1 Korintus 6 - Perjanjian Baru Bahasa Melayu Maluku Utara

Orang percaya musti urus dorang pe masala sandiri

¹ Sudara-sudara yang percaya, kalu ada dari ngoni yang baku tasala, bikiapa kong ngoni bawa ngoni pe masala itu di pengadilan untuk urus ngoni pe masala? Jang ngoni bagitu. Tapi ngoni musti bawa ngoni pe masala itu pa orang-orang yang sama-sama percaya, la dorang bantu pa ngoni untuk kase selesai ngoni pe masala itu.

² Ngoni tau to, nanti waktu kiamat, orang-orang yang so jadi Tuhan Allah pe umat yang akan adili pa samua orang yang ada di dunia ini. Jadi kalu ngoni tau itu, masa ngoni tara mampo kase selesai ngoni pe masala-masala biasa yang tara penting di dunia ini?

³ Ngoni pasti tau lagi, torang orang-orang percaya yang akan mo adili pa malaekat-malaekat. Jadi kalu cuma masala-masala dalam ngoni pe hidup hari-hari di dunia ini, pasti ngoni mampo kase selesai sandiri.

⁴ Jadi, kalu ada masala di antara ngoni orang yang percaya, dari ngoni jemaat suda yang urus masala itu. Jang ngoni bawa masala itu pa orang-orang yang tara percaya Tuhan, karna dorang itu bukang bagian dari ngoni.

⁵ Masa tarada satu orang dari ngoni jemaat yang cukup pande untuk urus ngoni pe masala-masala! Kita bilang bagitu, supaya ngoni malu kong beruba.

⁶ Tapi ngoni ini, kalu ngoni baku tasala, ngoni tara jaga urus ngoni pe masala itu di orang yang sama-sama percaya. Kong lebe soe lagi, ada dari ngoni yang lapor dia pe sudara yang percaya itu pa orang-orang yang tara percaya!

⁷ Tapi sebenarnya, deng ngoni ada masala saja di antara ngoni orang percaya, itu so kase tunju ngoni itu so sala skali. Jadi, kalu ada orang yang biking jahat pa ngoni biar tara ada dia pe alasan, atau ada yang kase foya pa ngoni la ambe ngoni pe barang, lebe bae ngoni tarima saja, tara usa bawa masala itu kamana-mana.

⁸ Ngoni sandiri yang biking jahat pa orang, padahal tara ada dia pe alasan, deng ngoni kase foya la ambe dorang pe barang. Kong lebe soe lagi, dorang yang ngoni kase foya deng kase rugi itu, ngoni pe sudara sandiri suda yang sama-sama percaya!

⁹ Ngoni pasti tau, orang-orang yang biking tara butul, dorang tara mungkin jadi Tuhan Allah pe umat yang Dia Berkuasa sebagai Raja pa dorang pe hidup. Jang dengar orang yang bilang kata, Tuhan Allah pe umat bole biking barang tara bae, conto sama deng bagini: orang yang baseks sabarang, orang yang semba pa dia pe puji-puji, orang yang baku suka deng orang yang bukang dia pe laki atau bini, laki-laki yang baseks deng laki-laki,

¹⁰ orang yang papancuri, orang yang golojo doi deng harta, orang yang pangmabo, orang yang jaga bicara tara butul tentang orang laeng, deng orang yang rampas orang pe barang. Orang-orang ini tara bisa jadi Tuhan Allah pe umat yang Dia Berkuasa sebagai Raja pa dorang pe hidup.

¹¹ Deng ada babarapa dari ngoni yang dulu pe kalakuang tara bae bagitu. Tapi skarang so tarada, karna Tuhan Allah so kase bersi pa ngoni dari dosa. Tuhan Allah so biking ngoni jadi Dia pe umat sandiri deng biking ngoni jadi orang yang tara sala pa Dia pe muka. Tuhan Allah biking samua itu karna Tuhan Yesus Kristus so mati untuk kase slamat pa torang, deng karna Roh dari torang pe Tuhan Allah bakarja di ngoni pe hati.

Orang percaya tara bole baseks sabarang

¹² Ada yang bilang bagini, “Torang bole biking samua hal,” tapi tara samua hal itu ada dia pe guna. Jadi biar kita bisa biking samua hal, tapi kita tara mau kase biar hal-hal itu kuasai kita pe diri.

¹³ Ada lagi yang bilang bagini, “Makanang ada dia pe guna untuk tong pe puru, kong tong pe puru Tuhan Allah biking untuk perlu makanang.” Tapi nanti waktu kiamat, dua-dua itu Tuhan Allah akan kase ancor. Tapi biar Tuhan Allah mo kase ancor, torang tara bole pake tong pe badan untuk baseks sabarang. Torang musti pake tong pe badan ini untuk biking Tuhan pe mau, kong Tuhan lagi yang akan jaga tong pe badan.

¹⁴ Tuhan Allah so kase hidup ulang pa Tuhan Yesus pake Dia pe kuasa. Bagitu lagi deng torang, Tuhan Allah akan kase hidup ulang pa torang pake Dia pe kuasa.

¹⁵ Ngoni tau ka tarada, waktu ngoni jadi percaya pa Yesus Kristus, ngoni so jadi satu deng Dia. Karna itu, ngoni tara bole pake ngoni pe badan untuk baseks sabarang. Kalu ngoni biking bagitu, itu sama deng ngoni pake Yesus Kristus pe badan untuk baseks sabarang. Ngoni tara bole bagitu!

¹⁶ Pasti ngoni so tau to, orang yang tidor deng parampuang tara bae, dia so jadi satu badan deng parampuang itu. Karna di Kitab Suci so tatulis bagini, “Dorang dua akan jadi satu.”

¹⁷ Tapi orang yang so hidup satu hati deng Tuhan, dia itu so jadi satu roh deng Tuhan.

¹⁸ Jadi, ngoni inga e, jang coba-coba ngoni baseks sabarang! Barang, dosa laeng yang orang jaga biking, itu tara ada dia pe akibat pa dia pe badan. Tapi kalu baseks sabarang, dosa itu biking rusak dia pe diri sandiri.

¹⁹ Ngoni so tau to, Roh Kudus tinggal dalam ngoni pe diri, jadi ngoni sama deng so jadi Tuhan Allah pe Ruma yang Roh Kudus tinggal. Tuhan Allah yang kase Roh Kudus itu pa ngoni, kong ngoni pe diri itu bukang ngoni punya sandiri, tapi Tuhan Allah punya.

²⁰ Barang, waktu Tuhan Yesus mati untuk tebus ngoni pe dosa, itu pe arti, Dia so bili pa ngoni untuk jadi Dia pe umat. Jadi, ngoni musti pake ngoni pe badan untuk biking apa yang bae, supaya Tuhan Allah dapa puji deng hormat.