1 Timotius 1 - Perjanjian Baru Bahasa Melayu Maluku Utara

Paulus pe salam

¹ Timotius, salam dari kita Paulus, Kristus Yesus pe utusan yang orang sebut rasul. Kita jadi rasul, itu karna iko Tuhan Allah deng Kristus Yesus pe parenta. Tuhan Allah itu yang kase slamat pa torang, deng Kristus Yesus itu yang jadi torang pe harapan.

² Timotius, torang dua sama-sama percaya jadi kita so anggap ngana itu sama deng kita pe ana sandiri. Kita minta pa Tuhan Allah torang pe Bapa, deng pa Kristus Yesus torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.

Ati-ati deng orang-orang yang kase ajar ajaran yang tara butul

³ Waktu kita so kase tinggal pa ngana di kota Efesus kong pigi di Makedonia, kita minta ngana tinggal di situ dulu karna di Efesus ada orang-orang yang kase ajar ajaran sesat, jadi ngana musti kase nasehat pa dorang la dong berenti kase ajar ajaran itu.

⁴ Dorang me jang dengar carita dulu-dulu deng lagi carita tentang orang tua dulu-dulu pe asal usul yang tara abis-abis. Karna orang yang carita itu, dia pe ahir kabawa salalu baku mara. Apalagi itu tara bantu orang la percaya pa Tuhan Allah.

⁵ Kita kase nasehat ini pa ngana, dia pe tujuan supaya orang-orang percaya baku sayang. Torang bisa baku sayang kalu torang pe hati so bersi, torang pe hati tau apa yang butul, deng tong so butul-butul percaya pa Tuhan.

⁶ Tapi ada orang yang so tara iko nasehat itu, mala cuma suka bacarita yang tara dia pe guna.

⁷ Dorang itu cuma suka jadi guru agama untuk kase ajar aturan-aturan di lima kitab Musa, padahal dorang sandiri tara mangarti apa yang dorang ajar, deng dorang tara mangarti kitab-kitab itu pe arti yang dorang kase ajar deng smangat.

⁸ Torang tau aturan-aturan di lima kitab Musa itu bagus. Yang penting torang biking itu, iko Tuhan Allah pe maksut.

⁹ Torang tau aturan-aturan yang ada di lima kitab Musa itu Tuhan Allah pe tujuan bukang untuk orang yang so hidup butul pa Dia pe muka, tapi untuk larang orang-orang yang bagini: yang malawang Tuhan Allah pe parenta, yang tara iko Tuhan Allah pe aturan, yang jaga biking dosa, yang cuma iko dorang pe mau sandiri, yang tara percaya pa Tuhan, yang bunu pa dorang pe papa deng mama deng pa orang laeng,

¹⁰ yang baseks sabarang, laki-laki yang baseks deng laki-laki, yang jaga pancuri orang kong jual untuk biking dia jadi orang karja, yang pangbafoya, yang jadi saksi yang tara butul, deng yang jaga biking hal-hal yang tara baku cocok deng ajaran yang butul.

¹¹ Ajaran yang butul itu, Kabar Bae dari Tuhan Allah. Tuhan Allah itu hebat kong pantas orang puji. Dia yang kase percaya pa kita la kase tau pa orang-orang Kabar Bae itu.

Paulus bersukur pa Kristus Yesus

¹² Kita bersukur pa Kristus Yesus, torang pe Tuhan yang kase kuat pa kita. Kita bersukur pa Dia karna Dia anggap kita ini Dia pe orang yang setia sampe Dia kase percaya pa kita biking Dia pe tugas yang Dia suru.

¹³ Dulu kita yang kase tara bae Dia pe nama. Waktu itu, kita siksa deng hina pa orang-orang yang percaya pa Dia. Tapi biar bagitu me, Dia kase tunju Dia pe rasa kasiang pa kita, karna kita bolong percaya pa Dia, deng tara mangarti apa yang kita biking itu sala.

¹⁴ Mala, torang pe Tuhan kase Dia pe bae pa kita talebe-lebe, sampe kita jadi percaya pa Dia, deng jadi sayang pa orang laeng. Samua itu karna kita so hidup satu hati deng Kristus Yesus.

¹⁵ Kata-kata yang kita mo bilang ini, butul skali. Ngana musti tarima deng percaya deng hati yang sunggu-sunggu bagini, “Kristus Yesus datang di dunia untuk kase slamat orang berdosa.” Kong dari samua orang yang perna biking dosa, kita ini suda yang paling banya biking dosa.

¹⁶ Tapi biar bagitu, Kristus Yesus kase tunju Dia pe rasa kasiang pa kita deng Dia tara hukum pa kita. Apalagi, karna kita ini orang yang paling berdosa, Yesus Kristus kase tunju Dia pe sabar pa kita. Deng bagitu kita jadi conto untuk orang laeng yang berdosa, supaya dorang me bole percaya pa Yesus Kristus la hidup deng Tuhan Allah slama-lamanya.

¹⁷ Mari torang hormati pa Tuhan Allah. Dia itu Raja sagala jaman. Tarada yang bisa lia Dia, Dia ada slama-lamanya, deng Dia cuma satu saja. Puji deng hormat pa Dia sampe slama-lamanya. Amin.

Timotius pe tugas

¹⁸ Timotius, kita so anggap ngana itu sama deng kita pe ana sandiri! Kita suru ngana iko tugas yang kita so bilang ini. Tugas ini sama deng yang Tuhan Allah so kase pa ngana, yang Dia pe utusan kase tau pa ngana dulu. Jadi biking butul-butul ngana pe tugas ini sama deng satu tentara yang lawan pa orang yang serang dia pe daera. Kong supaya ngana biking tugas itu bae-bae, ngana musti percaya kuat Tuhan pe ajaran yang torang so kase tau pa ngana, turus apa yang ngana biking, ngana pe hati musti tau itu butul.

¹⁹ Barang, ada babarapa orang yang so tara iko lagi yang butul yang dorang tau itu, sampe dorang so tara percaya lagi pa Tuhan.

²⁰ Dari dorang itu, ada Himeneus deng Aleksander. Kita so serakan dorang dua pa Iblis, setang-setang pe raja. Kita biking bagitu supaya dorang sadar kong berenti kase tara bae Tuhan Allah pe nama.