1 Korintus 5 - Perjanjian Baru Bahasa Melayu Maluku Utara

Jemaat musti urus orang-orang di jemaat yang pe kalakuang tara bae

¹ Sudara-sudara, kita dengar ada dari ngoni jemaat yang jaga baku suka deng orang yang bukang dia pe bini. Kong yang dia baku suka itu, dia pe mama tiri sandiri! Yang dia biking itu jahat skali, padahal orang yang tara percaya pa Tuhan Allah me tara biking bagitu.

² Tapi biar ada dari ngoni yang jaga biking bagitu me, ngoni masi saja basombong. Sebenarnya, ngoni musti hati susa skali deng yang dia biking itu, kong ngoni musti kase kaluar saja pa dia dari ngoni pe tenga-tenga.

³ Memang kita tara sama-sama deng ngoni di situ, tapi kita pe hati ada di situ. Karna itu, kita so ambe keputusan, orang yang biking jahat itu, ngoni musti kase hukuman pa dia.

⁴ Waktu ngoni orang-orang yang percaya pa Tuhan Yesus bakumpul, kita pe hati lagi ada sama-sama deng ngoni di situ. Jadi deng torang pe Tuhan Yesus pe kuasa, kita minta pa ngoni,

⁵ ngoni musti kase kaluar pa dia dari jemaat la serakan dia pa Iblis, setang-setang pe raja, supaya deng dia dapa siksa bagitu, dia pe mau yang suka biking dosa itu ilang. Deng bagitu, dia bertobat kong dapa slamat waktu Tuhan datang ulang.

⁶ Tara bagus ngoni basombong macam bagitu. Jang sampe ngoni tara sadar, kalu satu orang dari ngoni biking sala, bisa pengaru orang laeng dalam ngoni pe jemaat biking sala lagi. Itu sama deng ragi yang sadiki saja, bisa kase nae adonan.

⁷ Buang suda samua ngoni pe kalakuang yang jahat itu, la ngoni jadi jemaat yang pe hati bersi. Itu bole kase sama deng waktu torang orang Yahudi biking hari raya Roti Tara Pake Ragi, torang buang samua ragi dari torang pe ruma, kong tong biking adonan yang baru yang tara pake ragi. Ngoni memang so bersi karna ngoni so percaya pa Yesus Kristus yang mati untuk tebus torang pe dosa-dosa. Dia itu bole kase sama deng domba yang torang potong untuk biking jadi korban persembahan di torang pe hari raya.

⁸ Jadi, mari suda torang buang tong pe kalakuang yang jahat deng tong pe dosa-dosa, itu sama deng tong buang ragi yang lama di torang pe hari raya Paska. Kong torang jadi orang yang biking barang yang butul deng hati yang bersi, itu sama deng torang biking torang pe hari raya Roti Tara Pake Ragi.

⁹ Di kita pe surat satu yang kamuka, kita so bilang pa ngoni, jang ngoni batamang deng orang-orang yang baseks sabarang.

¹⁰ Waktu kita tulis itu, bukang kita pe maksut, jang batamang deng samua orang yang tara percaya, yang baseks sabarang, yang golojo orang pe barang, yang tukang tipu, deng yang jaga semba dong pe puji-puji. Karna kalu kita suru ngoni bajao dari dorang, ngoni musti kase tinggal dunia ini.

¹¹ Tapi skarang kita tulis pa ngoni ini, kita pe maksut itu, jang ngoni batamang deng orang yang mangaku dia itu tong pe sudara yang percaya, padahal dia salalu biking hal-hal jahat ini: baseks sabarang, golojo orang pe barang kong mau ambe, jaga semba pa dia pe puji-puji, jaga bicara tara bae tentang orang laeng, jaga mabo-mabo, atau yang jaga rampas orang pe barang. Deng orang yang macam bagitu, ngoni tara bole batamang, apalagi mo makang sama-sama.

¹² Kita bilang bagitu, karna torang orang percaya ada tanggung jawab untuk urus pa torang pe sudara-sudara di tong pe jemaat yang dong pe kalakuang tara bae. Tapi untuk orang-orang yang bolong percaya, torang tarada tanggung jawab untuk urus pa dorang.

¹³ Dorang di luar jemaat yang bolong percaya itu, nanti Tuhan Allah yang mo adili pa dorang. Ngoni musti biking apa yang so tatulis di Kitab Suci, “User kase kaluar dari ngoni pe jemaat orang yang bilang kata, dia sama-sama percaya deng ngoni, padahal dia jaga biking barang yang jahat!”