1 Timotius 3 - Perjanjian Baru Bahasa Melayu Maluku Utara

Sarat-sarat untuk orang yang pimpin jemaat

¹ Memang butul yang orang jaga bilang ini, “Orang yang suka mo pimpin pa orang-orang percaya di jemaat, tugas yang dia suka itu bagus skali.”

² Karna itu, ada sarat-sarat untuk orang-orang yang pimpin jemaat. Dorang itu pe cara hidup musti bagini: hidup butul, dia pe bini cuma satu, dia bisa batahang diri, dia tau ator hal bae-bae, dia sopan, dia suka tarima orang di dia pe ruma, dia pande mangajar,

³ dia tara pangmabo, dia tara pangmara tapi bae-bae, dia suka baku bawa bae deng orang, deng dia tara gila doi.

⁴ Dia me musti tau ator bae-bae dia pe keluarga, deng dia pe ana-ana me musti hormati deng dengar-dengaran pa dia.

⁵ Karna kalu dia tara tau ator dia pe keluarga sandiri, bagimana dia bisa ator Tuhan Allah pe jemaat?

⁶ Orang yang pimpin jemaat tara bole orang yang baru percaya pa Yesus Kristus, supaya jang dorang makang puji. Karna kalu dorang makang puji, dorang jadi sombong, kong Tuhan Allah mo hukum pa dorang sama deng Tuhan Allah hukum pa Iblis, setang-setang pe raja.

⁷ Orang yang pimpin jemaat musti punya nama bae di luar jemaat, supaya jang ada orang yang mo carita busu tentang dia, deng dia tara gampang tagoda iko Iblis pe mau.

Sarat-sarat untuk diaken-diaken

⁸ Bagitu lagi diaken-diaken yang jaga bantu di jemaat. Dorang pe cara hidup musti bagini: kalakuang bae yang biking orang hormati pa dorang, tara munafik, tara pangmabo, deng tara gila doi.

⁹ Dorang musti percaya turus Tuhan Yesus pe ajaran yang Tuhan Allah so kase tau pa torang, kong jaga itu deng hati yang bersi.

¹⁰ Jemaat musti cari tau dulu calon-calon diaken itu pe cara hidup. Kalu dorang tara sala apa-apa, baru pili pa dorang jadi diaken untuk layani jemaat.

¹¹ Bagitu lagi deng dorang pe bini. Dorang pe kalakuang me musti bae yang biking orang hormati pa dorang, deng dorang me tara jaga kase busu orang laeng pe nama. Dorang musti mampo batahang diri, deng orang bisa percaya pa dorang dalam hal apa saja.

¹² Diaken itu pe bini musti cuma satu saja, deng dia musti tau urus dia pe ana-ana deng dia pe keluarga sandiri.

¹³ Kalu diaken-diaken itu layani jemaat bae-bae, pasti jemaat hormati pa dorang. Deng bagitu, dorang tara rasa malu bicara pa sapa saja tentang dorang pe percaya pa Kristus Yesus.

Dasar dari jemaat pe percaya

¹⁴ Timotius, kita harap kita capat mo pigi baku dapa deng ngana. Tapi biar bolong baku dapa, kita so tulis surat ini pa ngana kamuka.

¹⁵ Jadi kalu kita ada alangan kong terlambat datang, kita pe surat so sampe pa ngana kamuka. Deng kita pe surat ini, ngana bole tau, bagimana orang percaya musti hidup sebagai Tuhan Allah pe keluarga. Kita pe maksut bilang Tuhan Allah pe keluarga, itu pe maksut, Tuhan Allah yang hidup pe jemaat. Dia pe jemaat itu yang musti pegang kuat ajaran yang butul, sama deng tiang raja deng fandasi yang biking ruma jadi kuat.

¹⁶ Ajaran yang Tuhan Allah kase pa torang itu butul, kong pe bagus skali, tarada yang bisa lawan! Biar dulu orang bolong tau ajaran itu, skarang Tuhan Allah so kase tau pa torang bagini: Yesus so datang jadi manusia. Roh Kudus yang kase tunju pa torang Dia itu Orang yang butul, deng malaekat-malaekat lia pa Dia. Dia pe Kabar so tasiar sampe di bangsa-bangsa laeng, kong orang-orang di dunia ini percaya pa Dia. Tuhan Allah so angka pa Dia di sorga deng cara yang luar biasa.