1 Korintus 7 - Perjanjian Baru Bahasa Melayu Maluku Utara

Nasehat untuk orang yang so kawing, deng untuk orang yang bolong kawing

¹ Sudara-sudara, ngoni perna tanya pa kita di ngoni pe surat, “Bagus ka tarada, kalu laki-laki tara kawing?” Menurut kita, itu bagus kalu laki-laki tara kawing.

² Tapi supaya tara tagoda untuk baseks sabarang, lebe bae tiap laki-laki kawing deng satu parampuang, deng tiap parampuang kawing deng satu laki-laki.

³ Laki jang tolak kalu dia pe bini mau tidor deng dia. Itu dia pe hak. Bagitu lagi deng bini, jang tolak kalu dia pe laki mau tidor deng dia. Itu me dia pe hak.

⁴ Karna waktu dong dua so kawing, bini so tarada hak lagi pa dia pe badan, tapi yang ada hak pa dia pe badan itu, dia pe laki. Bagitu lagi deng laki, dia so tarada hak lagi pa dia pe badan, tapi yang ada hak pa dia pe badan itu, dia pe bini.

⁵ Ngoni laki bini, ngoni dua tara bole baku tolak untuk biking ngoni pe hak itu. Tapi ngoni bole tara tidor sama-sama untuk sementara waktu kalu ngoni mo sadia waktu untuk berdoa, asal ngoni dua so baku ator kamuka. Abis itu, ngoni musti tidor sama-sama lagi, supaya Iblis tara goda pa ngoni, karna jang sampe ngoni itu tara mampo tahang ngoni pe napsu.

⁶ Apa yang kita bilang pa ngoni ini bukang parenta dari Tuhan Allah, tapi kita cuma usul saja.

⁷ Sebenarnya, kita lebe suka kalu samua orang yang bolong kawing jang kawing, sama deng kita. Tapi masing-masing orang yang percaya so dapa karunia kusus dari Tuhan Allah. Yang satu dapa karunia ini, yang laeng dapa karunia itu. Ada yang Tuhan kase karunia untuk tara kawing, deng ada yang Tuhan kase karunia untuk kawing.

⁸ Kita kase nasehat pa orang-orang yang bolong kawing, deng pa janda-janda, lebe bae dorang tara usa kawing suda, sama deng kita.

⁹ Tapi kalu dorang tara mampo tahang napsu, lebe bae dong kawing suda. Karna, itu yang lebe bagus daripada tara kawing kong diri sengsara gara-gara tara mampo tahang napsu itu.

¹⁰ Tapi untuk orang-orang yang so kawing, ini parenta dari Tuhan Yesus, bukang dari kita: parampuang yang so kawing, tara bole cere pa dia pe laki.

¹¹ Tapi kalu macam dia so cere, dia tara bole kawing lagi. Tapi kalu dia tara mau tinggal sandiri tapisa deng dia pe laki, lebe bae dia bale ulang pa dia pe laki dulu itu. Kong laki, tara bole cere pa dia pe bini.

¹² Turus, kita mo kase nasehat pa orang-orang yang laeng. Ini kita pe pendapat sandiri, bukang dari Tuhan Yesus. Kalu ada orang percaya yang pe bini tara percaya, tapi dia pe bini itu suka hidup sama-sama deng dia turus, jang dia cere pa dia pe bini.

¹³ Bagitu lagi kalu ada orang percaya yang dia pe laki tara percaya Tuhan Yesus, tapi dia pe laki itu suka hidup sama-sama deng dia turus, jang dia cere pa dia pe laki itu.

¹⁴ Karna ngoni yang percaya pa Tuhan Yesus, biar ngoni pe bini atau laki tara percaya, ngoni pe perkawinan Tuhan tarima karna ngoni laki bini so jadi satu. Kalu tara bagitu, ngoni pe ana-ana akan jadi sama deng ana-ana haram, tapi skarang Tuhan so tarima pa dorang jadi Dia pe umat sandiri.

¹⁵ Tapi kalu laki atau bini yang tara percaya Tuhan Yesus itu mau baku pisa saja, kase biar suda. Itu berarti, ngoni yang percaya itu so tara taika lagi deng ngoni pe laki atau bini. Barang, Tuhan Allah mau ngoni hidup baku bawa bae-bae.

¹⁶ Kita suru ngoni yang percaya itu jang cere ngoni pe laki atau bini yang tara percaya itu, karna sapa tau dia bisa jadi orang yang percaya kong dapa slamat karna dia lia ngoni yang percaya pe cara hidup yang bae waktu masi sama-sama deng dia.

Hidup sama deng keadaan waktu Tuhan Allah pangge untuk iko pa Dia

¹⁷ Tiap orang percaya musti hidup iko apa yang Tuhan Yesus so kase pa dia, jadi dia bole hidup bagitu turus, sama deng waktu Tuhan Allah pangge pa dia untuk jadi percaya. Itu suda parenta yang kita kase ajar di tiap jemaat yang kita pigi.

¹⁸ Conto bagini: kalu ada orang yang so sunat, tanda dia itu orang Yahudi, abis itu baru dia jadi percaya pa Tuhan Yesus yang pangge pa dia, jang dia manyangkal dia pe sunat itu, kata, dia tara jadi orang Yahudi lagi. Deng kalu ada orang yang bukang Yahudi yang so jadi percaya pa Tuhan Yesus, jang dia minta basunat sama deng orang Yahudi.

¹⁹ Karna orang yang sunat deng tara sunat itu tara penting. Yang penting itu iko Tuhan Allah pe parenta-parenta.

²⁰ Jadi, bagus kalu tiap orang turus hidup sama deng dia pe keadaan waktu Tuhan Allah pangge pa dia untuk iko pa Tuhan Allah.

²¹ Dia pe conto laeng lagi bagini: ngoni orang karja yang ngoni pe tuang so bili pa ngoni, kalu Tuhan pangge pa ngoni untuk jadi percaya pa Dia, tara usa pusing suda deng ngoni pe keadaan itu. Tapi, kalu ada kesempatan untuk urus bebas la jang jadi ngoni pe tuang punya lagi, pake suda kesempatan itu.

²² Barang, orang karja yang Tuhan so pangge untuk iko pa Tuhan, dia itu so jadi orang bebas karna Tuhan Allah so kase bebas pa dia dari dosa-dosa. Bagitu lagi deng orang bebas yang bukang orang karja tapi dia so percaya pa Yesus Kristus, dia itu so jadi Yesus Kristus pe orang karja.

²³ Ngoni, Tuhan Allah so bili deng bayar mahal waktu Yesus Kristus dapa salib untuk tebus ngoni pe dosa-dosa. Karna itu, jang lagi kase ngoni pe diri untuk dapa bili jadi manusia pe orang karja.

²⁴ Jadi sudara-sudara, ngoni tetap bagitu suda, sama deng ngoni pe keadaan waktu Tuhan Allah pangge pa ngoni untuk iko pa Dia. Hidup suda bagitu turus pa Tuhan Allah pe muka.

Orang yang kawing deng yang tara kawing, musti pe perhatian pa Tuhan lebe banya

²⁵ Skarang, tentang orang-orang yang bolong kawing, kita tara dapa parenta dari Tuhan, tapi kita mo kase nasehat pa dorang. Yang kita mo bilang ini, ngoni bole percaya karna Tuhan so pili pa kita jadi Dia pe utusan, itu Dia pe rasa kasiang pa kita.

²⁶ Kita pe nasehat bagini: di waktu skarang ini, torang mangada susa deng sengsara, jadi lebe bae ngoni tara usa ruba ngoni pe hidup yang Tuhan so kase pa ngoni, hidup bagitu suda.

²⁷ Kalu ngoni so kawing, jang berusaha untuk cere ngoni pe bini. Kong kalu ngoni bolong kawing, lebe bae tara usa kawing suda.

²⁸ Tapi kalu nyong-nyong kawing, dia tara biking dosa. Bagitu lagi, kalu nona-nona kawing, dia tara biking dosa. Tapi untuk orang-orang yang so kawing, dong mo dapa banya sengsara di dunia ini, deng kita tara mau ngoni dapa sengsara macam bagitu.

²⁹ Sudara-sudara, ini kita pe maksut: tara lama lagi mo kiamat. Karna itu, di waktu sisa ini, orang yang ada bini, dorang musti kase banya waktu untuk biking Tuhan pe mau, sama deng orang yang hidup tarada bini.

³⁰ Bagitu lagi deng orang yang hati susa, jang cuma pikir tentang dong pe susa saja. Orang yang sanang, jang pikir dong pe sanang saja. Kong orang yang babili satu barang, jang pikir barang itu dong punya saja.

³¹ Yang jelas itu bagini, orang yang sibuk cari apa-apa dalam dunia ini, jang cuma pikir tentang dong pe hidup di dunia ini saja. Karna dunia yang torang tinggal ini so mulai tara bagus deng akan ancor nanti.

³² Kita mau supaya jang ngoni talalu bapikir tentang samua yang ada di dunia ini sampe so tara layani pa Tuhan bae-bae. Laki-laki yang tara kawing, dia pe perhatian ada lebe banya untuk Tuhan, bagimana supaya dia kase sanang Tuhan pe hati.

³³ Tapi laki-laki yang ada bini, dia pe perhatian lebe banya untuk dia pe hidup hari-hari di dunia, bagimana supaya dia bisa kase sanang dia pe bini pe hati.

³⁴ Deng bagitu, dia pe perhatian tabagi-bagi. Kong kalu parampuang yang tarada laki, deng nona-nona, dong pe perhatian lebe banya pa Tuhan. Dorang kase dong pe diri, deng kase dong pe pikiran, cuma untuk biking Tuhan pe hati sanang. Tapi parampuang yang ada laki, dia pe perhatian lebe banya pa dia pe hidup hari-hari, bagimana supaya dia bisa kase sanang dia pe laki pe hati.

³⁵ Samua nasehat yang kita bilang ini untuk ngoni sandiri pe bae, bukang mo larang-larang pa ngoni. Kita pe maksut, supaya ngoni biking apa yang pantas untuk Tuhan pe umat biking, deng supaya ngoni pe perhatian pa Tuhan tara tabagi-bagi.

³⁶ Kalu ada laki-laki yang rasa dia so biking yang tara bagus pa dia pe calon kawing, dia tunda-tunda dong pe kawing, apalagi dia pe calon kawing so tamba tua, turus dia so mau kawing deng dia pe calon itu, lebe bae dia kawing suda, itu tara berdosa.

³⁷ Tapi kalu ada laki-laki yang so ambe keputusan di dia pe dalam hati untuk tara kawing deng dia pe calon kawing, kong dia pe keputusan itu tara terpaksa, yang dia biking itu bae, asal dia mampo tahang dia pe napsu.

³⁸ Jadi yang jelas itu, orang yang kawing deng dia pe calon kawing, dia so biking barang yang bae. Deng orang yang tara kawing deng dia pe calon kawing, itu dia so biking yang lebe bae lagi.

³⁹ Kalu ada bini yang pe laki masi hidup, dia masi tetap laki itu pe bini sampe mati. Tapi kalu dia pe laki so mati, dia bisa kawing deng sapa saja yang dia mau, asal orang itu orang yang percaya pa Tuhan.

⁴⁰ Tapi menurut kita, bagus kalu dia so tara kawing lagi. Deng, kita rasa Tuhan Allah pe Roh yang pimpin pa kita untuk kase nasehat ini.