1 Korintus 2 - Perjanjian Baru Bahasa Melayu Maluku Utara

Paulus kase tau tentang Yesus Kristus bukang iko dia pe pande sandiri

¹ Sudara-sudara, tuhari waktu kita datang kase tau tentang Tuhan Allah pe rencana yang dulu manusia bolong tau, kita tara pake bahasa tinggi-tinggi, kita me tara pake kita pe pande sandiri.

² Barang waktu itu, kita so ambe keputusan bagini: selama kita ada sama-sama deng ngoni, yang paling penting yang kita mo bicara pa ngoni itu tentang Yesus Kristus, bukang mo pusing deng hal-hal laeng. Kita cuma mo bicara pa ngoni tentang Dia yang so mati di kayu salib untuk kase slamat pa manusia.

³ Kong waktu kita ada sama-sama deng ngoni itu, kita rasa kita pe diri tara mampo, deng kita rasa tako sampe totofore.

⁴ Waktu kita babicara pa ngoni, kita tara pake manusia pe pande untuk kase yakin pa ngoni apa yang kita bilang. Tapi waktu itu, Roh Kudus pe kuasa yang kase yakin pa ngoni sampe ngoni tau yang kita bilang itu, butul.

⁵ Deng Roh Kudus biking bagitu, ngoni bole percaya pa Yesus Kristus, bukang karna ngoni iko manusia pe pande, tapi karna Tuhan Allah pe kuasa.

Roh Kudus bantu pa torang untuk mangarti Tuhan Allah pe rencana yang bijaksana

⁶ Tapi biar bagitu, kalu torang babicara pa orang-orang yang dorang pe percaya so kuat, torang bicara tentang rencana yang bijaksana. Rencana yang bijaksana itu pe asal bukang dari dunia ini, deng bukang dari orang-orang yang berkuasa di dunia ini yang nanti dorang so tara berkuasa lagi.

⁷ Tapi rencana yang bijaksana itu dari Tuhan Allah. Rencana itu dulu orang bolong tau karna Tuhan Allah bolong buka rahasia itu. Dia pe rencana itu so ada dari dulu waktu Dia bolong cipta dunia ini. Dia biking rencana itu, supaya torang yang percaya pa Dia bole dapa puji deng hormat.

⁸ Tara ada dari pemimpin-pemimpin di dunia ini yang mangarti Tuhan Allah pe rencana itu. Karna kalu dorang mangarti itu, dong tara akan mo kase salib pa Tuhan yang hebat itu.

⁹ Rencana itu sama deng yang tatulis di Kitab Suci, bagini: “Tuhan Allah so kase sadia banya hal untuk orang-orang yang sayang pa Dia. Yang Dia so kase sadia itu, bolong perna manusia lia deng dia pe mata, bolong perna manusia dengar deng dia pe talinga, deng bolong perna ada pa manusia pe pikiran.”

¹⁰ Memang dulu, tarada orang yang tau tentang Tuhan Allah pe rencana itu. Tapi skarang, Roh Kudus so kase tau itu pa torang. Dia kase tau itu pa torang karna Dia me tau samua sampe Tuhan Allah pe isi hati.

¹¹ Ambe conto bagini, yang tau torang pe isi hati, cuma torang sandiri. Bagitu me deng Tuhan Allah, yang tau Tuhan Allah pe isi hati, cuma Dia pe Roh sandiri.

¹² Kong torang, torang tara tarima roh yang dari dunia ini, tapi torang tarima Roh Kudus yang dari Tuhan Allah, supaya torang tau samua yang Tuhan Allah so kase pa torang deng cuma-cuma.

¹³ Jadi waktu torang kase tau Tuhan Allah pe rencana yang Roh Kudus kase tau pa torang itu, torang tara pake manusia pe pande. Tapi torang kase tau pake kata-kata yang Roh Kudus kase pa torang. Deng kata-kata itu, tong kase jelas ajaran dari Roh Kudus pa orang-orang yang Roh Kudus kuasai.

¹⁴ Tapi orang-orang yang cuma iko manusia pe mau, dorang tara tarima ajaran dari Tuhan Allah pe Roh. Dorang anggap itu sama deng orang-orang bodo pe carita saja. Ajaran dari Roh Kudus itu dorang tara bisa mangarti, tapi ajaran itu orang bisa mangarti cuma kalu Roh Kudus yang bantu pa dorang untuk mangarti.

¹⁵ Kong orang yang Roh Kudus kuasai, dia tau nilai samua hal. Tapi orang laeng tara bisa nilai orang yang Roh Kudus kuasai itu pe pikiran.

¹⁶ Barang, ada tatulis di Kitab Suci bagini, “Tara ada satu orang yang tau Tuhan pe pikiran. Turus, tara ada satu orang yang bisa kase nasehat pa Dia.” Tapi torang yang Roh Kudus so kuasai ini, torang pe cara bapikir sama deng Yesus Kristus pe cara bapikir.