1 Korintus 8 - Perjanjian Baru Bahasa Melayu Maluku Utara

Tentang daging yang so biking persembahan untuk orang pe puji-puji

¹ Skarang kita mo bicara tentang daging yang orang so biking persembahan untuk dorang pe puji-puji. Memang ngoni orang percaya so tau, orang pe puji-puji itu tarada kuasa. Tapi karna ngoni so tau itu, ada dari ngoni yang jadi sombong. Lebe bae ngoni baku sayang, itu yang bole kase kuat orang pe percaya.

² Kalu ada orang yang kira kata, dia so tau banya hal, sebenarnya yang dia tau itu masi bolong lengkap.

³ Tapi orang yang sayang pa Tuhan Allah, pasti Tuhan Allah kanal pa dia.

⁴ Jadi tentang daging yang orang so biking persembahan untuk dorang pe puji-puji, torang orang percaya tau, torang bole makang itu, karna puji-puji yang ada di dunia ini tara arti apa-apa. Deng, torang lagi tau, cuma ada satu Tuhan saja, Dia itu Tuhan Allah.

⁵ Barang, biar banya orang anggap ‘allah’ deng ‘tuhan’ ada banya di langit deng di bumi, deng memang itu ada,

⁶ tapi untuk torang yang percaya, Tuhan Allah itu cuma satu saja. Dia itu torang pe Bapa, yang cipta samua-samua yang ada di dunia ini, deng Dia itu lagi yang kase torang hidup supaya tong hidup untuk biking Dia pe mau. Torang pe Tuhan me cuma satu, Yesus Kristus. Kong deng Dia itu suda, Tuhan Allah cipta dunia deng samua-samua yang ada. Deng karna Dia, torang bole hidup.

⁷ Tapi biar bagitu, tara samua orang yang tau, orang pe puji-puji itu tarada dia pe kuasa. Ada orang yang waktu bolong percaya Tuhan, dorang kase-kase makang pa dong pe puji-puji. Kong biar dorang so tara semba lagi pa puji-puji itu, di dorang pe hati, dorang masi kira kata, kalu dong makang daging yang orang so kase pa puji-puji itu, dong itu so berdosa pa Tuhan Allah. Dorang pikir bagitu, karna dong pe percaya bolong kuat.

⁸ Sebenarnya, makanang itu sandiri tara biking tong pe hubungan lebe dekat deng Tuhan Allah. Torang tara rugi kalu tara makang, deng tong tara untung lagi kalu tong makang.

⁹ Tapi, biar ngoni bisa makang makanang apa saja, ngoni musti tetap ati-ati, jang sampe deng ngoni makang itu, itu biking ngoni pe sudara laeng yang bolong kuat percaya pa Tuhan, jadi berdosa. Itu sama deng ngoni biking dorang pe kaki tagate di batu kong jatu.

¹⁰ Kita pe maksut bagini: ngoni orang percaya so tau to, tara jadi masala makang daging yang orang so kase pa puji-puji. Turus, orang yang pe percaya bolong kuat, di dia pe hati bolong tau mana yang butul deng mana yang tara butul. Kalu dia lia ngoni makang daging di orang pe puji-puji pe tampa-tampa, dia pasti tapengaru mo makang daging itu.

¹¹ Kalu ngoni biking bagitu, ngoni so biking ngoni pe sudara yang pe percaya bolong kuat jadi rusak dia pe hubungan deng Tuhan. Padahal Yesus Kristus so mati untuk tebus dia pe dosa lagi.

¹² Kalu ngoni biking ngoni pe sudara jadi bagitu, ngoni so berdosa pa ngoni pe sudara-sudara yang percaya itu, yang pe percaya pa Tuhan bolong kuat. Ngoni so biking dong pe hati jadi takaruang. Deng cara bagitu, ngoni so berdosa pa Yesus Kristus.

¹³ Jadi, kalu gara-gara makanang itu biking kita pe sudara yang percaya pa Tuhan jadi berdosa, itu sama deng kita so biking dia pe kaki tagate di batu kong jatu. Jadi lebe bae kita sama skali tara usa makang daging itu lagi selama kita hidup. Karna kita tara mau skali kita pe sudara jadi berdosa lagi gara-gara kita.