1 Petrus 4 - Perjanjian Baru Bahasa Melayu Maluku Utara

Orang yang percaya musti hidup iko Tuhan Allah pe mau

¹ Yesus Kristus so menderita, karna itu ngoni musti kase kuat ngoni pe hati deng pikiran supaya siap menderita sama deng Dia. Karna sapa yang menderita, dia so berenti biking dosa.

² Jadi selama ngoni masi hidup di dunia, ngoni pake waktu yang ada untuk iko Tuhan Allah pe mau, jang iko manusia pe keinginan.

³ Barang, dulu ngoni pake banya waktu untuk biking hal-hal jahat, sama deng orang-orang yang tara percaya pa Tuhan Allah jaga biking. Ini yang ngoni jaga biking dulu: iko napsu yang tara bae, iko keinginan-keinginan yang cafarune, jaga bamabo, jaga bapesta kong mabo-mabo sampe biking hal-hal sabarang, pesta minuman, deng jaga semba pa puji-puji yang sebenarnya tara bole semba.

⁴ Tapi skarang, dorang yang jaga biking hal-hal jahat itu jadi herang pa ngoni, karna ngoni so tara iko biking barang yang jahat sampe tarada dia pe batas, sama deng dorang. Jadi dorang kase tara bae ngoni pe nama.

⁵ Tapi nanti, dorang itu musti tanggung jawab pa Tuhan Allah tentang samua yang dong so biking. Tuhan Allah itu yang so siap mo adili pa orang yang hidup deng yang mati.

⁶ Itu dia pe sebab sampe Kabar Bae tentang Yesus Kristus ada kase tau lagi pa orang-orang yang so mati, supaya biar dorang pe badan so mati sama deng samua orang di dunia ini akan dapa, tapi dorang pe roh mo hidup di sorga. Tuhan Allah pe Roh Kudus mo kase dorang hidup deng Tuhan Allah slama-lamanya.

Pake bae-bae karunia yang Tuhan Allah so kase

⁷ Hari kiamat so dekat. Karna itu, ngoni musti kuasai ngoni pe diri, deng ngoni pe pikiran musti tenang supaya ngoni bisa berdoa.

⁸ Yang paling penting, ngoni musti butul-butul baku sayang satu deng yang laeng. Karna deng torang baku sayang, tong so tara inga orang laeng pe sala pa torang biar pe banya skali.

⁹ Ngoni me musti tarima orang laeng di ngoni pe ruma deng sanang hati, jang mengelu.

¹⁰ Tiap orang dari ngoni so tarima karunia dari Tuhan Allah untuk layani satu deng yang laeng. Tuhan Allah kase karunia itu karna Dia pe bae, jadi tiap orang musti pake macam-macam karunia itu bae-bae.

¹¹ Ambe conto bagini, kalu ada orang yang dapa karunia untuk kase tau Tuhan Allah pe firman pa orang-orang, dia musti pake karunia itu supaya orang mangarti Tuhan Allah pe firman. Kalu ada orang yang dapa karunia untuk bantu pa orang, dia pake karunia yang dia pe kekuatan dari Tuhan Allah itu untuk tolong pa orang. Jadi, pake karunia yang ada pa ngoni itu bae-bae la orang bole puji deng hormat pa Tuhan Allah. Tuhan Allah dapa puji karna ngoni itu Yesus Kristus pe umat. Tuhan Allah itu memang hebat deng Dia pe kuasa ada sampe slama-lamanya. Amin.

Torang dapa penderitaan karna iko pa Yesus

¹² Sudara-sudara yang kita sayang, ngoni dapa siksa yang barát skali, tapi siksa itu untuk uji ngoni pe percaya la ngoni pe percaya tamba kuat. Jadi jang ngoni herang kalu ngoni dapa siksa, deng jang ngoni pikir cuma ngoni saja yang dapa siksa.

¹³ Tapi lebe bae, ngoni sanang suda deng siksa yang ngoni dapa itu, karna itu berarti, ngoni so rasa sadiki siksa yang perna Yesus Kristus rasa. Deng bagitu, nanti waktu Dia datang ulang kong kase tunju Dia pe kuasa yang luar biasa, ngoni akan sanang deng basimore skali.

¹⁴ Kalu ngoni dapa hina karna ngoni iko pa Yesus Kristus, ngoni itu paling sanang suda! Barang, itu berarti Tuhan Allah pe Roh yang luar biasa ada sama-sama deng ngoni.

¹⁵ Tapi jang sampe ada dari ngoni yang dapa siksa gara-gara bunu orang, pancuri orang pe barang, jadi orang jahat, atau suka campur orang laeng pe urusan.

¹⁶ Tapi, kalu ngoni dapa siksa karna ngoni orang Kristen, jang ngoni malu. Lebe bae ngoni puji deng hormat pa Tuhan Allah karna ngoni so jadi Yesus Kristus pe umat.

¹⁷ Barang, skarang so dekat dia pe waktu untuk Tuhan Allah mo adili pa samua orang, kong yang kakamuka Dia mo adili itu Dia pe umat sandiri. Jadi kalu Tuhan Allah mo adili pa torang kamuka, bagimana nanti yang mo jadi deng orang-orang yang tara percaya Kabar Bae dari Tuhan Allah?

¹⁸ Di Kitab Suci ada tatulis bagini, “Kalu orang yang hidup butul pa Tuhan Allah pe muka saja amper-amper tara dapa slamat, bagimana lagi deng orang-orang yang tara iko pa Tuhan Allah deng orang-orang yang jaga biking dosa, pasti dong tara slamat, to?”

¹⁹ Jadi, kalu ada orang yang dapa siksa karna Tuhan Allah pe mau, dia musti serakan dia pe diri pa Tuhan Allah, deng dia musti biking barang yang bae turus. Tuhan Allah itu yang so biking samua-samua deng Dia itu setia.