1 Korintus 9 - Perjanjian Baru Bahasa Melayu Maluku Utara

Paulus babela dia pe diri pa orang Korintus, bilang butul dia itu rasul

¹ Kita ini Yesus Kristus pe utusan yang orang sebut rasul, to? Kita ini orang yang bebas biking apa saja yang kita pikir butul, to? Kita yang so lia pa Yesus, torang pe Tuhan deng kita pe mata kapala sandiri, to? Kong karna kita pe suar lala kase tau Tuhan pe firman sampe ngoni jadi percaya, to?

² Kong biar orang laeng tara percaya kita ini rasul, tapi ngoni percaya kita ini rasul, karna ngoni percaya pa Tuhan waktu kita kase tau firman pa ngoni. Itu bukti kita ini memang rasul.

³ Kong untuk orang yang kase sala pa kita, kata, kita ini bukang rasul, ini yang kita bilang pa dorang:

⁴ kita deng Barnabas ada hak sama deng rasul yang laeng untuk makang deng minum dari torang pe suar lala yang kase tau Tuhan pe firman. Iyo, to?

⁵ Torang me ada hak untuk kawing deng parampuang yang percaya pa Tuhan Yesus. Kong kalu kita ada bini, dia me bole kita bawa waktu tong bajalang jao kase tau Kabar Bae pa orang-orang, sama deng rasul yang laeng ada bawa dong pe bini yang percaya pa Tuhan, bagitu lagi Tuhan Yesus pe sudara-sudara deng Petrus. Iyo, to?

⁶ Atau ngoni kira kata, cuma kita deng Barnabas saja yang musti karja di luar pelayanan untuk dapa torang pe hidup hari-hari, kong rasul-rasul yang laeng tarada?

⁷ Coba ngoni pikir, tarada tentara yang baongkos dia pe diri sandiri waktu biking dia pe tugas. Tarada orang kobong yang tanam anggur, kong tara makang dari dia pe hasil kobong itu. Turus, tarada orang yang piara domba, kong tara minum susu dari domba itu. Samua itu butul, to?

⁸ Kita pe maksut, orang yang kase tau Tuhan pe firman pa orang-orang, dorang ada hak untuk hidup dari dong pe suar lala itu. Itu bukang cuma manusia pe pikiran saja, tapi itu sama deng yang tatulis di lima kitab Musa, to?

⁹ Karna di aturan-aturan itu, nabi Musa tulis bagini, “Sapi yang bakarja karas untuk torang, jang torang ika dia pe mulu. Kase biar saja, supaya dia bisa makang!” Jadi dari yang so tatulis itu, jang ngoni kira Tuhan Allah pe maksut itu di sapi.

¹⁰ Ngoni so tau to, tulisan itu pe tujuan untuk torang manusia! Tulisan itu pe arti bagini: orang yang bakarja di kobong, atau yang batumbu gandum untuk kase lapas dia pe kuli, dong pantas baharap mo dapa bagian dari dong pe karja itu. Bagitu lagi deng torang rasul-rasul.

¹¹ Torang ini so kase tau Kabar Bae tentang Yesus Kristus pa ngoni, itu sama deng torang so tanam bibit. Kong sama deng orang tanam bibit dapa bagian dari dia pe hasil waktu bapete, pasti torang me bole dapa torang pe bagian untuk torang pe hidup hari-hari dari ngoni, waktu torang kase tau Kabar Bae tentang Yesus Kristus itu pa ngoni, to?

¹² Orang laeng yang ajar firman pa ngoni me baharap pa ngoni untuk dong pe hidup hari-hari, apalagi torang. Pasti torang me ada hak lebe basar untuk dapa itu dari ngoni, to? Tapi biar bagitu me, torang tara pake torang pe hak itu. Biar torang susa, torang tetap batahang kong tara minta apa-apa pa orang yang tong kase tau Tuhan pe firman. Jang sampe deng torang minta itu, biking orang tara mo dengar Kabar Bae tentang Yesus Kristus lagi.

¹³ Ambe conto, orang yang pe karja di Ruma Ibada Pusat di Yerusalem, ngoni pasti tau, dorang dapa makanang dari dong pe karja di situ. Deng imam-imam yang bakar binatang di tampa bakar korban persembahan untuk Tuhan Allah, untuk dong pe hidup hari-hari bisa dong ambe dari binatang yang dong kase korban itu.

¹⁴ Bagitu me Tuhan Allah so bilang, orang yang biking dia pe tugas kase tau Kabar Bae tentang Yesus Kristus, dia musti dapa dia pe hidup hari-hari dari dia pe karja itu.

¹⁵ Tapi biar Tuhan Allah bilang kita ada hak bagitu, kita tara perna pake hak itu. Kong kita tulis surat ini, kita me tarada maksut mo minta apa-apa dari ngoni. Karna kita sanang kita bisa kase tau Kabar Bae tentang Yesus Kristus pa ngoni deng tara minta apa-apa dari ngoni. Lebe bae kita mati daripada kita pe suar lala itu kase ganti deng doi.

¹⁶ Karna waktu kita kase tau Kabar Bae tentang Yesus Kristus, kita tarada alasan untuk mo baangka-angka diri, itu memang so jadi kita pe tugas yang musti kita biking. Cilaka suda kita, kalu kita tara kase tau Kabar Bae itu.

¹⁷ Barang, kalu kita kase tau Kabar Bae itu karna kita pe mau sandiri, kita me harap dapa balasan dari kita pe suar lala itu. Tapi yang kita biking itu bukang kita pe mau sandiri. Kita kase tau Kabar Bae itu, barang Tuhan Allah yang kase percaya pa kita untuk kita biking itu.

¹⁸ Jadi apa kita pe balasan? Ini kita pe balasan: kita sanang kase tau Kabar Bae itu deng cuma-cuma, orang tara perlu bayar pa kita, deng kita tara pake kita pe hak untuk dapa bayar dari pelayanan ini.

¹⁹ Barang, biar kita ini orang bebas, tapi kita biking kita pe diri ini sama deng samua orang pe orang karja, supaya bisa bantu orang-orang jadi percaya pa Tuhan Yesus. Kita biking bagitu, la banya skali orang dapa slamat.

²⁰ Waktu kita ada sama-sama deng orang Yahudi, kita iko dong pe biasa biking aturan-aturan yang ada di lima kitab Musa supaya kita bole pengaru pa dorang untuk tarima Kabar Bae yang kita kase tau itu. Jadi, waktu kita sama-sama deng orang-orang yang pegang kuat aturan-aturan di lima kitab Musa itu, kita me pegang kuat aturan-aturan itu. Tapi sebenarnya karna kita so percaya pa Yesus Kristus, kita so tara perlu lagi biking aturan-aturan itu. Biar bagitu, kita biking saja aturan-aturan itu sama deng dorang, la dong sanang lia kita pe hidup kong percaya pa Tuhan Yesus yang kita kase tau pa dorang.

²¹ Waktu kita bawa Kabar Bae pa orang-orang bukang Yahudi yang tara iko aturan di lima kitab Musa, kita biking kita pe diri sama deng dorang yang tara iko aturan-aturan di lima kitab Musa. Kita biking bagitu, supaya kita bole pengaru pa dorang la dong percaya pa Yesus Kristus. Kita pe maksut, bukang kita langgar Tuhan Allah pe aturan itu, tapi kita tetap iko Yesus Kristus pe parenta.

²² Waktu kita sama-sama deng orang yang dong pe percaya pa Tuhan Yesus bolong kuat, kita batamang deng dorang kong tara biking apa-apa yang dong anggap tara bagus, supaya kita bole pengaru pa dorang la jadi percaya kuat pa Tuhan Yesus, biar cuma sadiki orang dari dorang yang iko.

²³ Samua yang kita biking itu, kita biking la tamba hari tamba banya orang yang percaya Kabar Bae tentang Yesus Kristus, supaya kita deng dorang bole dapa samua yang bae yang Tuhan Allah so janji di Kabar Bae itu.

²⁴ Ngoni tantu tau conto ini. Samua orang yang iko lomba lari, dorang berusaha lari kuat-kuat la dapa juara, tapi yang mo dapa hadia cuma satu orang saja. Bagitu lagi deng ngoni, ngoni me musti berusaha iko Tuhan Allah pe mau sama deng dorang yang lari kuat untuk dapa hadia itu, supaya ngoni bole dapa hadia yang Tuhan Allah so sadia.

²⁵ Samua orang yang iko lomba, kalu mau dapa hadia, dorang musti latihan bae-bae deng jaga diri bae-bae, biar hadia itu tara akan tahang sampe slama-lamanya. Tapi torang yang percaya pa Tuhan Yesus, torang nanti dapa hadia, kong hadia itu sampe slama-lamanya. Jadi, torang musti tahang diri.

²⁶ Karna itu, kita berusaha iko pa Tuhan sama deng kita ada iko lomba lari. Kita tara lari asal lari, tapi kita berusaha lari kuat-kuat sampe di garis finis. Deng kalu kase sama kita deng tukang tinju, kita bukang tukang tinju yang bapukul sabarang.

²⁷ Tapi kita lati kita pe diri sunggu-sunggu deng kita jaga kita pe diri bae-bae iko Tuhan Allah pe mau, supaya nanti kalu kita so abis kase tau Kabar Bae tentang Yesus Kristus pa orang-orang laeng, kita sandiri jang dapa tolak tapi kita dapa upah dari Tuhan Allah.