku Utara

Cara togor pa orang percaya yang biking sala

¹ Timotius, kalu ada laki-laki yang lebe tua dari ngana biking sala, jang ngana togor deng karas pa dia. Tapi nasehat pa dia palang-palang, bicara bae-bae sama deng ngana bicara pa ngana pe papa sandiri. Bagitu lagi deng ana laki-laki muda, ngana musti nasehat pa dorang bae-bae sama deng dorang itu ngana pe ade sandiri.

² Bagitu lagi deng parampuang-parampuang yang lebe tua dari ngana. Kalu dorang sala, ngana musti bicara pa dorang bae-bae sama deng dorang itu ngana pe mama sandiri. Pa nona-nona me bagitu, ngana kase nasehat pa dorang bae-bae sama deng dorang itu ngana pe ade sandiri. Deng samua yang ngana biking ini, ngana pe hati musti bersi.

Tentang janda-janda

³ Ngana musti hormati janda-janda deng perhatikan dong pe keperluan, lebe-lebe yang so tarada orang yang bantu pa dorang.

⁴ Tapi kalu janda yang ada ana atau cucu, ana deng cucu itu yang musti urus pa dia. Dorang musti balajar la balas dorang pe orang tua pe bae pa dorang. Deng biking bagitu, dorang so biking sanang Tuhan Allah pe hati.

⁵ Kalu janda yang so tarada sapa-sapa yang mo urus pa dia, dia pe tampa baharap cuma pa Tuhan Allah. Siang deng malam dia berdoa minta tolong pa Tuhan Allah.

⁶ Tapi janda yang cuma suka hidup basanang-sanang, biar dia masi hidup, dia sama deng so mati.

⁷ Kase inga bae-bae la dorang iko samua hal ini, supaya orang tara bisa kase sala pa dorang.

⁸ Karna kalu ada orang yang tara mau urus orang-orang yang ada hubungan keluarga deng dia, apalagi dia pe keluarga yang satu ruma deng dia, itu sama saja dia so manyangkal pa Tuhan Yesus. Orang itu lebe soe dari orang yang tara percaya pa Tuhan.

⁹ Janda yang jemaat daftar mo bantu itu, dia pe sarat bagini: umur anam pulu taong ka atas, selama dia masi baruma tangga, dia setia deng laki satu,

¹⁰ deng orang-orang musti tau dia itu orang bae-bae. Dia urus dia pe ana-ana bae-bae, suka tarima orang laeng di dia pe ruma, jaga layani pa orang-orang yang percaya pa Tuhan, deng jaga bantu pa orang-orang susa. Jadi dia itu salalu biking bae pa samua orang.

¹¹ Tapi kalu janda-janda yang dong pe umur bolong sampe anam pulu taong, jang dulu daftar pa dorang untuk dapa bantuan. Barang, kalu dorang ingin kawing, dorang mo kawing lagi. Deng dorang so tarada waktu mo layani Yesus Kristus pe jemaat deng bae-bae.

¹² Deng bagitu, dorang so langgar dong pe janji dulu untuk layani jemaat. Karna itu, Tuhan Allah akan hukum pa dorang.

¹³ Jadi kalu jemaat so bantu pa janda-janda yang umur bolong anam pulu taong, jang sampe dorang jadi pamalas deng suka kaluar maso orang pe ruma kong bacarita orang pe busu, suka campur orang laeng pe urusan, deng bacarita barang yang tara bae.

¹⁴ Karna itu, kita bilang, janda-janda yang masi muda lebe bae dorang kawing lagi, supaya dorang bole dapa ana, kong urus dong pe ruma tangga sandiri. Deng bagitu, Iblis tara dapa jalang untuk kase tara bae torang yang percaya pe nama.

¹⁵ Kita nasehat pa ngana bagitu, karna ada babarapa janda muda yang so iko jalang sesat. Dorang cuma iko Iblis, setang-setang pe raja pe mau.

¹⁶ Kalu ada parampuang yang percaya, kong dia pe anggota keluarga ada yang so janda, dia suda yang musti bantu pa janda itu supaya tara kase beban pa jemaat. Deng bagitu, jemaat bole bantu pa janda-janda yang laeng yang memang so tarada sapa-sapa yang bantu pa dorang.

Penatua-penatua jemaat pe cara karja

¹⁷ Penatua-penatua jemaat yang biking dong pe tugas deng butul, dorang itu pantas dapa hormati deng kase honor dua kali lipa, lebe-lebe lagi deng dorang yang rajin kase tau Kabar Bae dari Tuhan Allah deng mangajar di jemaat.

¹⁸ Kita bilang bagitu karna di dalam Kitab Suci ada conto yang tatulis bagini, “Sementara sapi bakarja karas untuk torang, jang torang ika dia pe mulu. Kase biar sapi itu pe mulu tara taika, supaya dia bole makang.” Ada lagi di dalam Kitab Suci yang tatulis bagini, “Sapa yang bakarja, dia itu yang pantas dapa upah.”

¹⁹ Kalu ada orang yang lapor penatua satu biking dosa, jang dulu ngana percaya. Musti ada dua atau tiga saksi supaya laporan itu kuat, baru ngana percaya kong urus pa dia.

²⁰ Kalu dia butul biking dosa, ngana musti togor pa dia di samua orang percaya pe muka. Deng bagitu, orang percaya laeng jadi tako biking dosa.

²¹ Timotius, ngana musti biking tugas yang kita kase pa ngana ini, tara bole pili-pili orang. Kita bilang ini, Tuhan Allah, Kristus Yesus deng malaekat-malaekat yang Tuhan Allah pili me dengar.

²² Kong jang ngana capat-capat taru ngana pe tangan untuk lantik pa orang yang mo layani di jemaat. Kalu ada orang yang biking dosa, jang ngana taiko biking dosa sama deng dorang. Ngana musti jaga ngana pe hidup supaya tetap bersi.

²³ Kita tau ngana jaga puru saki deng ada saki laeng lagi. Jadi jang ngana cuma minum aer puti, tapi minum anggur sadiki la kase ilang ngana pe rasa saki.

²⁴ Ada orang yang biking dosa kantara skali. Biar Tuhan bolong adili pa dorang, orang-orang so tau dong pe dosa. Ada laeng yang biking dosa tapi bolong kantara. Nanti satu waktu baru dapa tau dorang pe sala.

²⁵ Bagitu lagi deng orang yang biking yang bae. Yang laeng dia pe bae kantara skali, tapi yang laeng dia pe bae bolong kantara. Nanti satu waktu baru orang-orang mo dapa tau.