1 Petrus 2 - Perjanjian Baru Bahasa Melayu Maluku Utara

Yesus itu sama deng batu fandasi yang paling penting untuk orang percaya

¹ Karna ngoni so dapa hidup yang baru itu, berenti suda biking samua yang jahat. Jang bicara foya, jang pura-pura bae, jang mangiri, deng jang biking busu orang laeng pe nama.

² Ngoni musti suka skali Tuhan pe Firman, sama deng bayi yang baru lahir yang suka skali minum dia pe mama pe aer susu. Deng bagitu, ngoni pe percaya pa Tuhan mo lebe tatamba kuat kong ngoni akan dapa slamat dari dosa-dosa.

³ Ngoni musti suka skali Tuhan pe firman karna memang ngoni sandiri so rasa Tuhan pe bae.

⁴ Datang suda pa Tuhan Yesus. Dia itu sama deng batu yang hidup, barang Dia yang biking manusia bole hidup. Dia itu sama deng batu yang manusia so buang, tapi Tuhan Allah pili Dia itu jadi sama deng batu fandasi yang paling penting.

⁵ Turus ngoni ini me sama deng batu yang hidup, batu yang Tuhan Allah pake untuk kase badiri Dia pe tampa tinggal. Itu berarti, Tuhan Allah pe Roh Kudus mo tinggal pa ngoni orang-orang yang percaya pe tenga-tenga. Deng ngoni me so jadi sama deng imam-imam yang pe hati bersi pa Tuhan Allah pe muka, jadi ngoni kase persembahan iko Tuhan Allah pe mau. Kong Tuhan Allah sanang tarima ngoni pe persembahan itu karna apa yang Yesus Kristus so biking untuk torang samua.

⁶ Karna di Kitab Suci ada tatulis bagini, “Perhatikan bae-bae, Kita so pili batu satu yang berharga. Batu itu Kita so taru jadi batu fandasi yang paling penting di Yerusalem, kota yang orang sebut Sion. Kong sapa yang percaya pa Dia, tara akan kecewa.”

⁷ Jadi untuk ngoni yang percaya pa Yesus, Dia itu paling berharga. Tapi untuk dorang yang tara percaya, Tuhan Allah so bilang bagini di Kitab Suci, “Batu yang tukang-tukang bangunan so tara pake, so jadi batu fandasi yang paling penting.”

⁸ Kong ada lagi yang tatulis bagini, “Batu itu yang biking banya orang tagate, kong dorang cilaka.” Jadi bagini: orang-orang yang tara mau iko Tuhan Allah pe firman tentang Yesus, dorang itu sama deng orang-orang yang tagate di batu kong cilaka. Tuhan Allah so ator memang apa yang jadi itu pa dorang.

⁹ Tapi ngoni ini suda yang Tuhan Allah so pili jadi Dia pe umat, kong biking ngoni jadi sama deng imam yang jaga layani pa Dia yang jadi torang pe Raja. Dia kase pisa pa ngoni dari samua orang untuk jadi Dia pe umat sandiri, kong ngoni jadi Dia pe rakyat yang pe hati bersi pa Dia pe muka. Ngoni jadi bagitu, supaya ngoni bole kase tau pa orang-orang hal-hal luar biasa yang Dia so biking. Dia itu suda yang so pangge pa ngoni kaluar dari galap, maso pa Dia pe tarang yang luar biasa.

¹⁰ Dulu, ngoni itu bukang Tuhan Allah pe umat, tapi skarang ngoni so jadi Dia pe umat. Dulu ngoni me bolong tarima Tuhan Allah pe rasa kasiang, tapi skarang ngoni so tarima Dia pe rasa kasiang itu.

Orang percaya pe kalakuang musti bagus

¹¹ Sudara-sudara yang kita sayang, ngoni orang-orang percaya ini sama deng orang-orang pendatang deng orang-orang yang cuma hidup sementara saja di dunia ini. Jadi kita kase nasehat pa ngoni, jang ngoni hidup iko ngoni pe keinginan yang tara bae yang salalu baku lawan deng ngoni pe mau untuk biking barang yang bae.

¹² Ngoni pe kalakuang musti bagus di orang-orang yang tara kanal pa Tuhan Allah pe muka, supaya kalu dong bicara tara bae tentang ngoni kong bilang kata, ngoni jaga biking barang yang jahat, dorang tau itu tara butul karna dorang akan dapa lia ngoni pe kalakuang-kalakuang yang bagus. Jadi, waktu hari kiamat kong Tuhan Allah datang ulang, dorang akan puji deng hormat pa Tuhan Allah.

Dengar-dengaran deng hormati pa pemimpin

¹³ Ngoni so iko pa Tuhan, jadi ngoni musti dengar-dengaran pa samua orang yang berkuasa di dunia ini. Ngoni musti dengar-dengaran pa raja basar Roma yang pe kuasa paling tinggi,

¹⁴ sampe pa orang-orang yang raja kase tugas untuk pimpin pa ngoni. Dorang itu dapa tugas untuk hukum pa orang yang biking barang yang jahat, deng untuk puji pa orang yang biking barang yang bae.

¹⁵ Barang, Tuhan Allah pe mau ngoni biking barang yang bae, supaya orang yang tara tau apa-apa tara barani lagi mo bicara tara bae tentang ngoni, karna so jelas yang dorang mo bicara itu tara butul.

¹⁶ Ngoni ini Tuhan Allah so kase bebas pa ngoni dari kuasa dosa, tapi jang ngoni pake hak itu jadi alasan untuk biking barang yang jahat lagi. Tapi lebe bae ngoni hidup untuk biking apa yang Tuhan Allah suru.

¹⁷ Ngoni musti hormati pa samua orang deng sayang pa ngoni pe sudara-sudara yang sama-sama percaya. Ngoni me musti tako pa Tuhan Allah, deng hormati pa raja basar Roma.

Musti tahang menderita, iko Yesus Kristus pe conto

¹⁸ Ee, ngoni orang-orang karja, ngoni musti dengar-dengaran pa ngoni pe tuang deng hormati butul-butul pa dorang, bukang cuma kalu dia bae deng tara kasar pa ngoni, tapi biar lagi dia jahat me, ngoni musti dengar-dengaran pa dia.

¹⁹ Barang, kalu ada dari ngoni yang dapa siksa biar tara biking sala apa-apa, kong kalu ngoni sadar Tuhan Allah ada sama-sama deng ngoni, Tuhan Allah yang lia itu akan kase Dia pe bae pa ngoni.

²⁰ Barang, kalu ngoni menderita karna biking dosa, apa dia pe untung? Tarada to? Tapi kalu ngoni menderita karna biking barang yang bae kong ngoni tetap sabar, Tuhan Allah pasti kase Dia pe bae pa ngoni.

²¹ Karna Tuhan Allah pangge pa ngoni untuk biking barang yang bae biar lagi menderita, barang Yesus Kristus me so menderita kong so kase conto tahang menderita, supaya ngoni pe hidup me iko conto yang Dia so kase tunju.

²² Sama deng yang so tatulis di Kitab Suci bagini, “Dia tara perna biking dosa, deng tara perna bicara putar bale.”

²³ Waktu orang hina pa Dia, Dia tara balas hina pa orang itu. Waktu orang siksa pa Dia, Dia tara ancam mo balas pa dorang yang siksa pa Dia. Mala, Dia cuma serakan saja Dia pe diri pa Tuhan Allah, yang mo adili orang deng adil.

²⁴ Dia sandiri yang tanggung torang pe dosa waktu Dia mati di kayu salib, supaya torang bole bebas dari dosa pe kuasa, kong torang bole hidup untuk biking barang yang butul pa Tuhan Allah pe muka. Kong karna Dia pe luka-luka itu, torang jadi bae.

²⁵ Karna ngoni dulu tara iko pa Tuhan, sama deng domba yang ilang, tapi skarang ngoni so bale iko pa Tuhan, Dia itu yang jaga bae-bae pa ngoni pe jiwa sama deng gembala yang jaga bae-bae dia pe domba.