1 Timotius 4 - Perjanjian Baru Bahasa Melayu Maluku Utara

Ati-ati deng orang-orang yang jaga kase ajar ajaran sesat

¹ Roh Kudus so bilang deng jelas, nanti dekat-dekat hari kiamat, ada orang percaya yang akan kase tinggal lagi dorang pe percaya pa Tuhan Allah, kong taiko pa setang-setang yang jaga kase sesat pa manusia. Dorang itu cuma mo iko setang-setang pe ajaran.

² Orang-orang yang jaga kase ajar ajaran sesat, dorang itu munafik deng tukang bafoya. Dorang so tarada hati lagi, so tara tau mana yang butul.

³ Dorang kase ajar kata, orang tara bole kawing, deng tara bole makang makanang yang dorang bilang haram. Padahal, Tuhan Allah so biking samua makanang la torang makang. Jadi kalu torang yang percaya yang iko ajaran yang butul itu mo makang, bole, asal makang deng bilang tarimakasi pa Tuhan Allah.

⁴ Barang, samua yang Tuhan Allah biking itu bae, tarada yang haram, asal torang tarima deng bilang tarimakasi pa Tuhan Allah.

⁵ Karna Tuhan Allah pe firman deng torang pe doa yang biking sampe samua itu tara jadi haram.

Kristus Yesus pe pelayan yang bae

⁶ Timotius, ngana musti kase ajar hal-hal itu turus pa orang-orang percaya supaya dorang jang iko ajaran sesat. Kalu ngana kase ajar samua itu, ngana so jadi Kristus Yesus pe pelayan yang bae. Ngana pe percaya me akan jadi kuat karna ngana iko turus ajaran yang butul yang orang ajar pa ngana dari dulu.

⁷ Jang ngana badekat deng orang-orang yang suka carita dulu-dulu yang tarada dia pe guna, yang Tuhan Allah tara suka itu. Tapi lebe bae, ngana lati ngana pe diri bae-bae supaya ngana bole biking Tuhan Allah pe mau.

⁸ Ambe conto, kalu torang lati torang pe badan supaya kuat, itu bagus, tapi dia pe guna cuma sadiki. Tapi kalu torang lati torang pe diri untuk biking Tuhan Allah pe mau, dia pe guna banya skali. Kalu lati torang pe diri bagitu, pasti ada berkat untuk torang pe hidup skarang di dunia ini deng nanti waktu torang hidup ulang.

⁹ Kata-kata itu butul deng pantas torang percaya.

¹⁰ Karna itu, torang berusaha karas layani pa Tuhan Allah. Torang biking bagitu karna torang baharap deng yakin pa Tuhan Allah yang hidup. Dia itu yang kase slamat pa samua orang, lebe kusus untuk orang yang percaya pa Dia.

¹¹ Timotius, samua yang kita so bilang pa ngana, ngana kase tau deng kase ajar pa orang, la dorang iko samua itu.

¹² Jang kase biar orang pandang enteng pa ngana gara-gara ngana masi muda. Tapi lebe bae, ngana jadi conto pa orang percaya pake ngana pe bicara, ngana pe kalakuang, ngana pe sayang pa orang laeng, ngana pe percaya pa Tuhan, deng lagi ngana pe cara hidup yang bersi pa Tuhan Allah pe muka.

¹³ Sementara ngana tunggu pa kita mo datang di Efesus, ngana musti rajin baca Kitab Suci untuk orang-orang percaya di situ. Ngana me musti kase smangat pa dorang supaya dorang lebe percaya pa Tuhan deng ajar pa dorang bae-bae.

¹⁴ Ngana musti pake bae-bae karunia yang Roh Kudus so kase pa ngana tempo hari. Karunia itu ngana tarima waktu penatua-penatua jemaat taru tangan kase berdoa pa ngana untuk utus pa ngana. Waktu itu, Tuhan Allah kase tau hal ini pa dorang, kong dorang kase tau pa ngana.

¹⁵ Ngana musti biking samua yang kita so tulis di sini. Ini musti jadi ngana pe tugas yang paling penting. Deng bagitu, orang bole lia ngana ada kemajuan urus jemaat.

¹⁶ Ngana musti jaga bae-bae ngana pe cara hidup, deng jaga supaya ngana cuma ajar ajaran yang butul. Ngana musti biking samua itu turus. Kalu ngana biking samua itu, Tuhan Allah mo kase slamat pa ngana deng orang-orang yang dengar pa ngana.