1 Korintus 4 - Perjanjian Baru Bahasa Melayu Maluku Utara

Rasul-rasul pe cara hidup jadi conto untuk Tuhan pe umat

¹ Lebe bae ngoni anggap torang ini Yesus Kristus pe orang-orang karja yang dapa kase percaya dari Tuhan Allah untuk kase tau Dia pe rencana yang mo kase slamat pa manusia. Rencana itu yang dulu orang-orang bolong tau.

² Kong untuk torang yang jadi Tuhan Allah pe orang-orang karja itu, torang musti setia biking apa yang Tuhan Allah suru, la torang ini bisa dapa percaya.

³ Jadi kalu ngoni nilai kita biking kita pe tugas itu sala, atau biar orang bawa pa kita di pengadilan me, tara apa-apa. Kita sandiri me tara perna nilai yang kita biking ini so bagus ka bolong.

⁴ Barang, di kita pe hati, kita rasa kita so biking kita pe tugas bae-bae sama deng yang Tuhan Allah suru. Tapi itu tara berarti kita ini orang yang butul. Nanti Tuhan Allah sandiri yang nilai kong bilang, kita butul ka tarada.

⁵ Karna itu, jang ngoni nilai orang laeng sala kalu bolong dia pe waktu. Nanti waktu Tuhan datang ulang, itu dia pe waktu untuk Tuhan mo adili pa samua orang. Kong waktu itu, Dia mo buka samua hal yang orang sambunyi dalam galap. Dia me akan buka apa yang orang rencana dalam hati. Waktu itu, Tuhan Allah akan puji pa tiap orang yang pantas dapa puji.

⁶ Sudara-sudara, kita bicara tentang kita deng Apolos tadi, supaya ngoni balajar dari torang dua kong ngoni bole mangarti parenta yang bilang bagini, “Jang langgar parenta-parenta yang so tatulis.” Kalu ngoni biking bagitu, tarada dari ngoni yang jadi sombong sampe ngoni hormati pemimpin yang satu kong pemimpin yang laeng ngoni kase sala.

⁷ Barang, kalu ngoni nilai pemimpin bagitu, itu sama deng ngoni anggap ngoni pe diri lebe penting dari orang laeng. Samua yang ngoni punya, itu dari Tuhan. Jadi bikiapa kong ngoni basombong, sama deng ngoni anggap apa yang ngoni tarima itu dari ngoni pe kemampuan sandiri, bukang dari Tuhan?

⁸ Ngoni memang so tara perlu apa-apa lagi, ngoni so punya samua-samua! Ngoni so hebat sama deng raja! Kong torang kata, tarada! Bagus kalu ngoni butul-butul so mulai hebat sama deng raja, supaya torang ini me bole lagi jadi raja sama-sama deng ngoni.

⁹ Tapi sebenarnya menurut kita, torang yang jadi Yesus Kristus pe rasul-rasul ini, Tuhan Allah so kase pa torang tampa yang paling tara penting. Torang ini so sama deng orang yang dapa tangka kong mo dapa bunu di banya orang pe muka. Torang pe susa di dunia ini, orang-orang dunia deng malaekat-malaekat ada lia-lia pa torang.

¹⁰ Torang ini orang anggap bodo karna torang jaga kase tau tentang Yesus Kristus. Tapi ngoni, orang anggap ngoni pande, barang ngoni so percaya pa Yesus Kristus. Torang ini orang anggap tara ada pengaru, tapi ngoni, orang anggap Tuhan Allah pe kuasa basar ada pa ngoni. Ngoni dapa hormati dari orang-orang, tapi pa torang, orang hina-hina.

¹¹ Sampe skarang ini, torang jaga lapar deng aus. Torang pe pakeang me tarobe-tarobe, torang jaga dapa pukul deng tarada tampa tinggal yang tetap.

¹² Torang ini karja karas sampe suar malele untuk torang pe hidup. Kalu orang momake pa torang, torang kase berdoa pa dorang la Tuhan kase yang bae pa dorang. Kalu orang siksa pa torang, torang sabar saja.

¹³ Kalu orang bicara tara bae tentang torang, tong tetap bicara bae-bae pa dorang. Sampe skarang ini, manusia di dunia so biking torang sama deng rumpu yang bobou busu, sama deng sampa.

¹⁴ Kita tulis samua ini bukang mo biking malu pa ngoni, tapi mo togor supaya ngoni jadi lebe bae. Karna ngoni ini kita anggap sama deng kita pe ana-ana yang kita sayang.

¹⁵ Barang, biar lagi ngoni pe guru deng ribu yang ajar pa ngoni tentang Yesus Kristus, tapi cuma kita yang pertama kali kase tau Kabar Bae tentang Yesus Kristus itu pa ngoni, sampe ngoni jadi percaya, itu sama deng kita so jadi ngoni pe papa, tarada yang laeng.

¹⁶ Karna itu, kita minta deng sunggu-sunggu pa ngoni, iko suda kita pe cara hidup.

¹⁷ Itu suda yang biking sampe kita utus Timotius pa ngoni, la dia kase inga ulang pa ngoni, bagimana kita pe cara hidup yang iko pa Kristus Yesus. Cara hidup itu yang kita so kase ajar pa samua jemaat di samua tampa yang kita pigi. Timotius itu kita so anggap kita pe ana. Dia kita sayang, deng dia lagi setia pa Tuhan.

¹⁸ Tapi ada laeng dari ngoni yang kira kata, kita tara mo datang togor pa ngoni lagi, jadi dorang so kapala basar.

¹⁹ Tapi kalu Tuhan mau kita datang, tara lama kita akan datang pa ngoni. Kong waktu kita so ada deng ngoni, kita akan tau orang-orang yang basombong itu. Kita akan lia apa butul dong biking banya hal yang bae itu pake Tuhan pe kuasa, atau dong cuma banya mulu saja.

²⁰ Karna kalu Tuhan Allah Berkuasa sebagai Raja pa orang pe hidup, itu dapa lia bukang cuma dari orang itu pe kata-kata saja, tapi dari Tuhan Allah pe kuasa yang ada pa dia.

²¹ Jadi skarang tinggal ngoni pili saja: kalu kita datang pa ngoni kong ngoni tetap tara beruba deng ngoni pe kalakuang itu, ngoni mau kita pukul pa ngoni deng tali? Atau ngoni mo beruba la kita bicara bae-bae pa ngoni deng kase tunju kita pe sayang?